સરદાર વલ્લભભાઈ પટેલ જયંતિ: રાષ્ટ્રસેવા, એકતા અને શિસ્ત પ્રેરતા સરદાર સાહેબના અમર વિચારો

આજે એટલે કે 31 ઓક્ટોબરે દેશભરમાં ભારતના 'લોખંડી પુરુષ' (આયર્ન મેન) સરદાર વલ્લભભાઈ પટેલની જન્મજયંતિ ઉજવવામાં આવી રહી છે. સ્વતંત્ર ભારતના પ્રથમ નાયબ વડાપ્રધાન અને ગૃહમંત્રી રહેલા સરદાર પટેલનું દેશની એકતા અને અખંડિતતાને મજબૂત બનાવવામાં અતુલ્ય યોગદાન રહ્યું છે. આઝાદી પછી ભારત સામેનો સૌથી મોટો પડકાર સેંકડો દેશી રજવાડાઓનું એકીકરણ કરવાનો હતો. સરદાર પટેલે પોતાની કોઠાસૂઝ, દ્રઢ ઈચ્છાશક્તિ અને કુટનીતિક ક્ષમતાથી આ કઠિન કાર્યને પાર પાડવામાં મહત્વની ભૂમિકા ભજવી હતી. તેમના જ ભગીરથ પ્રયાસોથી વિવિધ રજવાડાઓનું ભારતીય સંઘમાં વિલીનીકરણ શક્ય બન્યું. તેમના આ જ અભૂતપૂર્વ યોગદાનને યાદ કરીને દર વર્ષે 31 ઓક્ટોબરને 'રાષ્ટ્રીય એકતા દિવસ' તરીકે ઉજવવામાં આવે છે.

સરદાર પટેલનું જીવન, તેમના વિચારો અને દેશ પ્રત્યેનું સમર્પણ આજે પણ યુવાનો માટે પ્રેરણાસ્રોત છે. તેમની જન્મજયંતિના આ શુભ અવસરે જાણો તેમના કેટલાક અણમોલ વિચારો, જે આપણને એકતા, શિસ્ત અને રાષ્ટ્રસેવાનો સંદેશ આપે છે:

"આ માટીમાં કંઈક એવું અનોખું છે, જે અનેક વિઘ્નો છતાં હંમેશા મહાન આત્માઓનું નિવાસસ્થાન રહી છે."

"આજે આપણે ઊંચ-નીચ, અમીર-ગરીબ અને જ્ઞાતિ-જાતિના ભેદભાવોને સંપૂર્ણપણે સમાપ્ત કરી દેવા જોઈએ."

"શક્તિ વગરનો વિશ્વાસ નકામો છે. કોઈ પણ મહાન કાર્ય કરવા માટે વિશ્વાસ અને શક્તિ – બંને અનિવાર્ય છે."

"તમારી ભલાઈ જ તમારા માર્ગમાં અડચણ બને છે, તેથી તમારી આંખોને ક્રોધથી લાલ થવા દો અને મજબૂત હાથોથી અન્યાયનો સામનો કરો."

"તમને તમારા અપમાનને સહન કરવાની કળા આવડવી જોઈએ."