જસપ્રીત બુમરાહે પોતાના બેડ રેસ્ટના સમાચાર પર મૌન તોડ્યું, પોસ્ટ કરીને લખ્યું- 'હસવું આવે છે'

ઓસ્ટ્રેલિયા પ્રવાસ દરમિયાન સિડની ગ્રાઉન્ડ પર રમાયેલી સિડની ટેસ્ટ મેચમાં ટીમ ઈન્ડિયાના ફાસ્ટ બોલર જસપ્રીત બુમરાહને પહેલી ઈનિંગમાં બોલિંગ કરતી વખતે પીઠમાં સમસ્યા થઈ ગઈ હતી, જેના કારણે તે વધુ બોલિંગ નહતો કરી શક્યો. આ પછી, બધા ફેન્સ તેની ફિટનેસ પર નજર રાખી રહ્યા છે અને અત્યાર સુધી BCCI દ્વારા તે ક્યારે મેદાનમાં પાછો ફરી શકશે તે અંગે કોઈ અપડેટ નથી આપવામાં આવ્યું. બધાની નજર તેના પર છે કે બુમરાહ આગામી ચેમ્પિયન્સ ટ્રોફી 2025માં રમી શકશે કે નહીં. દરમિયાન, બુમરાહે પણ પોતાની ઈજા અંગે સામે આવેલા કેટલાક ખોટા સમાચારો પર પ્રતિક્રિયા આપી છે.

આ પણ વાંચો: Champions Trophy 2025: ભારત-પાકિસ્તાન મેચની ટિકિટ કેટલી મોંઘી? અહીં જાણો કિંમત

'આવા સમાચાર વાંચીને હસવું આવે છે'

જસપ્રીત બુમરાહ વિશે ઘણા એવા અહેવાલો બહાર આવ્યા હતા કે તેને બેડ રેસ્ટની સલાહ આપવામાં આવી છે, જેના સંદર્ભમાં બુમરાહએ હવે સોશિયલ મીડિયા પ્લેટફોર્મ X પર પોસ્ટ કરી છે અને લખ્યું છે કે, 'મને ખબર છે કે ખોટા સમાચાર ઝડપથી ફેલાય છે, પરંતુ આ વાંચીને મને હસવું આવે છે. આ સૂત્ર વિશ્વસનીય નથી.' તમને જણાવી દઈએ કે બુમરાહની ઈજા અંગે હજુ સુધી BCCI તરફથી કોઈ સત્તાવાર નિવેદન નથી આવ્યું, આવી સ્થિતિમાં તે ચેમ્પિયન્સ ટ્રોફીમાં રમશે કે નહીં તે સત્તાવાર નિવેદન આવ્યા પછી અથવા ટૂર્નામેન્ટ માટે ટીમની જાહેરાત થયા પછી જ નક્કી કરવામાં આવશે. જેના પર બધા ફેન્સની નજર ટકેલી છે.

X પર જુઓ

બુમરાહનું ફોર્મ આ સમયે ઘણું સારું છે

ઓસ્ટ્રેલિયા સામેની 5 મેચની ટેસ્ટ સિરીઝમાં જસપ્રીત બુમરાહનું બોલ સાથે અદ્ભુત પ્રદર્શન જોવા મળ્યું હતું, ઓસ્ટ્રેલિયન બેટ્સમેન સમગ્ર સિરીઝ દરમિયાન તેની સામે સંઘર્ષ કરતા જોવા મળ્યા હતા, આવી સ્થિતિમાં તેનું વર્તમાન ફોર્મ ઘણું સારું છે. બુમરાહ ટીમ ઈન્ડિયાનો આગામી ટેસ્ટ કેપ્ટન બનવાની રેસમાં પણ આગળ છે. તેણે ઓસ્ટ્રેલિયા પ્રવાસ દરમિયાન પર્થ અને સિડનીમાં રમાયેલી મેચોમાં ટીમની કેપ્ટનશિપની જવાબદારી પણ સંભાળી હતી.