ઇઝરાયલમાં સરકાર રચવા નેતન્યાહુના પ્રયાસોને ઝટકો, ગાદી આઇઝનકોટે ફગાવ્યો પ્રસ્તાવ

 ઇઝરાયલમાં ચૂંટણી બાદ નવી સરકારની રચનાને લઈને રાજકીય ખેંચતાણ તેજ બની છે. કાર્યકારી વડાપ્રધાન બેન્જામિન નેતન્યાહુએ પૂર્વ સૈન્ય પ્રમુખ ગાદી આઇઝનકોટને મળીને રાષ્ટ્રીય એકતા સરકાર બનાવવાની અપીલ કરી હતી. જોકે, આઇઝનકોટે ગણતરીની મિનિટોમાં જ નેતન્યાહુનો પ્રસ્તાવ ફગાવી દીધો હતો. તેમણે કહ્યું કે નેતન્યાહુ જાણે છે કે તેઓ ચૂંટણી હારી ચૂક્યા છે અને હવે તેમની રાજકીય ચાલ સફળ થવાની નથી. આઇઝનકોટે કહ્યું કે નેતન્યાહુ એવા સમયે વાતચીતની અપીલ કરી રહ્યા છે, જ્યારે સરકાર રચવા માટેની ચર્ચા પહેલેથી જ ચાલી રહી છે. તેમની આવી ચાલોથી તેઓ પ્રભાવિત થવાના નથી. ઇઝરાયલના રાષ્ટ્રપતિ ઇસાક હર્જોગે ગયા અઠવાડિયે આઇઝનકોટને નવી સરકાર બનાવવાની જવાબદારી સોંપી હતી. તેમને સરકાર રચવા માટે 28 દિવસનો સમય આપવામાં આવ્યો છે. જરૂર પડ્યે આ સમયમર્યાદામાં વધુ 14 દિવસનો વધારો થઈ શકે છે.

નેતન્યાહુએ ઈરાનના પરમાણુ કાર્યક્રમનો મુદ્દો ઉઠાવ્યો

નેતન્યાહુએ શનિવારે વીડિયો સંદેશ જાહેર કરીને કહ્યું હતું કે ઈરાન ફરી એકવાર પોતાનો પરમાણુ કાર્યક્રમ શરૂ કરવાનો પ્રયાસ કરી રહ્યું છે. તેમણે આરોપ લગાવ્યો કે ઈરાન ઇઝરાયલને ખતમ કરવા માગે છે અને તક મળતાં જ તેની વિરુદ્ધ પરમાણુ હથિયારોનો ઉપયોગ કરી શકે છે. નેતન્યાહુના મતે ઈરાનના પરમાણુ ખતરાને કાયમી ધોરણે ખતમ કરવો જરૂરી છે. આ પડકારનો સામનો કરવા માટે દેશમાં રાષ્ટ્રીય એકતા સરકાર બનાવવી જોઈએ. તેમણે કહ્યું કે નાની સરકાર અથવા આતંકવાદને સમર્થન આપતા પક્ષોના સહારે ચાલતી સરકાર આ ખતરાનો સામનો કરી શકશે નહીં.

67 સાંસદોના સમર્થનથી આઇઝનકોટને પ્રથમ તક

ઇઝરાયલમાં 27 ઓક્ટોબરે યોજાયેલી ચૂંટણીમાં કોઈપણ પક્ષ કે ગઠબંધનને સરકાર બનાવવા માટે જરૂરી બહુમતી મળી નહોતી. 120 સભ્યોની સંસદ નેસેટમાં નેતન્યાહુના ગઠબંધનને 53 બેઠકો મળી હતી, જ્યારે આઇઝનકોટના ચાર પક્ષોના ગઠબંધનને 48 બેઠકો મળી હતી. અરબ પક્ષોએ 19 બેઠકો જીતી હતી. ચૂંટણી બાદ રાષ્ટ્રપતિએ સાંસદોનો અભિપ્રાય જાણ્યો હતો. તેમાં 67 સાંસદોએ આઇઝનકોટને વડાપ્રધાન બનાવવા સમર્થન આપ્યું હતું, જ્યારે 46 સાંસદો નેતન્યાહુની સાથે હતા. આ સંખ્યાના આધારે આઇઝનકોટને સરકાર બનાવવાની પ્રથમ તક મળી છે.

અલ્પમત સરકાર બનાવવાની આઇઝનકોટની રણનીતિ

આઇઝનકોટની યોજના મુજબ તેમના ગઠબંધનના 48 સાંસદો સરકારના સમર્થનમાં મતદાન કરશે, જ્યારે નેતન્યાહુના 46 સાંસદો વિરોધમાં મત આપશે. બાકીના 26 સાંસદો મતદાનથી દૂર રહે તેવી તેમની ગણતરી છે. આ 26 સાંસદોમાં અરબ અને અતિરૂઢિચુસ્ત પક્ષોના સભ્યોનો સમાવેશ થાય છે. આઇઝનકોટે સ્પષ્ટ કર્યું છે કે તેઓ અરબ પક્ષોને પોતાની સરકારમાં સામેલ નહીં કરે, પરંતુ તેઓ ઇચ્છે છે કે આ પક્ષો મતદાનમાં ભાગ ન લે.

કટ્ટરપંથી નેતાઓને લઈને પણ મતભેદ

નેતન્યાહુ એકતા સરકારમાં મધ્યમમાર્ગી અને દક્ષિણપંથી યહૂદી પક્ષોને સામેલ કરવા માગે છે, જ્યારે અરબ પક્ષોને સરકારથી દૂર રાખવા ઇચ્છે છે. તેમના સહયોગીઓએ અરબ પક્ષો પર ચૂંટણી 'ચોરી' કરવાનો આરોપ પણ લગાવ્યો છે, જોકે આ દાવાના સમર્થનમાં કોઈ નક્કર પુરાવા આપવામાં આવ્યા નથી.

બીજી તરફ, આઇઝનકોટે નેતન્યાહુ પર અરબ પક્ષો વિરુદ્ધ જાતિવાદી અભિયાન ચલાવવાનો આરોપ લગાવ્યો છે. તેમણે કહ્યું છે કે તેઓ નેતન્યાહુની લિકુડ પાર્ટી અને બેઝાલેલ સ્મોટ્રિચની ધાર્મિક ઝાયોનિઝમ પાર્ટીના નેતાઓ સાથે સરકાર બનાવી શકે છે, પરંતુ તેના માટે એકતા અંગે ઈમાનદારી જરૂરી છે. તેઓ દક્ષિણપંથી મંત્રી ઇતામાર બેન-ગ્વિરના સમર્થકો સહિત કટ્ટરપંથી નેતાઓને સરકારમાં સામેલ કરવા માગતા નથી.

મંગળવારે નેસેટના નવા સ્પીકરની ચૂંટણી

ઇઝરાયલની સંસદ નેસેટમાં મંગળવારે નવા સ્પીકરની પસંદગી માટે ચૂંટણી યોજાશે. હાલમાં આ પદ નેતન્યાહુના સહયોગી આમિર ઓહાના પાસે છે. વિપક્ષે તેમની સામે પૂર્વ સૈન્ય અધિકારી મટન કહાનાને ઉમેદવાર બનાવ્યા છે. આ ચૂંટણી પણ નવી સરકારની રચનાના પ્રયાસો માટે મહત્ત્વપૂર્ણ સાબિત થઈ શકે છે.