IND vs SA / ગુવાહાટી ટેસ્ટમાં કેવી હશે પિચ? સ્પિનર્સને મદદ મળશે કે બેટ્સમેનનો રહેશે દબદબો?
છેલ્લું અપડેટ : 21 Nov 2025
ભારત અને સાઉથ આફ્રિકા વચ્ચેની બે મેચની ટેસ્ટ સિરીઝ હવે ગુવાહાટી પહોંચી ગઈ છે. જો ટીમ ઈન્ડિયાએ સિરીઝને ડ્રોમાં પૂરી કરવી હોય તો આ મેચ જીતવી પડશે. કોલકાતાના ઈડન ગાર્ડન્સ સ્ટેડિયમ ખાતે સાઉથ આફ્રિકા સામેની પહેલી ટેસ્ટ મેચ 30 રનથી હારી ગઈ હતી, જેમાં ત્રણ દિવસ દરમિયાન પિચ પર સ્પિનર્સને ઘણી મદદ મળી હતી. ત્યારે હવે બધાની નજર ગુવાહાટીમાં રમાનાર બીજી મેચમાં પિચ કેવી હશે તેના પર છે.
ગુવાહાટી ટેસ્ટ પિચ બેટિંગ માટે વધુ સારી હોઈ શકે છે
ગુવાહાટીના બારસાપરા ક્રિકેટ સ્ટેડિયમમાં પહેલીવાર ટેસ્ટ મેચ રમાશે, ત્યાં અગાઉ બે ODI અને ચાર T20I સહિત ફક્ત છ આંતરરાષ્ટ્રીય મેચનું આયોજન કરવામાં આવ્યું હતું. આવી સ્થિતિમાં ત્યાંની પિચ દરેક માટે મિસ્ટ્રી છે. કોલકાતામાં, બંને ટીમો કાળી માટીની પિચ પર રમી હતી, જે અપેક્ષા કરતા થોડો ઓછો ઉછાળ આપતી હતી. દરમિયાન, ગુવાહાટીના બારસાપરા ક્રિકેટ સ્ટેડિયમમાં તૈયાર કરેલી પિચ લાલ માટીની બનેલી છે, જે ગતિ અને ઉછાળ બંને આપે છે. આ પિચ પર બેટિંગ કરવી સરળ બનશે, પરંતુ રમત આગળ વધતાં સ્પિનર્સ મહત્ત્વપૂર્ણ ભૂમિકા ભજવશે. મુંબઈના વાનખેડે સ્ટેડિયમમાં પણ લાલ માટીની પિચ છે, જે પહેલા બે દિવસ દરમિયાન બેટિંગ માટે આદર્શ છે, પરંતુ ત્યારબાદ સ્પિનર્સ પ્રભુત્વ મેળવે છે, જેના કારણે ચોથી ઈનિંગમાં ટાર્ગેટ ચેઝ કરવો પડકારજનક બની જાય છે.
ગુવાહાટી ટેસ્ટ મેચ દરમિયાન હવામાન કેવું રહેશે?
બીજી ટેસ્ટ મેચનો શરૂઆતનો સમય પણ બદલાયો છે, જેમાં દિવસની રમત સવારે 9 વાગ્યે શરૂ થશે. પાંચેય દિવસના હવામાન વિશે વાત કરીએ તો, રિપોર્ટ્સ અનુસાર પહેલા બે દિવસે વરસાદ પડવાની અપેક્ષા છે, જોકે તે રમતને ખાસ અસર નહીં કરે. જ્યારે બાકીના ત્રણ દિવસ સુધી હવામાન સંપૂર્ણપણે સ્વચ્છ રહેવાની અપેક્ષા છે. આવી સ્થિતિમાં આ મેચમાં પરિણામની અપેક્ષા રાખી શકાય છે. વિકેટકીપર-બેટ્સમેન રિષભ પંત ગુવાહાટી ટેસ્ટમાં ટીમ ઈન્ડિયાનું નેતૃત્વ કરશે.
