IND vs NZ / VCA સ્ટેડિયમમાં રમાશે ભારત-ન્યુઝીલેન્ડની પહેલી T20I, જાણો કેવી હશે આ મેદાનની પિચ

ભારત અને ન્યુઝીલેન્ડ વચ્ચે પાંચ મેચની T20I સિરીઝની પહેલી મેચ નાગપુરમાં રમાશે. ન્યુઝીલેન્ડ સામે ODI સિરીઝ હાર્યા બાદ ટીમ ઈન્ડિયા હવે T20I સિરીઝ જીતીને બદલો લેવા માંગશે. સૂર્યકુમાર યાદવની કેપ્ટનશિપ હેઠળની ભારતીય ટીમ અને મિચેલ સેન્ટનરની કેપ્ટનશિપ હેઠળની ન્યુઝીલેન્ડ ટીમની T20 વર્લ્ડ કપ 2026 પહેલા આ છેલ્લી પરીક્ષા હશે અને બંને ટીમો પાસ થવાનું લક્ષ્ય રાખશે.

ભારત અને ન્યુઝીલેન્ડ T20I મેચોમાં 25 વખત ટકરાયા છે, જેમાં ટીમ ઈન્ડિયા 12 મેચ જીતી છે અને ન્યુઝીલેન્ડ 10 મેચ જીતી છે. જ્યારે ણ મેચ ટાઈ રહી હતી. બંને ટીમો વચ્ચેની પહેલી T20I મેચ 16 સપ્ટેમ્બર, 2007ના રોજ જોહાનિસબર્ગમાં રમાઈ હતી, જ્યાં કિવીઓએ 10 રનથી જીત મેળવી હતી. બંને ટીમો વચ્ચે છેલ્લી T20I મેચ 1 ફેબ્રુઆરી, 2023ના રોજ અમદાવાદમાં રમાઈ હતી, જેમાં ટીમ ઈન્ડિયાએ 168 રનથી જીત મેળવી હતી.

આંકડા મુજબ T20Iમાં ભારત ન્યુઝીલેન્ડથી આગળ છે. તો, મેચ પહેલા ચાલો જાણીએ કે ભારત અને ન્યુઝીલેન્ડ વચ્ચેની પ્રથમ T20 મેચ માટે નાગપુરના VCA સ્ટેડિયમની પિચ કેવી રહેશે.

નાગપુરની પિચ કેવી હશે?

વિદર્ભ ક્રિકેટ એસોસિએશન (VCA) સ્ટેડિયમ ભારત અને ન્યુઝીલેન્ડ વચ્ચેની પ્રથમ T20I મેચનું આયોજન કરવા માટે તૈયાર છે, જે 21 જાન્યુઆરી, 2026ના રોજ નાગપુરના જામથા સ્થિત તેના આંતરરાષ્ટ્રીય સ્ટેડિયમમાં રમાશે. અહીં ભારત અને ન્યુઝીલેન્ડ વચ્ચે રમાનારી આ પ્રથમ દ્વિપક્ષીય T20 મેચ હશે. જામથામાં ભારત અને ન્યુઝીલેન્ડ વચ્ચે છેલ્લી T20 મેચ 2016માં ICC T20 વર્લ્ડ કપ દરમિયાન રમાઈ હતી.

નાગપુરમાં વિદર્ભ ક્રિકેટ એસોસિએશનની પિચ સામાન્ય રીતે સ્પિનર્સ માટે યોગ્ય માનવામાં આવે છે. સમાન ઉછાળવાળી પિચ પર શરૂઆતમાં સારો બાઉન્સ મળે છે, જેનાથી બેટ્સમેન રન બનાવી શકે છે. જેમ જેમ રમત આગળ વધે છે, તેમ તેમ તે સ્પિનર્સ માટે વધુ અનુકૂળ બને છે. જે ટીમો વચ્ચેની ઓવર્સમાં સારો સ્કોર કરે છે તેમને આનો ફાયદો થાય છે, પરંતુ T20માં આ પિચ ધીમી પણ જોવા મળી છે.

આંકડા શું કહે છે?

વિદર્ભ ક્રિકેટ એસોસિએશન સ્ટેડિયમમાં અત્યાર સુધીમાં કુલ 13 T20I મેચ રમાઈ છે. ભારતે અહીં રમેલી પાંચ મેચમાંથી ત્રણ જીતી છે, જ્યારે 2 હારી ગયું છે. આ મેદાન પર ન્યુઝીલેન્ડની એકમાત્ર જીત 2016માં થઈ હતી. આ મેચ 2016 વર્લ્ડ કપ સુપર 10ની ગ્રુપ 2 મેચ હતી, જેમાં કિવીઝે ભારતને 47 રનથી હરાવ્યું હતું. મિચેલ સેન્ટનરને તેની 4 ઓવરમાં 11 રન આપીને 4 વિકેટ લેવા બદલ 'પ્લેયર ઓફ ધ મેચ' નો એવોર્ડ આપવામાં આવ્યો હતો.

T20I સિરીઝ માટે ભારત અને ન્યુઝીલેન્ડની ટીમો

ભારત: સૂર્યકુમાર યાદવ (કેપ્ટન), અભિષેક શર્મા, સંજુ સેમસન (વિકેટકીપર), શ્રેયસ અય્યર (પ્રથમ ત્રણ મેચ), હાર્દિક પંડ્યા, શિવમ દુબે, અક્ષર પટેલ (વાઈસ-કેપ્ટન), રિંકુ સિંહ, જસપ્રીત બુમરાહ, હર્ષિત રાણા, અર્શદીપ સિંહ, કુલદીપ યાદવ, વરુણ ચક્રવર્તી, ઈશાન કિશન (વિકેટકીપર), રવિ બિશ્નોઈ.

ન્યુઝીલેન્ડ: મિચેલ સેન્ટનર (કેપ્ટન), માઈકલ બ્રેસવેલ, માર્ક ચેપમેન, ડેવોન કોનવે (વિકેટકીપર), જેકબ ડફી, જેક ફાઉલકસ, મેટ હેનરી, કાઈલ જેમીસન, બેવન જેકબ્સ, રચિન રવિન્દ્ર, ટિમ રોબિન્સન, ડેરિલ મિચેલ, જેમ્સ નીશમ, ગ્લેન ફિલિપ્સ, ઈશ સોઢી.