IND vs NZ / આઉટ હતો કેએલ રાહુલ, પરંતુ કેપ્ટન અને અમ્પાયર તરફથી ન મળ્યો સપોર્ટ; ગુસ્સે થયો મેટ હેનરી

ભારત અને ન્યુઝીલેન્ડ વચ્ચેની પ્રથમ ટેસ્ટના બીજા દિવસે ટીમ ઈન્ડિયાના ઓપનર કેએલ રાહુલની ઈનિંગ સસ્તામાં સમાપ્ત થઈ ગઈ હોત, પરંતુ અમ્પાયરે શરૂઆતમાં બોલરને ટેકો નહતો આપ્યો અને પછી કેપ્ટને DRS નહતો લીધો. જ્યારે રિપ્લે જોવામાં આવ્યું, ત્યારે ખબર પડી કે રાહુલ આઉટ હતો. ગુસ્સે ભરાયેલા મેટ હેનરીએ પોતાની હતાશા વ્યક્ત કરવા માટે મેદાન પર પોતાનું સ્વેટર ફેંકી દીધું.
ટીમ ઈન્ડિયાની ઈનિંગની સાતમી ઓવરમાં બની ઘટના
આ ઘટના મેચની સાતમી ઓવર દરમિયાન બની હતી. ફાસ્ટ બોલર મેટ હેનરી સાતમી ઓવર ફેંકી રહ્યો હતો. ઓવરનો ચોથો બોલ રાહુલના પેડ પર લાગ્યો. આ દરમિયાન બે અવાજો સંભળાયા. મેટ હેનરીએ આઉટ માટે અપીલ કરી. હેનરી માનતો હતો કે રાહુલ આઉટ છે અને તેની મજબૂત અપીલ પણ આ કહી રહી હતી, પરંતુ અમ્પાયર કુમાર ધર્મસેનાએ તેને નકારી કાઢી. થોડા સમય માટે કેપ્ટન ટોમ લેથમ સાથે DRS લેવા અંગે ચર્ચા થઈ. થોડીવાર પહેલા રિવ્યુ ગુમાવ્યા બાદ કેપ્ટને તે લેવાનો ઇનકાર કર્યો. જ્યારે રિપ્લે જોવામાં આવ્યું ત્યારે એવું લાગતું હતું કે બોલ ઇનલાઇન હતો અને ત્યારબાદ મિડલ સ્ટમ્પ પર વાગ્યો હતો. ત્રણ લાલ રેખાઓ સ્પષ્ટ દેખાતી હતી. આનો અર્થ એ થયો કે જો DRS લેવામાં આવ્યો હોત, તો રાહુલ આઉટ થઈને પવેલિયન પાછો ફર્યો હોત.
રાહુલ ફક્ત પાંચ રન પર રમી રહ્યો હતો
જ્યારે આ બધું બન્યું, ત્યારે રાહુલ ફક્ત પાંચ રન પર રમી રહ્યો હતો. જ્યારે મેદાનમાં મોટી સ્ક્રીન પર રિપ્લે બતાવવામાં આવ્યો, ત્યારે મેટ હેનરીએ પણ તે જોયો અને ગુસ્સે થયો. ગુસ્સામાં તેણે પોતાનું સ્વેટર પણ જમીન પર ફેંકી દીધું, જે સ્પષ્ટપણે તેની હતાશા દર્શાવે છે. જોકે, આ પછી રાહુલ અને જયસ્વાલે વધુ સાવધાનીપૂર્વક રમવાનું શરૂ કર્યું અને ન્યુઝીલેન્ડને વિકેટ લેવાની કોઈ તક ન આપી.
ભારત સામે ન્યુઝીલેન્ડનો મોટો સ્કોર
જોકે મેચમાં ભારતની શરૂઆત સારી નહતી, ટીમે પ્રથમ ચાર ઓવરમાં એક પણ રન નહતો બનાવ્યો. જયસ્વાલે પાંચમી ઓવરમાં ચોગ્ગો ફટકારીને પોતાનું અને ટીમનું ખાતું ખોલ્યું. આ પછી પણ બંને બેટ્સમેનોએ થોડા સમય માટે સંઘર્ષ કર્યો. પહેલા બેટિંગ કરતા ન્યુઝીલેન્ડે 368 રનનો જબરદસ્ત સ્કોર બનાવ્યો. આ મેચ જીતવા માટે ભારતે સારી બેટિંગ કરવી પડશે. આજે ફક્ત બીજો દિવસ છે, તેથી આગામી ત્રણ દિવસમાં કઈ ટીમ જીતશે તે આગાહી કરવી મુશ્કેલ છે.









