Paris Paralympics 2024: 10મા દિવસે ભારતે સિલ્વર-બ્રોન્ઝ મેડલ કબજે કર્યો, નવદીપ અને સિમરન શર્માએ કર્યું કમાલ

સિમરન શર્માએ પેરિસ પેરાલિમ્પિક્સના 10મા દિવસે ભારતને પહેલો મેડલ જીતાડ્યો. ત્યારબાદ નવદીપે ભારત માટે દિવસનો બીજો મેડલ જીત્યો. સિમરન શર્માએ પેરા એથ્લેટિક્સની મહિલાઓની 200 મીટર T12માં બ્રોન્ઝ કબજે કર્યો હતો. સિમરને 24.75 સેકન્ડમાં રેસ પૂરી કરી હતી, જે તેની વ્યક્તિગત સર્વશ્રેષ્ઠ હતી. મેન્સ જેવલિન થ્રો એફ41 ઈવેન્ટમાં સિલ્વર જીતનાર નવદીપે 47.32 મીટર થ્રો કર્યો જે તેનો વ્યક્તિગત સર્વશ્રેષ્ઠ હતો.

ઉલ્લેખનીય છે કે, સિમરન શર્માએ ભારતને પેરિસ પેરાલિમ્પિક્સનો 28મો અને નવદીપને 29મો મેડલ મળ્યો હતો. મહિલાઓની 200 મીટર T12 ઈવેન્ટમાં ક્યુબાની ઓમારા દુરાન્ડે 23.62 સેકન્ડમાં રેસ પૂરી કરીને ગોલ્ડ મેડલ જીત્યો હતો. આ ઈવેન્ટમાં વેનેઝુએલાની અલેજાન્દ્રા પેરેઝે બીજા સ્થાને રહીને સિલ્વર જીત્યો હતો. એલેજાન્ડ્રા પેરેઝે 24.19 સેકન્ડમાં રેસ પૂરી કરી હતી. તો પુરૂષોની જેવલિન થ્રો F41 ઈવેન્ટમાં ઈરાનના સાદેગ બીત સયાહે ગોલ્ડ મેડલ જીત્યો, જેણે 47.46 મીટરનો થ્રો કરીને પેરાલિમ્પિક રેકોર્ડ બનાવ્યો. આ જ ઈવેન્ટમાં ચીનના સુન પેંગઝિયાંગે 44.72 મીટરનો થ્રો કરીને બ્રોન્ઝ મેડલ જીત્યો હતો.

મેડલ ટેલીમાં 18મા સ્થાને પહોંચ્યું ભારત

કુલ 29 મેડલ જીત્યા બાદ ભારત મેડલ ટેલીમાં 18મા સ્થાને પહોંચી ગયું છે. અત્યાર સુધી પેરિસ પેરાલિમ્પિકમાં ભારત તરફથી શાનદાર પ્રદર્શન જોવા મળ્યું છે. ભારતે 6 ગોલ્ડ, 10 સિલ્વર અને 13 બ્રોન્ઝ મેડલ જીત્યા છે. કોઈપણ પેરાલિમ્પિકમાં ભારત માટે આ સૌથી વધુ મેડલ છે.

30 મેડલનો અંક બહુ દૂર નથી

ભારતનો 30મો મેડલ બહુ દૂર નથી. 10મા દિવસે, દિલીપ ગાવિત પુરુષોની 400 મીટર T47ની ફાઇનલમાં ભારત માટે મેદાનમાં ઉતરશે. દિલીપ પાસેથી ગોલ્ડ મેડલની અપેક્ષા છે. ભારતીય સમય અનુસાર આ મેચ રવિવાર, 08 સપ્ટેમ્બરે સવારે 12:30 કલાકે રમાવાની છે. હવે એ જોવાનું રસપ્રદ રહેશે કે, ગાવિત મેડલ જીતીને ભારતને 30મો મેડલ અપાવશે કે નહીં.