U-19 વર્લ્ડ કપ 2026નું શેડ્યૂલ જાહેર, શું આ ટુર્નામેન્ટમાં પણ ભારત-પાકિસ્તાન ટકરાશે? અહીં જાણો બધી વિગતો
છેલ્લું અપડેટ : 20 Nov 2025
ICC એ અંડર-19 ક્રિકેટ વર્લ્ડ કપ 2026નું સંપૂર્ણ શેડ્યૂલ જાહેર કર્યું છે. આ ટુર્નામેન્ટમાં ઘણા મોટા ફેરફારો જોવા મળશે. સૌથી મહત્ત્વપૂર્ણ ફેરફાર એ છે કે આ ટુર્નામેન્ટમાં ભારત અને પાકિસ્તાનને અલગ-અલગ ગ્રુપમાં રાખવામાં આવ્યા છે. તેનો અર્થ એ છે કે બંને ટીમો ગ્રુપ સ્ટેજમાં એકબીજાનો સામનો નહીં કરે અને તેમનો સંભવિત મુકાબલો ફક્ત સુપર સિક્સ અથવા નોકઆઉટ સ્ટેજમાં જ થઈ શકે છે.
ભારતનું અભિયાન 15 જાન્યુઆરીથી શરૂ થશે
ભારત 15 જાન્યુઆરીએ બુલાવાયોમાં USA સામે પોતાની પહેલી મેચ રમશે. આ મેચ ટીમ ઇન્ડિયા માટે જીત સાથે પોતાના અભિયાનની શરૂઆત કરવાની એક શ્રેષ્ઠ તક હશે. ત્યારબાદ ભારત 17 જાન્યુઆરીએ બાંગ્લાદેશ અને 24 જાન્યુઆરીએ ન્યુઝીલેન્ડનો સામનો કરશે. ત્રણેય મેચ બુલાવાયોમાં રમાશે.
ગ્રૂપ-Aમાં ભારત સાથે USA, બાંગ્લાદેશ અને ન્યુઝીલેન્ડનો સમાવેશ થાય છે. ગ્રુપમાંથી ટોપ ત્રણ ટીમો સુપર સિક્સ રાઉન્ડમાં જશે, જ્યાં બે ગ્રુપ બનાવવામાં આવશે, જેમાં દરેકમાં છ ટીમો હશે.
16 ટીમો વચ્ચે 41 મેચ
ટુર્નામેન્ટમાં કુલ 16 ટીમો ભાગ લેશે. તેમને ચાર-ચાર ટીમોના 4 ગ્રુપ A, B, C, અને Dમાં વિભાજીત કરવામાં આવી છે. આ ટુર્નામેન્ટમાં 23 દિવસમાં સુપર સિક્સ, સેમીફાઈનલ અને ફાઈનલ સહિત કુલ 41 મેચ રમાશે
- ગ્રુપ A: ભારત, USA, બાંગ્લાદેશ, ન્યુઝીલેન્ડ
- ગ્રુપ B: ઝિમ્બાબ્વે, પાકિસ્તાન, ઈંગ્લેન્ડ, સ્કોટલેન્ડ
- ગ્રુપ C: ઓસ્ટ્રેલિયા, આયર્લેન્ડ, જાપાન, શ્રીલંકા
- ગ્રુપ D: તાંઝાનિયા, વેસ્ટ ઈન્ડિઝ, અફઘાનિસ્તાન, સાઉથ આફ્રિકા
આ વર્ષે, તાંઝાનિયા પહેલીવાર આ ટુર્નામેન્ટમાં ભાગ લેશે, જ્યારે જાપાન 2020 પછી પરત ફરી રહ્યું છે.
મેચ પાંચ અલગ અલગ મેદાનો પર રમાશે
અંડર-19 વર્લ્ડ કપ ઝિમ્બાબ્વે અને નામિબિયાના પાંચ મેદાનો પર યોજાશે.
- ઝિમ્બાબ્વે - હરારે સ્પોર્ટ્સ ક્લબ, તાકાશિંગા અને ક્વીન્સ સ્પોર્ટ્સ ક્લબ.
- નામિબિયા - વિન્ડહોક ક્રિકેટ ગ્રાઉન્ડ અને HP ઓવલ.
પ્રેક્ટિસ મેચ 9થી 14 જાન્યુઆરી દરમિયાન યોજાશે. ત્યારબાદ લીગ સ્ટેજ, સુપર સિક્સ રાઉન્ડ, બે સેમીફાઈનલ અને રોમાંચક ફાઈનલ રમાશે.
ભારતનું સંપૂર્ણ ગ્રુપ-સ્ટેજ શેડ્યૂલ
- 15 જાન્યુઆરી: ભારત vs USA - બુલાવાયો
- 17 જાન્યુઆરી: ભારત vs બાંગ્લાદેશ - બુલાવાયો
- 24 જાન્યુઆરી: ભારત vs ન્યુઝીલેન્ડ - બુલાવાયો
