ક્લાઇમેટ ચેન્જનો ખતરો: દુનિયાની 21.6 કરોડથી વધુ વસ્તી ઘર છોડવા મજબૂર થશે
આબોહવા પરિવર્તન (Climate Change)ને કારણે આગામી સમયમાં દુનિયાના કરોડો લોકોને પોતાનાં ઘર છોડવાની ફરજ પડી શકે છે. ઇન્ટરનેશનલ ઓર્ગેનાઇઝેશન ફોર માઇગ્રેશન (IOM)ના ડિરેક્ટર જનરલ એસી પોલે સંયુક્ત રાષ્ટ્રની ક્લાઇમેટ ચેન્જ કોન્ફરન્સ દરમિયાન આ અંગે ગંભીર ચેતવણી આપી છે. તેમના જણાવ્યા અનુસાર, આબોહવા પરિવર્તનના કારણે વિશ્વભરમાં 21.6 કરોડથી વધુ લોકો વિસ્થાપિત થઈ શકે છે. તેમણે ચિંતા વ્યક્ત કરી હતી કે આટલા મોટા સંકટની આશંકા હોવા છતાં વિશ્વના અનેક દેશો આબોહવા પરિવર્તન સામે લડવા કરતાં પોતાની સરહદોની સુરક્ષા પાછળ અબજો ડોલર ખર્ચી રહ્યા છે.
20 કરોડથી વધુ લોકો જોખમગ્રસ્ત વિસ્તારોમાં
IOMના વડાએ જણાવ્યું હતું કે હાલમાં જ 20 કરોડથી વધુ લોકો એવા વિસ્તારોમાં રહે છે, જે આબોહવા પરિવર્તનની દૃષ્ટિએ અત્યંત સંવેદનશીલ છે. આ વિસ્તારોમાં રહેતા લોકોને ભવિષ્યમાં પોતાનું ઘર છોડવાની ફરજ પડી શકે છે. તેમણે ચેતવણી આપી હતી કે જો સમયસર યોગ્ય પગલાં લેવામાં નહીં આવે તો આ સંકટ વધુ ગંભીર બની શકે છે અને સ્થિતિ નિયંત્રણ બહાર જઈ શકે છે.
2025માં જ કરોડો લોકોને ઘર છોડવું પડ્યું
એસી પોલે જણાવ્યું હતું કે વર્ષ 2025 દરમિયાન જ કુદરતી આફતોના કારણે 20 કરોડથી વધુ લોકોને પોતાનાં ઘરબાર છોડવાની ફરજ પડી હતી. વાવાઝોડાં, દુષ્કાળ, જંગલોમાં લાગતી આગ અને તાપમાનમાં અસાધારણ વધારો જેવી ઘટનાઓને કારણે લોકોનું સ્થળાંતર વધ્યું છે. આવી ઘટનાઓ દર્શાવે છે કે આબોહવા પરિવર્તનની અસર હવે માત્ર પર્યાવરણ પૂરતી મર્યાદિત રહી નથી, પરંતુ માનવજીવન, રહેઠાણ અને રોજગાર માટે પણ મોટો ખતરો બની રહી છે.
સરહદોની લડાઈ નહીં, ક્લાઇમેટ ચેન્જ સામે જંગ જરૂરી
IOMના ડિરેક્ટર જનરલે વિશ્વના દેશોની નીતિઓ સામે સવાલ ઉઠાવતાં કહ્યું હતું કે, આબોહવા પરિવર્તનનું સંકટ સતત વધી રહ્યું છે, છતાં અનેક દેશો સરહદોના વિવાદ અને પરસ્પરના સંઘર્ષમાં વ્યસ્ત છે. તેમના મતે, દેશોએ પરસ્પર વિવાદો કરતાં આબોહવા પરિવર્તન સામે લડવા માટે વધુ ધ્યાન આપવાની જરૂર છે. જો વૈશ્વિક સ્તરે સંકલિત પ્રયાસો નહીં થાય તો આવનારા સમયમાં મોટા પાયે સ્થળાંતર અને માનવીય સંકટ ઊભું થઈ શકે છે.
