IND vs SA / બીજી ટેસ્ટ પર કેપ્ટન રિષભ પંતનું મોટું નિવેદન, ગુવાહાટીની પિચ વિશે કહી આ વાત

ભારત અને સાઉથ આફ્રિકા વચ્ચે આવતીકાલ (22 નવેમ્બર) થી ગુવાહાટીમાં બીજી ટેસ્ટ શરૂ થઈ રહી છે. પહેલી ટેસ્ટ કોલકાતામાં રમાઈ હતી, જે સાઉથ આફ્રિકાએ 30 રનથી જીતી હતી. આ મેચ પછી ઈડન ગાર્ડન્સની પિચની ભારે ટીકા થઈ હતી, જેના કારણે એવી અટકળો શરૂ થઈ હતી કે ગુવાહાટીની પિચ પણ સ્પિન બોલિંગને અનુરૂપ હશે. રિષભ પંતે આ વિષય પર એક મોટું નિવેદન આપતા કહ્યું કે તેને ગુવાહાટીમાં વધુ સારી પિચની અપેક્ષા છે.

રિષભ પંતનું મોટું નિવેદન

બીજી ટેસ્ટ શરૂ થાય તે પહેલાં, રિષભ પંતે એક પ્રેસ કોન્ફરન્સમાં કહ્યું, "હું પહેલા કહેવા માંગુ છું કે આ મેદાન મારા હૃદયની ખૂબ નજીક છે. મેં અહીં મારું ODI ડેબ્યુ કર્યું હતું અને અહીં જ ટેસ્ટ કેપ્ટનશિપનું ડેબ્યુ પણ કરી રહ્યો છું. આ મેચ મારા માટે હંમેશા ખાસ રહેશે અને કદાચ તે આખા ગુવાહાટી શહેર માટે ખાસ છે, કારણ કે અહીં પહેલીવાર ટેસ્ટ મેચ રમાઈ રહી છે."

રિષભ પંતે વધુમાં કહ્યું, "અહીં આવીને દરેકને ખાસ અનુભવ મળી રહ્યો છે. પિચની વાત કરીએ તો, મને લાગે છે કે આ વખતે તે વધુ સારી રહેશે, ખાસ કરીને બેટિંગ માટે. હા, થોડા દિવસો પછી તેમાં ટર્ન મળશે, પરંતુ મારા મતે આ એક સારી મેચ બનવાની છે."

BCCIનો આભાર માન્યો

રિષભ પંતે અગાઉ કેપ્ટનશિપ આપવા બદલ BCCIનો આભાર માન્યો હતો. તેણે કહ્યું, "હું કેપ્ટનશિપ માટે BCCIનો આભાર માનું છું. ક્યારેક, જો તમે મોટી મેચ વિશે વધુ પડતું વિચારવાનું શરૂ કરો છો, તો તે મદદ નથી કરતું. હું વધુ પડતું વિચારવા નથી માંગતો. પહેલી ટેસ્ટ અમારા માટે સારી નહતી રહી, તેથી બીજી ટેસ્ટ જીતવા માટે અમારે જે પણ જરૂરી છે તે કરવું પડશે."