ઓડિશાના ગોપાલપુર કિનારા નજીક ત્રાટક્યું 'અકવાન' વાવાઝોડું, આંધ્રમાં રેડ એલર્ટ, અનેક રાજ્યોમાં ભારે વરસાદની આગાહી

બંગાળની ખાડીમાં સર્જાયેલું ભીષણ ચક્રવાતી તોફાન 'અકવાન' આજે સવારે ઓડિશાના ગોપાલપુર કિનારા નજીક ત્રાટક્યું છે. ભારતીય હવામાન વિભાગ (IMD) ના જણાવ્યા પ્રમાણે, વાવાઝોડાના લેન્ડફોલની પ્રક્રિયા શરૂ થઈ ગઈ છે અને બપોર સુધીમાં તે નરસાપુર અને પુરી વચ્ચે ખાસ કરીને ઉત્તર આંધ્ર પ્રદેશ, યનમ અને દક્ષિણ ઓડિશાના દરિયાકાંઠે ભારે તબાહી મચાવે તેવી શક્યતા છે. ઈરાન દ્વારા સૂચવવામાં આવેલા આ 'અકવાન' વાવાઝોડાને કારણે 90થી 100 કિમી પ્રતિ કલાકની ઝડપે પવન ફૂંકાઈ રહ્યો છે.
ઓડિશામાં 'ઝીરો ડેથ' મિશન: ત્રણ લાખ લોકોનું સ્થળાંતર
વાવાઝોડાની ગંભીરતાને ધ્યાનમાં રાખીને ઓડિશા સરકારે 'ઝીરો ડેથ' ના લક્ષ્ય સાથે યુદ્ધના ધોરણે બચાવ કામગીરી હાથ ધરી છે. વિશેષ રાહત કમિશનર (SRC) ના જણાવ્યા પ્રમાણે, સંવેદનશીલ વિસ્તારોમાંથી અત્યાર સુધીમાં 2,98,676 એટલે કે અંદાજે ત્રણ લાખ લોકોને સુરક્ષિત સ્થળોએ ખસેડવામાં આવ્યા છે, જેમાં 4,000થી વધુ ગર્ભવતી મહિલાઓનો પણ સમાવેશ થાય છે. રાહત શિબિરોમાં આશરો લેનારા લોકો અને બાળકો માટે રાંધેલું ભોજન, પીવાનું શુદ્ધ પાણી, જરૂરી દવાઓ અને સેનિટરી નેપકિન સહિતની તમામ પ્રાથમિક સુવિધાઓ પૂરી પાડવામાં આવી રહી છે.
941 સ્થળોએ ભૂસ્ખલનનો ખતરો, તંત્ર એલર્ટ
ઓડિશાના આપત્તિ વ્યવસ્થાપન મંત્રીએ ચિંતા વ્યક્ત કરતાં જણાવ્યું કે, ચક્રવાત દરમિયાન ભૂસ્ખલન એક મોટો પડકાર બનીને સામે આવ્યું છે. તંત્ર દ્વારા ગંજામ, ગજપતિ, કંધમાલ, કોરાપુટ અને મલકાનગિરી એમ પાંચ જિલ્લાઓમાં ભૂસ્ખલનની આશંકા ધરાવતા 941 સંવેદનશીલ સ્થળોની ઓળખ કરવામાં આવી છે, જેમાંથી સૌથી વધુ 211 સ્થળો ગજપતિ જિલ્લામાં છે. અગાઉ 'અર્નબ' વાવાઝોડા વખતે ભૂસ્ખલનની ઘટનાઓમાં 10 લોકોના મોત થયા હતા, જેનું પુનરાવર્તન ન થાય તે માટે ખાસ તકેદારી રાખવામાં આવી રહી છે.
NDRF સહિત 423 બચાવ દળો તૈનાત
રાહત અને બચાવ કામગીરી માટે કેન્દ્ર અને રાજ્ય સરકારની એજન્સીઓ સંપૂર્ણ સજ્જ છે. ઓડિશાના મુખ્ય સચિવે માહિતી આપી હતી કે, રાજ્યમાં ઓડિશા ડિઝાસ્ટર રેપિડ એક્શન ફોર્સ (ODRAF) ની 60 ટીમો, NDRFની 14 ટીમો અને ફાયર બ્રિગેડ તથા ઈમરજન્સી સેવાની 131 ટીમો સહિત કુલ 423 બચાવ દળો તૈનાત કરાયા છે. આ ઉપરાંત, દેશના પાંચ રાજ્યો અને એક કેન્દ્રશાસિત પ્રદેશમાં NDRFની કુલ 31 ટીમો તૈનાત છે અને 18 વધારાની ટીમોને રિઝર્વ રાખવામાં આવી છે. ભારતીય તટરક્ષક દળ (કોસ્ટ ગાર્ડ) ને પણ પોતાના હેલિકોપ્ટર અને જહાજો તૈયાર રાખવા વિનંતી કરવામાં આવી છે.
આંધ્રમાં રેડ એલર્ટ, અનેક રાજ્યોમાં ભારે વરસાદની આગાહી
વાવાઝોડાની અસરને પગલે હવામાન વિભાગે આંધ્ર પ્રદેશના શ્રીકાકુલમ અને વિજયનગરમ જિલ્લામાં રેડ એલર્ટ, જ્યારે પાર્વતીપુરમ મન્યમ, અલ્લૂરી સીતારામ રાજૂ અને અનકાપલ્લી જિલ્લામાં ઓરેન્જ એલર્ટ તથા કાકીનાડામાં યલો એલર્ટ જાહેર કર્યું છે. આગામી 24 કલાકમાં આ વિસ્તારોમાં અતિભારે વરસાદ પડી શકે છે. આ ઉપરાંત, ઓડિશા, તટીય આંધ્ર પ્રદેશ, ગંગાના મેદાની પશ્ચિમ બંગાળ, ઝારખંડ, છત્તીસગઢ તેમજ પૂર્વોત્તરના રાજ્યો આસામ, મેઘાલય, નાગાલેન્ડ, મણિપુર, મિઝોરમ અને ત્રિપુરામાં પણ ભારે વરસાદ અને તેજ પવન ફૂંકાવાની આગાહી કરવામાં આવી છે.
રેલવે સેવા ખોરવાઈ, પુરીમાં ગુંડિચા મંદિર બંધ
ચક્રવાતી તોફાનના પગલે સાવચેતીના ભાગરૂપે રેલવે તંત્ર દ્વારા મોટો નિર્ણય લેવાયો છે. ઈસ્ટ કોસ્ટ રેલવેએ 41 ટ્રેનો રદ્દ કરી છે અને 29 ટ્રેનોના સમયમાં ફેરફાર કર્યો છે, જ્યારે સાઉથ ઈસ્ટર્ન રેલવેએ 28 એક્સપ્રેસ ટ્રેનો રદ્દ કરતાં કુલ 69 ટ્રેનોના પૈડાં થંભી ગયા છે. બીજી તરફ, પુરી સ્થિત જગન્નાથ મંદિર પ્રશાસને શ્રદ્ધાળુઓને હવામાનની સ્થિતિ જોઈને જ યાત્રાનું આયોજન કરવા અપીલ કરી છે. જોકે જગન્નાથ મંદિરમાં નિત્ય પૂજા-અર્ચના રાબેતા મુજબ ચાલુ રહેશે, પરંતુ સુરક્ષાના કારણોસર પુરીનું ગુંડિચા મંદિર 19થી 21 નવેમ્બર સુધી ભક્તો માટે બંધ રાખવાનો નિર્ણય લેવામાં આવ્યો છે.












