BCCIના આ નિયમથી ખુશ નથી વિરાટ કોહલી, કહ્યું- 'એક ખેલાડી જ્યારે મુશ્કેલ તબક્કામાંથી...'

ટીમ ઈન્ડિયાનોપૂર્વ કેપ્ટન અને સ્ટાર બેટ્સમેન વિરાટ કોહલી માને છે કે લાંબા પ્રવાસ દરમિયાન ખેલાડીઓ માટે તેમના પરિવારો તેમની સાથે હોવા મહત્ત્વપૂર્ણ છે કારણ કે તે ખેલાડીઓને મેદાન પર મુશ્કેલ સમયનો સામનો કરતી વખતે બેલેન્સ જાળવવામાં મદદ કરે છે.

કોહલીએ કહ્યું, "એક ખેલાડી જ્યારે મુશ્કેલ તબક્કામાંથી પસાર થઈ રહ્યો હોય છે ત્યારે પોતાના પરિવાર પાસે પાછા ફરવાથી તેને કેટલું સંતુલન મળે છે તે સમજાવવું ખૂબ મુશ્કેલ છે. મને નથી લાગતું કે લોકો આ કેટલું મહત્ત્વપૂર્ણ છે તે સંપૂર્ણપણે સમજે છે. પરિવારનો ક્રિકેટ પર કોઈ નિયંત્રણ નથી, છતાં પણ તેમને ચર્ચામાં લાવવામાં આવે છે અને દૂર રાખવાનું કહેવામાં આવે છે."

BCCI એ નવી માર્ગદર્શિકા જારી કરી હતી

ઓસ્ટ્રેલિયામાં તાજેતરમાં ભારતની 3-1થી ટેસ્ટ સિરીઝની હાર બાદ, BCCI એ એક નવી માર્ગદર્શિકા જારી કરી, જેમાં ખેલાડીઓ હવે પ્રવાસ દરમિયાન તેમના પરિવાર સાથે મર્યાદિત સમય વિતાવી શકશે. આ નિર્દેશ મુજબ, ફક્ત 45 દિવસથી વધુના પ્રવાસમાં, ખેલાડીઓના નજીકના પરિવારના સભ્યો પહેલા બે અઠવાડિયા પછી તેમની સાથે જોડાઈ શકે છે અને તેઓ વધુમાં વધુ 14 દિવસ રહી શકે છે. ટૂંકા પ્રવાસોમાં, ખેલાડીના પરિવારને તેની સાથે ફક્ત એક અઠવાડિયા માટે રહેવાની મંજૂરી છે.

વિરાટ કોહલીએ આ વાત કહી

કોહલીએ કહ્યું, "જો તમે કોઈપણ ખેલાડીને પૂછો કે શું તે ઈચ્છે છે કે તેનો પરિવાર હંમેશા તેની સાથે રહે, તો જવાબ હશે, હા. કોઈપણ પોતાના રૂમમાં એકલા બેસીને ઉદાસ રહેવા નથી માંગતું. અમે સામાન્ય રહેવા માંગીએ છીએ, જેથી રમતગમતને એક જવાબદારી તરીકે જોવામાં આવે. એકવાર તમે "તમારી જવાબદારી પૂર્ણ કરી લો, પછી તમે સામાન્ય જીવન જીવી શકો છો.

તેણે વધુમાં ઉમેર્યું, "એ સ્વાભાવિક છે કે તમે તમારી જવાબદારીઓ પૂર્ણ કરો, પછી ઘરે પાછા ફરો, પરિવાર સાથે સમય વિતાવો અને સામાન્ય પારિવારિક જીવન જીવો. આ મારા માટે ખરેખર ખુશીની ક્ષણ છે. હું ક્યારેય એ અનુભવ ગુમાવવા નથી માંગતો."