Asian Champions Trophy 2026 / કેપ્ટન હરમનપ્રીતની હેટ્રિકની મદદથી ભારતે મલેશિયાને 4-2થી હરાવ્યું

ભારતીય હોકી ટીમના કેપ્ટન હરમનપ્રીત સિંહે શાનદાર હેટ્રિક ફટકારીને પોતાની ગોલ કરવાની લય જાળવી રાખી હતી. તેના દમદાર પ્રદર્શનના આધારે પાંચ વખતની ચેમ્પિયન ભારતીય ટીમે રવિવારે એશિયન ચેમ્પિયન્સ ટ્રોફી હોકી ટુર્નામેન્ટમાં મલેશિયાને 4-2થી હરાવ્યું હતું. આ સાથે ભારતે સતત ચોથી જીત નોંધાવી હતી.

આ મુકાબલો તાજેતરમાં જાપાનમાં રમાયેલી એશિયન ગેમ્સની ગોલ્ડ મેડલ ટક્કરનો રીમેચ હતો, જેમાં ભારતે મલેશિયાને 5-1થી હરાવીને ગોલ્ડ મેડલ જીત્યો હતો. ભારતે ટુર્નામેન્ટની પ્રથમ ત્રણ મેચમાં બાંગ્લાદેશને 13-0થી, ચીનને 5-2થી અને જાપાનને 4-1થી હરાવ્યું હતું.

ભારત અને મલેશિયા બંને છ ટીમોની આ ટુર્નામેન્ટની સેમીફાઈનલમાં પોતાનું સ્થાન પહેલેથી જ નિશ્ચિત કરી ચૂક્યા છે. સાઉથ કોરિયા અને જાપાને પણ સેમીફાઈનલમાં પ્રવેશ મેળવી લીધો છે.

ભારત સોમવારે પોતાની છેલ્લી રાઉન્ડ રોબિન મેચમાં સાઉથ કોરિયા સામે રમશે, જ્યારે મલેશિયાનો મુકાબલો જાપાન સામે થશે.

રવિવારે રમાયેલી મેચમાં હરમનપ્રીત સિંહે ત્રીજી, 33મી અને 58મી મિનિટે ગોલ કરીને હેટ્રિક પૂરી કરી હતી. તેણે બે પેનલ્ટી કોર્નરને ગોલમાં ફેરવ્યા હતા અને એક ગોલ પેનલ્ટી સ્ટ્રોક દ્વારા કર્યો હતો. ભારતીય ફોરવર્ડ સુખજીત સિંહે 43મી મિનિટે મેદાની ગોલ નોંધાવ્યો હતો.

મલેશિયા તરફથી અખિમુલ્લાહ અનૌરે 25મી મિનિટે અને શેલો સિલ્વેરિયસે 60મી મિનિટે ગોલ કર્યા હતા.

ભારતીય ટીમે મેચની શરૂઆત શાનદાર અંદાજમાં કરી હતી. કેપ્ટન હરમનપ્રીત સિંહે ભારતને પ્રથમ પેનલ્ટી કોર્નર મળતાં જ જોરદાર ફ્લિક વડે ગોલ કર્યો હતો. તેનો શોટ મલેશિયાના ગોલકીપર હાફિઝુદ્દીન ઓથમાનની ડાબી બાજુથી ગોલપોસ્ટમાં પહોંચ્યો હતો. આ સાથે ભારતે શરૂઆતમાં જ લીડ મેળવી લીધી હતી.

ભારતીય ખેલાડીઓએ મલેશિયાના ડિફેન્સ પર સતત દબાણ જાળવી રાખ્યું હતું અને અનેક વખત સર્કલમાં પ્રવેશ કર્યો હતો. જોકે, તેઓ આ તકોને ગોલમાં ફેરવવામાં સફળ રહ્યા નહતા.

બીજા ક્વાર્ટરમાં મલેશિયાએ આક્રમક રમત બતાવી હતી. આ દરમિયાન 18મી મિનિટે તેને સતત બે પેનલ્ટી કોર્નર મળ્યા હતા, પરંતુ ભારતીય ડિફેન્સે મજબૂતીથી તેનો સામનો કર્યો હતો.

ત્યારબાદ ભારતને પણ સતત બે પેનલ્ટી કોર્નર મળ્યા હતા. જોકે, મલેશિયાના ગોલકીપર ઓથમાને હરમનપ્રીતના બંને પ્રયાસોને નિષ્ફળ બનાવી દીધા હતા.

મલેશિયાએ ભારતીય ડિફેન્સ પર દબાણ ચાલુ રાખ્યું હતું અને 24મી મિનિટે સતત ત્રણ પેનલ્ટી કોર્નર મેળવ્યા હતા. જોકે, ભારતીય ખેલાડીઓએ મજબૂત ડિફેન્સ કરીને પોતાની લીડ જાળવી રાખી હતી.

પરંતુ એક મિનિટ બાદ જ ભારતીય ડિફેન્સમાં ખામી જોવા મળી હતી. ફૈઝ જલીના પાસ પર અખિમુલ્લાહ અનૌરે ડી-એરિયાની અંદર છૂટેલા બોલનો ફાયદો ઉઠાવીને ગોલ કર્યો હતો. આ સાથે સ્કોર 1-1થી બરાબર થયો હતો અને બંને ટીમો હાફ ટાઇમ સુધી આ જ સ્કોર પર રહી હતી.

બીજા હાફમાં ભારતીય ખેલાડીઓ વધુ આક્રમક ઈરાદા સાથે મેદાનમાં ઉતર્યા હતા. ત્રીજી મિનિટે જ ભારતને પોતાનો ચોથો પેનલ્ટી કોર્નર મળ્યો હતો. હરમનપ્રીત સિંહે ફરી એકવાર પોતાની કુશળતા બતાવીને આ સેટ પીસને ગોલમાં ફેરવ્યો હતો. આ સાથે ભારતે 2-1ની લીડ મેળવી લીધી હતી.

43મી મિનિટે સુખજીત સિંહે ગોલ કરીને ભારતની લીડ વધુ મજબૂત બનાવી હતી. આ ગોલની શરૂઆત વાઈસ-કેપ્ટન હાર્દિક સિંહે કરી હતી. તેણે મિડફિલ્ડમાં બોલ કબજે કર્યો અને ત્યારબાદ સુખજીતને પાસ આપ્યો હતો. સુખજીતે શાનદાર ટોમાહોક શોટ વડે બોલને ગોલપોસ્ટમાં પહોંચાડ્યો હતો. આ સાથે ભારતે 3-1ની લીડ મેળવી હતી.

મેચ પૂરી થવામાં માત્ર બે મિનિટ બાકી હતી ત્યારે ભારતને છઠ્ઠો પેનલ્ટી કોર્નર મળ્યો હતો. હરમનપ્રીતનો ગોલ તરફ જતો ફ્લિક મલેશિયાના એક ડિફેન્ડરના શરીર સાથે અથડાતા ભારતને પેનલ્ટી સ્ટ્રોક આપવામાં આવ્યો હતો. કેપ્ટન હરમનપ્રીતે આ તકનો પૂરો ફાયદો ઉઠાવ્યો હતો અને પેનલ્ટી સ્ટ્રોકને ગોલમાં ફેરવીને પોતાની હેટ્રિક પૂરી કરી હતી.

થોડી જ સેકન્ડ બાદ ભારતને વધુ એક સેટ પીસ મળ્યો હતો, પરંતુ ભારતીય ટીમ આ તકનો લાભ ઉઠાવી શકી નહોતી. ત્યારબાદ મેચની અંતિમ મિનિટે મલેશિયાના શેલો સિલ્વેરિયસે મેદાની ગોલ કરીને એક ગોલનો તફાવત ઘટાડ્યો હતો. જોકે, અંતે ભારતીય ટીમે 4-2થી જીત મેળવીને ટુર્નામેન્ટમાં પોતાની સતત ચોથી જીત નોંધાવી હતી.