પેરિસ પેરાલિમ્પિકમાં ભારતને મળ્યો 8મો મેડલ, યોગેશ કથુનિયાએ ડિસ્કસ થ્રોમાં જીત્યો સિલ્વર

યોગેશ કથુનિયાએ આજે (2 સપ્ટેમ્બર) પેરિસ પેરાલિમ્પિક્સમાં મેન્સ ડિસ્કસ થ્રો F-56 ઈવેન્ટમાં અદ્ભુત પ્રદર્શન કરીને સિલ્વર મેડલ જીત્યો છે. આ સાથે ભારતના મેડલની સંખ્યા હવે 8 પર પહોંચી ગઈ છે. યોગેશે તેના સિઝનના સર્વશ્રેષ્ઠ પ્રદર્શન 42.22 મીટર સાથે સિલ્વર મેડલ જીત્યો છે. 

બીજો પેરાલિમ્પિક મેડલ જીત્યો

પેરાલિમ્પિકમાં યોગેશનો આ બીજો સિલ્વર મેડલ છે. તેણે ટોક્યો પેરાલિમ્પિક 2020માં પણ સિલ્વર મેડલ જીત્યો હતો. 27 વર્ષીય ભારતીયને બ્રાઝિલના ક્લોડની બતિસ્તા ડોસ સેન્ટોસ સામે કઠિન સ્પર્ધાનો સામનો કરવો પડ્યો હતો. બ્રાઝિલના એથ્લેટના શાનદાર પ્રદર્શનના કારણે તેને ગોલ્ડ મેડલ મળ્યો હતો

પેરાલિમ્પિક રેકોર્ડ તૂટ્યો

બતિસ્તાએ 46.45 મીટરના બીજા થ્રો સાથે સર્વકાલીન પેરાલિમ્પિક રેકોર્ડ (45.59 મીટર) તોડ્યો હતો. જો કે, તે ત્યાં અટક્યો ન હતો અને તેના 5મા પ્રયાસમાં 46.86 મીટરનો થ્રો કરીને નવો પેરાલિમ્પિક રેકોર્ડ બનાવ્યો હતો. પેરિસમાં આ સિદ્ધિ બતિસ્તાની કારકિર્દીની મોટી સિદ્ધિ છે.