દિવાળી 2026: ઘરના આ 6 ખૂણામાં દીવા પ્રગટાવો, આખું વર્ષ રહેશે માતા લક્ષ્મીની કૃપા
દિવાળી (Diwali) માત્ર દીવા પ્રગટાવવા અને માતા લક્ષ્મીની પૂજા કરવાનો તહેવાર નથી, પરંતુ ઘર-પરિવારમાં સુખ, શાંતિ અને સકારાત્મક ઊર્જાનું સ્વાગત કરવાનો પણ પવિત્ર અવસર છે. આ વર્ષે દિવાળીનો તહેવાર 8 નવેમ્બર, 2026ના રોજ મનાવવામાં આવશે. ધાર્મિક માન્યતાઓ અનુસાર, આ દિવસે ઘરની સ્વચ્છતા અને સજાવટની સાથે કેટલીક ખાસ જગ્યાએ દીવા પ્રગટાવવાનું વિશેષ મહત્ત્વ છે. માનવામાં આવે છે કે તેનાથી ઘરમાં સમૃદ્ધિ આવે છે અને માતા લક્ષ્મીની કૃપા જળવાઈ રહે છે.
ઘરના આ 6 ખૂણામાં પ્રગટાવો દીવા
વાસ્તુશાસ્ત્ર (Vastu Shastra) અનુસાર દિવાળીની રાત્રે ઘરના ઈશાન ખૂણા એટલે કે ઉત્તર-પૂર્વ દિશા, અગ્નિ ખૂણા એટલે કે દક્ષિણ-પૂર્વ દિશા, બ્રહ્મ સ્થાન એટલે કે ઘરના મધ્ય ભાગ, મુખ્ય દરવાજો, ધન રાખવાની તિજોરી અને જ્યાં પાણીની વ્યવસ્થા હોય તે સ્થળે દીવો પ્રગટાવવાની પરંપરા છે. ધાર્મિક માન્યતા મુજબ, આ જગ્યાએ દીવો પ્રગટાવવાથી ઘરમાં સકારાત્મકતા અને સમૃદ્ધિનું આગમન થાય છે.
મીણબત્તીના બદલે માટીના દીવાનો ઉપયોગ કરો
દિવાળીના પ્રકાશપર્વમાં મીણબત્તી (Candle)ના બદલે માટીના દીવા (Earthen Lamps) પ્રગટાવવાનું મહત્ત્વ છે. ખાસ કરીને ઘરના મંદિર અને પૂજાસ્થળે માટીના દીવા પ્રગટાવવા શુભ માનવામાં આવે છે. વાસ્તુશાસ્ત્રમાં દીવાને અગ્નિ તત્ત્વનું પ્રતીક માનવામાં આવે છે. માટી અને અગ્નિનું સંયોજન પરંપરાગત દીવાને ધાર્મિક રીતે વિશેષ બનાવે છે.
ફૂલ અને પાંદડાંથી ઘરને સજાવો
ઘરના મુખ્ય દરવાજા અને મંદિરને તાજાં ફૂલ, આંબા તથા અશોકનાં પાંદડાંથી સજાવવાની સલાહ આપવામાં આવે છે. પ્લાસ્ટિકની માળા અને કૃત્રિમ તોરણના બદલે કુદરતી ફૂલ-પાંદડાંથી બનેલું તોરણ લગાવવાથી ઘરમાં તાજગી અને પરંપરાગત સુંદરતા વધે છે.
હળદર-કંકુથી બનાવો સ્વસ્તિક
મુખ્ય દરવાજા પર પ્લાસ્ટિકના સ્ટીકરના બદલે હળદર અને કંકુથી સ્વસ્તિક તથા શુભ-લાભનાં ચિહ્નો બનાવવાની પરંપરા છે. સ્વસ્તિકને મંગળ, શુભતા અને સમૃદ્ધિનું પ્રતીક માનવામાં આવે છે.
ઘરે બનાવેલી મીઠાઈનો ધરાવો ભોગ
દિવાળીની પૂજામાં બજારમાંથી લાવેલી મીઠાઈના બદલે ઘરે બનાવેલી શુદ્ધ મીઠાઈ અને પકવાનોનો ભોગ ધરાવવો શુભ માનવામાં આવે છે. જોકે મહેમાનોના સ્વાગત અને ભેટ માટે બજારની મીઠાઈનો ઉપયોગ પણ કરી શકાય છે. આ તમામ પરંપરાઓ ધાર્મિક અને સાંસ્કૃતિક માન્યતાઓ પર આધારિત છે. દીવા પ્રગટાવતી વખતે સુરક્ષાનું ધ્યાન રાખવું અને જ્વલનશીલ વસ્તુઓથી દૂર રાખવા જરૂરી છે.
નોંધ:- આ લેખમાં આપવામાં આવેલી તમામ માહિતી વિવિધ સ્રોતો જેવા કે - પંચાંગો/ ઉપદેશો/ ધાર્મિક માન્યતાઓ/જ્યોતિષીઓ/ શાસ્ત્રોમાંથી સંકલિત કરવામાં આવી છે અને તમને પ્રસારિત કરવામાં આવી છે. અમારો હેતુ માત્ર માહિતી પૂરી પાડવાનો છે. GSTV આની પુષ્ટિ નથી કરતું. તેના માટે કોઈ નિષ્ણાતનું માર્ગદર્શન લેવું.
