IND A vs NZ A / ટેસ્ટ સિરીઝ પહેલા યશસ્વી જયસ્વાલનો ફ્લોપ શો ચાલુ! ન્યુઝીલેન્ડમાં સતત ત્રીજી ઈનિંગમાં નિષ્ફળ

ઈન્ડિયા A અને ન્યુઝીલેન્ડ A વચ્ચે બીજી બિનસત્તાવાર ટેસ્ટ મેચ ક્રાઇસ્ટચર્ચના હેગલી ઓવલ સ્ટેડિયમ ખાતે રમાઈ રહી છે. ન્યુઝીલેન્ડ Aએ ટોસ જીતીને પહેલા બોલિંગ કરવાનો નિર્ણય લીધો. ટોસ હાર્યા બાદ પ્રથમ બેટિંગ કરવા આવેલી ભારતીય ટીમની શરૂઆત નબળી રહી. ટીમને પહેલી જ ઓવરમાં પહેલો ઝટકો લાગ્યો જ્યારે ઓપનર યશસ્વી જયસ્વાલ ચાર બોલ પછી કોઈ રન બનાવ્યા વિના આઉટ થઈ ગયો. પ્રથમ બિનસત્તાવાર ટેસ્ટમાં પણ જયસ્વાલનું પ્રદર્શન નિરાશાજનક રહ્યું.

ટેસ્ટ સિરીઝ પહેલા ટીમ ઇન્ડિયાનો તણાવ વધ્યો

જયસ્વાલનું ખરાબ ફોર્મ ભારતીય ટીમ માટે માથાનો દુખાવો બની ગયું છે, કારણ કે તે આગામી દિવસોમાં ન્યુઝીલેન્ડ સામે મહત્ત્વપૂર્ણ ટેસ્ટ સિરીઝ રમવાની છે. યશસ્વી જયસ્વાલ ટીમના મુખ્ય ઓપનરોમાંથી એક છે અને ટીમ હંમેશા તેની પાસેથી મજબૂત શરૂઆતની અપેક્ષા રાખે છે. જોકે, તે ન્યુઝીલેન્ડ પ્રવાસ પર ભારતીય ટીમની ઈનિંગને સારી શરૂઆત નથી આપી શક્યો. બીજી બિનસત્તાવાર ટેસ્ટની બીજી ઈનિંગમાં જયસ્વાલ કેવું પ્રદર્શન કરે છે તે જોવાનું બાકી છે.

પહેલી બિનસત્તાવાર ટેસ્ટ મેચમાં જયસ્વાલનું પ્રદર્શન કેવું રહ્યું?

લિંકનમાં રમાયેલી ઈન્ડિયા A અને ન્યુઝીલેન્ડ A વચ્ચેની પહેલી બિનસત્તાવાર ટેસ્ટ મેચમાં પણ જયસ્વાલનું પ્રદર્શન ખાસ પ્રભાવશાળી નહતું રહ્યું. તે મેચની પહેલી ઈનિંગમાં તે 45 બોલમાં ફક્ત 15 રન બનાવીને આઉટ થયો હતો, જેમાં ફક્ત બે ચોગ્ગા ફટકાર્યા હતા. બીજી ઈનિંગમાં, તે 9 બોલમાં ફક્ત 5 રન બનાવી શક્યો હતો. બંને ટીમો વચ્ચેનો મેચ આખરે ડ્રો થયો હતો.

19 નવેમ્બરથી ટેસ્ટ સિરીઝ શરૂ થશે

ભારત અને ન્યુઝીલેન્ડ વચ્ચે ટેસ્ટ સિરીઝ 19 નવેમ્બરથી શરૂ થશે. સિરીઝની પ્રથમ ટેસ્ટ મેચ વેલિંગ્ટનના બેસિન રિઝર્વ સ્ટેડિયમ ખાતે રમાશે. તે પહેલા બંને ટીમો વચ્ચે પાંચ મેચની ODI સિરીઝ રમાશે. યશસ્વી જયસ્વાલ ODI સિરીઝનો ભાગ નથી, તેથી તે હવે સીધા ટેસ્ટ મેચમાં રમતો જોવા મળશે. વર્લ્ડ ટેસ્ટ ચેમ્પિયનશિપ 2025-27ની ફાઇનલમાં જગ્યા બનાવવા માટે ભારતીય ટીમે કોઈપણ કિંમતે બંને ટેસ્ટ મેચ જીતવી પડશે.