ભારતીય હોકી ટીમ પર થશે આટલા કરોડનો વરસાદ, ઓડિશા સરકારે કરી બમ્પર જાહેરાત

ભારતીય હોકી ટીમે પેરિસ ઓલિમ્પિક 2024માં બ્રોન્ઝ મેડલ જીત્યો છે. ટીમની ઐતિહાસિક જીત બાદ ખેલાડીઓ પર ભેટોનો વરસાદ થવા લાગ્યો છે. હવે ઓડિશાના મુખ્યમંત્રી મોહન ચરણ માઝીએ ટીમ ઈન્ડિયા પર પૈસાનો વરસાદ કરવાની જાહેરાત કરી છે. પરંતુ ભારતીય ટીમના ડિફેન્ડર અમિત રોહિદાસને ઓડિશા સરકાર તરફથી સૌથી વધુ રકમ મળશે. અમિત રોહિદાસને લાખોમાં નહીં પણ કરોડોમાં રકમ આપવાનું વચન આપવામાં આવ્યું છે.

અમિત રોહિદાસને મળશે 4 કરોડ

ઈનામી રકમની જાહેરાત કરતા ઓડિશાના મુખ્યમંત્રી મોહન ચરણ માઝીએ કહ્યું છે, ભારતીય ટીમના ડિફેન્ડર અમિત રોહિદાસ, જે ઓડિશાથી આવે છે, તેને 4 કરોડ રૂપિયાની ઈનામી રકમ આપવામાં આવશે. તેણે એ પણ જણાવ્યું કે ટીમના બાકી રહેલા દરેક ખેલાડીને 15 લાખ રૂપિયા આપવામાં આવશે, જ્યારે સપોર્ટ સ્ટાફના દરેક સભ્યને 10 લાખ રૂપિયા આપવામાં આવશે.

અમિત રોહિદાસનો જન્મ ઓડિશાના સુંદરગઢ જિલ્લામાં થયો હતો અને તે 2013થી ભારતીય વરિષ્ઠ હોકી ટીમ માટે ડિફેન્ડર તરીકે રમી રહ્યો છે. અમિત 2020 ટોક્યો ઓલિમ્પિકમાં બ્રોન્ઝ મેડલ વિજેતા ભારતીય ટીમનો પણ એક ભાગ હતો. અમિત વ્યવસાયે ડિફેન્ડર છે, પરંતુ તેણે તેની કારકિર્દીમાં 184 મેચ રમીને 28 ગોલ પણ કર્યા છે.

રેડ કાર્ડ મળવાના કારણે આવ્યો હતો ચર્ચામાં

અમિત રોહિદાસ એ જ ખેલાડી છે જેને પેરિસ ઓલિમ્પિક 2024ની ક્વાર્ટર ફાઈનલ મેચમાં રેડ કાર્ડ બતાવવામાં આવ્યું હતું. વાસ્તવમાં, ક્વાર્ટર ફાઇનલમાં ભારતનો સામનો ગ્રેટ બ્રિટન સામે થયો હતો, જેમાં ભારતીય ટીમે પેનલ્ટી શૂટઆઉટમાં 4-2થી જીત મેળવી હતી અને સેમિફાઇનલમાં જગ્યા બનાવી હતી. પરંતુ જ્યારે ક્વાર્ટર ફાઈનલ મેચ ચાલી રહી હતી ત્યારે બોલને ફટકારવાનો પ્રયાસ કરતી વખતે અમિત રોહિદાસની હોકી સ્ટિકનો પાછળનો ભાગ ગ્રેટ બ્રિટનના ખેલાડીના ચહેરા પર વાગી ગયો હતો. જેના આધારે અમિતને આખી મેચમાંથી બહાર બેસવું પડ્યું હતું.