ઉમર ખાલિદ અને શરજીલ ઇમામે જામીન માટે સુપ્રીમ કોર્ટના દરવાજા ખખડાવ્યા
દિલ્હીનાં વર્ષ 2020નાં રમખાણો સાથે જોડાયેલા મોટા કાવતરાના કેસમાં આરોપી ઉમર ખાલિદ અને શરજીલ ઇમામે હવે સુપ્રીમ કોર્ટનો સંપર્ક કર્યો છે. બંનેએ દિલ્હી હાઇકોર્ટ દ્વારા 30 સપ્ટેમ્બર, 2026ના રોજ ત્રીજી વખત તેમની જામીન અરજીઓ ફગાવી દેવાના નિર્ણયને અલગ-અલગ અરજીઓ દ્વારા પડકાર્યો છે. આ કેસમાં અગાઉ કડકડડૂમા કોર્ટ દ્વારા 4 જુલાઈ, 2026ના રોજ બંનેની જામીન અરજીઓ નામંજૂર કરવામાં આવી હતી. ત્યારબાદ બંનેએ દિલ્હી હાઇકોર્ટમાં આ નિર્ણયને પડકાર્યો હતો. જસ્ટિસ પ્રતિભા એમ. સિંહ અને જસ્ટિસ દિનેશ ભટ્ટની બેન્ચે અરજીઓ પર સુનાવણી કરી હતી, પરંતુ સુપ્રીમ કોર્ટના અગાઉના આદેશને ધ્યાનમાં રાખીને જામીન આપવાનો ઇનકાર કર્યો હતો.
સુપ્રીમ કોર્ટે અગાઉ શું કહ્યું હતું?
જાન્યુઆરી 2026માં સુપ્રીમ કોર્ટે ઉમર ખાલિદ અને શરજીલ ઇમામને નિયમિત જામીન આપવાનો ઇનકાર કર્યો હતો. જોકે, કોર્ટે ભવિષ્યમાં ફરી જામીન અરજી કરવાની છૂટ આપી હતી. આદેશ મુજબ, કેસના સુરક્ષિત અને ગુપ્ત સાક્ષીઓનાં નિવેદનો નોંધાયા બાદ અથવા આદેશને એક વર્ષ પૂર્ણ થયા પછી ટ્રાયલમાં વિલંબ થતો હોય તો બંને નીચલી અદાલતમાં ફરી જામીન માટે અરજી કરી શકે છે. આ જ આદેશને આધાર બનાવીને નીચલી અદાલતે તેમની ત્રીજી જામીન અરજી ફગાવી દીધી હતી. ત્યારબાદ હાઇકોર્ટે પણ રાહત આપી નહોતી.
દિલ્હી પોલીસે જામીનનો વિરોધ કર્યો
સુનાવણી દરમિયાન દિલ્હી પોલીસે બંને આરોપીઓને જામીન આપવાનો વિરોધ કર્યો હતો. પોલીસની દલીલ મુજબ, ઉમર ખાલિદ અને શરજીલ ઇમામ દિલ્હી રમખાણોના કથિત કાવતરાના મુખ્ય સૂત્રધાર અને સમગ્ર ઘટનામાં મહત્ત્વની ભૂમિકા ભજવનારા હતા. પોલીસે એવી પણ દલીલ કરી હતી કે આ તબક્કે તેમની જામીન અરજીઓ દાખલ કરવી ઉતાવળભર્યું અને કાયદાકીય રીતે યોગ્ય નથી.
રમખાણોમાં 53 લોકોનાં મોત થયાં હતાં
ઉત્તર-પૂર્વ દિલ્હી વિસ્તારમાં ફેબ્રુઆરી 2020માં થયેલાં રમખાણોમાં 53 લોકોનાં મોત થયાં હતાં, જ્યારે 700થી વધુ લોકો ઘાયલ થયા હતા. નાગરિકતા સુધારા કાયદા (CAA) અને રાષ્ટ્રીય નાગરિક નોંધણી (NRC)ના વિરોધમાં ચાલી રહેલા પ્રદર્શનો દરમિયાન હિંસા ફાટી નીકળી હતી. આ કેસમાં દિલ્હી પોલીસે મોટા કાવતરાના આરોપસર 18 લોકોની ધરપકડ કરી હતી. તેમાંથી કેટલાક આરોપીઓને બાદમાં જામીન મળી ચૂક્યા છે. ઉમર ખાલિદ અને શરજીલ ઇમામ સામે રમખાણોનું કાવતરું ઘડવાના ગંભીર આરોપો છે. હવે બંનેની અરજીઓ પર સુપ્રીમ કોર્ટ શું વલણ અપનાવે છે તેના પર સૌની નજર રહેશે.
