વિરાટ કોહલી કે રોહિત શર્મા નહીં, રિકી પોન્ટિંગની નજરમાં આ ખેલાડી તોડશે સચિન તેંડુલકરનો રેકોર્ડ

સચિન તેંડુલકરના નામે આજે પણ વિશ્વ ક્રિકેટમાં અસંખ્ય રેકોર્ડ છે, જેને તોડવા કોઈ પણ ખેલાડી માટે સરળ કામ નથી. આમાં ટેસ્ટ ક્રિકેટમાં સૌથી વધુ રન બનાવવાનો રેકોર્ડ પણ સામેલ છે. જ્યારે સચિને આંતરરાષ્ટ્રીય ક્રિકેટને અલવિદા કહ્યું ત્યારે તેના નામે 200 ટેસ્ટ મેચોમાં 53.78ની એવરેજથી 15,921 રન હતા. અત્યાર સુધી કોઈ પણ બેટ્સમેન સચિનનો આ રેકોર્ડ તોડવામાં સફળ રહ્યો નથી. આ સાથે જ ઓસ્ટ્રેલિયાના દિગ્ગજ પૂર્વ ખેલાડી રિકી પોન્ટિંગે હવે વિરાટ કોહલી કે રોહિત શર્મા નહીં પરંતુ જો રૂટનું નામ લીધું છે જે સચિનનો આ રેકોર્ડ તોડવામાં સફળ થઈ શકે છે.

રૂટ છેલ્લા કેટલાક વર્ષોમાં બેટ્સમેન તરીકે ઘણો સુધર્યો 

રિકી પોન્ટિંગે ICC રિવ્યુ પર પોતાના નિવેદનમાં કહ્યું કે, જો રૂટ એક એવો ખેલાડી છે જે સચિન તેંડુલકરના સૌથી વધુ રન બનાવવાના રેકોર્ડને તોડી શકે છે. રૂટ માત્ર 33 વર્ષનો છે અને સચિનના રેકોર્ડથી લગભગ 4000 રન પાછળ છે. હવે રુટ અહીંથી વધુ કેટલી ટેસ્ટ મેચ રમે છે તેના પર નિર્ભર રહેશે. રૂટ એક વર્ષમાં 10થી 14 ટેસ્ટ મેચ રમશે તો આગામી 3-4 વર્ષમાં તે સચિનના રેકોર્ડની નજીક આવશે અથવા તો તેને તોડી નાખશે. જો છેલ્લા કેટલાક વર્ષોમાં રૂટના પ્રદર્શન પર નજર કરીએ તો તે પહેલા કરતા ઘણો સારો થઈ ગયો છે. હવે તેની અડધી સદી પૂરી કર્યા બાદ તે તેને મોટા સ્કોરમાં ફેરવવામાં પણ સફળ થઈ રહ્યો છે.

હાલમાં રૂટ સૌથી વધુ રન બનાવવાના મામલે સાતમા સ્થાને 

ટેસ્ટ ક્રિકેટમાં સૌથી વધુ રન બનાવવાના મામલે સચિન તેંડુલકર પ્રથમ સ્થાન પર છે, જો રૂટની વાત કરીએ તો તેણે 143 ટેસ્ટ મેચ રમીને 12,027 રન બનાવ્યા છે. આ યાદીમાં તે 7મા નંબરે છે. આવી સ્થિતિમાં તેની પાસે શ્રીલંકા સામેની આગામી 3 મેચની ટેસ્ટ શ્રેણીમાં કુમાર સંગાકારા અને એલિસ્ટર કુકને પાછળ છોડવાની તક હશે. સંગાકારાએ ટેસ્ટમાં 12,400 રન બનાવ્યા છે, જ્યારે કુકના નામે 12,472 રન છે.