'એવી કોઈ ફોર્મ્યૂલા નક્કી નહોતી થઈ', મુખ્યમંત્રી એકનાથ શિંદેએ કઈ વાતના આપ્યા સંકેત?

મહારાષ્ટ્ર વિધાનસભા ચૂંટણીમાં મહાયુતિ ગઠબંધનએ જબરદસ્ત લીડ મેળવી છે. મહારાષ્ટ્રમાં મહાયુતિના પ્રદર્શન અંગે મુખ્યમંત્રી એકનાથ શિંદેએ પોતાની પ્રતિક્રિયા આપી છે. મહારાષ્ટ્રના આગામી મુખ્યમંત્રી કોણ હશે તેવા સવાલનો પણ તેમણે જવાબ આપ્યો છે. શિવસેના નેતા શિંદેને પૂછવામાં આવ્યું કે ચૂંટણી પહેલા સૌથી વધુ ધારાસભ્યો ધરાવતી પાર્ટીના નેતાને મુખ્યમંત્રી બનાવવાની વાત થઈ હતી. જેના જવાબમાં તેમણે કહ્યું કે ચૂંટણી પહેલા આવી કોઈ ફોર્મ્યુલા બનાવવામાં આવી નથી.

મહાગઠબંધનના તમામ પક્ષોની બેઠક થશે

એકનાથ શિંદેએ કહ્યું કે, આ અંગે મહાગઠબંધનના તમામ પક્ષોની બેઠક થશે. ત્યારબાદ તે બેઠકમાં લેવાયેલા નિર્ણય મુજબ મુખ્યમંત્રી નક્કી કરવામાં આવશે. મહારાષ્ટ્રના મુખ્યમંત્રી એકનાથ શિંદેએ કહ્યું કે આજે હું મહારાષ્ટ્રના તમામ મતદારોનો આભાર માનું છું કારણ કે આ જીત ઐતિહાસિક છે. આ પ્રસંગે એકનાથ શિંદેએ મહાયુતિના તમામ કાર્યકરોનો આભાર પણ માન્યો હતો.

જે પાર્ટીના સૌથી વધુ ધારાસભ્યો હશે તે જ મુખ્યમંત્રી બનશે?

જે પાર્ટીના સૌથી વધુ ધારાસભ્યો હશે તે જ મુખ્યમંત્રી બનશે? આ સવાલ પર એકનાથ શિંદેએ કહ્યું કે, આવું કંઈ નક્કી થયું નથી. તેમણે કહ્યું કે આ મામલે મહાયુતિની બેઠકમાં નિર્ણય લેવામાં આવશે. એકનાથ શિંદેએ કહ્યું કે, મેં કહ્યું હતું કે મહાયુતિને પ્રચંડ બહુમતી મળશે. હું મારી વહાલી બહેનો, ખેડૂતો અને સમાજના તમામ વર્ગોનો આભાર માનું છું. જનતાએ મહાયુતિ દ્વારા કરેલા કામને મત આપ્યો છે, તેથી જ મહાયુતિએ આટલી મોટી જીત હાંસલ કરી છે. 

બીજેપી નેતા વિનોદ તાવડેએ પણ કહ્યું કે સીએમ પદ પર નિર્ણય તમામ મહત્ત્વપૂર્ણ પક્ષો સાથેની બેઠક પછી લેવામાં આવશે.