AUS-W vs IND-W / ઓસ્ટ્રેલિયા પ્રવાસ પર ટીમ ઈન્ડિયાની ધમાકેદાર શરૂઆત, પ્રથમ T20Iમાં કાંગારૂઓને હરાવ્યા
છેલ્લું અપડેટ : 15 Feb 2026
ભારત અને ઓસ્ટ્રેલિયા વચ્ચે ત્રણ મેચની વિમેન્સ T20I સિરીઝની પહેલી મેચ રવિવાર, 15 ફેબ્રુઆરીના રોજ રમાઈ હતી. સિડની ક્રિકેટ ગ્રાઉન્ડ (SCG) ખાતે રમાયેલી આ મેચમાં ભારતે DLS હેઠળ 21 રનથી જીત મેળવી છે. ભારતને જીતવા માટે 134 રનનો ટાર્ગેટ મળ્યો હતો.
ટાર્ગેટ ચેઝ કરતા ભારતે 5.1 ઓવરમાં 1 વિકેટે 50 રન બનાવ્યા, પરંતુ ત્યારબાદ વરસાદને કારણે રમત રદ્દ કરવામાં આવી અને ટીમ ઈન્ડિયાને વિજેતા જાહેર કરવામાં આવી. T20I સિરીઝની બીજી મેચ 19 ફેબ્રુઆરીએ કેનબેરામાં રમાશે.
ભારત માટે રન ચેઝમાં ઓપનર શેફાલી વર્માએ માત્ર 11 બોલમાં 21 રન બનાવ્યા, જેમાં બે છગ્ગા અને એક ચોગ્ગાનો સમાવેશ થાય છે. ઓપનર સ્મૃતિ મંધાનાએ 17 બોલમાં અણનમ 16 રનનું યોગદાન આપ્યું, જેમાં બે ચોગ્ગાનો સમાવેશ થાય છે. જેમિમા રોડ્રિગ્સે માત્ર 3 બોલમાં અણનમ 9 રન બનાવ્યા, જેમાં બે ચોગ્ગાનો સમાવેશ થાય છે.
અરુંધતી રેડ્ડીની ઘાતક બોલિંગ
ટોસ હારીને પ્રથમ બેટિંગ કરતા ઓસ્ટ્રેલિયા 18 ઓવરમાં 133 રનમાં ઓલઆઉટ થઈ ગયું. જ્યોર્જિયા વેરહેમે 19 બોલમાં 4 ચોગ્ગા સાથે સૌથી વધુ 30 રન બનાવ્યા. જ્યારે ફોબી લિચફિલ્ડે 19 બોલમાં 5 ચોગ્ગા સાથે 26 રન બનાવ્યા હતા. એલિસ પેરી (20 રન), જ્યોર્જિયા વોલ (18 રન) અને નિકોલા કેરી (14 રન) પણ બે આંકડાના સ્કોર સુધી પહોંચવામાં સફળ રહી હતી.
ભારત તરફથી ફાસ્ટ બોલર અરુંધતી રેડ્ડીએ સૌથી વધુ 4 વિકેટ લીધી હતી. સ્પિનર શ્રી ચરણી અને ફાસ્ટ બોલર રેણુકા સિંહ ઠાકુરે 2-2 વિકેટ લીધી હતી. ઓલરાઉન્ડર દીપ્તિ શર્મા અને ફાસ્ટ બોલર ક્રાંતિ ગૌડે પણ 1-1 વિકેટ લીધી હતી.
ભારતના ઓસ્ટ્રેલિયા પ્રવાસનું શેડ્યૂલ
- 15 ફેબ્રુઆરી: પહેલી T20I, સિડની, ભારત ૨૧ રને જીત્યું
- 19 ફેબ્રુઆરી: બીજી T20I, કેનબેરા
- 21 ફેબ્રુઆરી: ત્રીજી T20I, એડિલેડ
- 24 ફેબ્રુઆરી: પહેલી ODI, બ્રિસ્બેન
- 27 ફેબ્રુઆરી: બીજી ODI, હોબાર્ટ
- 1 માર્ચ: ત્રીજી ODI, હોબાર્ટ
- ટેસ્ટ મેચ: 6 માર્ચથી, પર્થ
