આવતીકાલથી શરૂ થશે Women's Premier League 2025, જાણો ક્યાં, ક્યારે અને કેવી રીતે જોઈ શકશો આખી ટૂર્નામેન્ટ

Women's Premier League: ભારતમાં રમાતી વિમેન્સ પ્રીમિયર લીગ (WPL) ની પ્રથમ બે સીઝન સફળતાપૂર્વક પૂર્ણ થયા પછી, હવે ત્રીજી સિઝન આવતીકાલ એટલે કે 14 ફેબ્રુઆરીથી શરૂ થશે, જેમાં આ વખતે ટૂર્નામેન્ટની તમામ મેચ દેશના ચાર શહેરોમાં રમાશે. WPLમાં કુલ 5 ટીમો ભાગ લે છે, જેમાં પ્રથમ સિઝનમાં, આ ટૂર્નામેન્ટની ટ્રોફી હરમનપ્રીત કૌરની કેપ્ટનશિપમાં મુંબઈ ઈન્ડિયન્સની ટીમે જીતી હતી, જ્યારે બીજી એટલે કે ગઈ સિઝનમાં, સ્મૃતિ મંધાનાની કેપ્ટનશિપમાં રમી રહેલી રોયલ ચેલેન્જર્સ બેંગ્લોરની ટીમ ટાઈટલ જીતવામાં સફળ રહી હતી. આ વખતે, WPL 2025ની પહેલી મેચ 14 ફેબ્રુઆરીએ રમાશે, જ્યારે ફાઈનલ મેચ 15 માર્ચે રમાશે.

WPL 2025ની મેચ દેશના ચાર શહેરોમાં રમાશે

વિમેન્સ પ્રીમિયર લીગની મેચ દેશના ચાર શહેરોમાં રમાશે. ટૂર્નામેન્ટ વડોદરાથી શરૂ થશે, ત્યારબાદ કાફલો બેંગલુરુના એમ. ચિન્નાસ્વામી સ્ટેડિયમ પહોંચશે. આ વખતે WPLની મેચ લખનૌના એકાના સ્ટેડિયમમાં પણ રમાશે. ફાઈનલ મેચ મુંબઈના બ્રેબોર્ન સ્ટેડિયમમાં રમાશે. WPLમાં કુલ 5 ટીમો રમે છે, જેમાં ગુજરાત જાયન્ટ્સ, રોયલ ચેલેન્જર્સ બેંગ્લોર, મુંબઈ ઈન્ડિયન્સ, દિલ્હી કેપિટલ્સ અને યુપી વોરિયર્સનો સમાવેશ થાય છે. લીગ સ્ટેજ દરમિયાન, બધી ટીમોને એકબીજા સામે ઓછામાં ઓછી 2 મેચ રમવાની તક મળશે, જેમાં પોઈન્ટ ટેબલમાં પ્રથમ સ્થાને રહેતી ટીમ સીધી ફાઈનલ મેચ માટે ક્વોલિફાય થશે, જ્યારે એલિમિનેટર મેચ બીજા અને ત્રીજા સ્થાને રહેલી ટીમો વચ્ચે રમાશે.

WPL 2025 મેચનું લાઈવ ટેલિકાસ્ટ ક્યારે અને ક્યાં જોઈ શકશો?

ફેન્સ ટીવી પર સ્ટાર સ્પોર્ટ્સ નેટવર્ક પર WPL 2025ની મેચનું લાઇવ ટેલિકાસ્ટ જોઈ શકે છે. આ ઉપરાંત, મેચોનું લાઈવ સ્ટ્રીમિંગ ડિઝની પ્લસ હોટસ્ટાર એપ પર થશે. ફેન્સ ડિઝની પ્લસ હોટસ્ટાર એપમાં લોગ ઈન કરીને તેમના સ્માર્ટ ટીવી પર પણ મેચ જોઈ શકે છે. WPL 2025માં તમામ મેચ આ વખતે ભારતીય સમય મુજબ સાંજે 7:30 વાગ્યે શરૂ થશે અને ટોસ સાંજે 7:00 વાગ્યે થશે.