બેંગલુરુની ફાઇવ સ્ટાર હોટેલના સ્વિમિંગ પૂલમાં વીજ કરંટ લાગવાથી બે વિદેશી નાગરિકોના મોત

બેંગલુરુની ફાઇવ સ્ટાર હોટેલ કોનરાડના સ્વિમિંગ પૂલમાં શુક્રવારે સાંજે વીજ કરંટ લાગવાની આશંકા વચ્ચે બે વિદેશી નાગરિકોના મોત થયા હતા. મૃતકોમાં એક જર્મન અને એક સ્લોવાક નાગરિકનો સમાવેશ થાય છે. આ બંનેને બચાવવાનો પ્રયાસ કરતી વખતે અન્ય બે લોકો પણ ઘાયલ થયા હતા, એવી માહિતી પોલીસે આપી હતી.

મૃતકોની ઓળખ 57 વર્ષીય એલેક્ઝાન્ડર મેક્સિમિલિયન થેઈસ તરીકે થઈ છે, જે જર્મન નાગરિક અને લુફ્થાન્સા એરલાઇનના ક્રૂ મેમ્બર હતા. બીજા મૃતક 45 વર્ષીય જુરાજ હોરવાટ હતા, જે સ્લોવાક નાગરિક હતા અને IBMમાં પ્રોજેક્ટ મેનેજર તરીકે કામ કરતા હતા.

ઘાયલ થયેલા લોકોની ઓળખ 41 વર્ષીય મેથ્યુ ડેસેન્ટિસ અને 28 વર્ષીય રાહુલ તિવારી તરીકે થઈ છે. અમેરિકન નાગરિક મેથ્યુ હોટેલમાં રોકાયેલા હતા, જ્યારે રાહુલ તિવારી હોટેલમાં પૂલ એટેન્ડન્ટ અને લાઇફગાર્ડ તરીકે કામ કરતા હતા. બંનેને સારવાર માટે મણિપાલ હોસ્પિટલમાં લઈ જવામાં આવ્યા હતા. જોકે, સારવાર બાદ તેમને રજા આપી દેવામાં આવી છે.

આ ઘટના હોટેલના ત્રીજા માળે આવેલા સ્વિમિંગ પૂલમાં બની હતી. બેંગલુરુના પોલીસ કમિશનર સીમંત કુમાર સિંહે જણાવ્યું હતું કે તપાસકર્તાઓને આશંકા છે કે સ્વિમિંગ પૂલના પાણીમાં વીજળીનું લીકેજ થયું હતું.

તેમણે કહ્યું, "ઘટનાસ્થળને સીલ કરી દેવામાં આવ્યું છે અને ટેકનિકલ ટીમો તેમજ સીન ઑફ ક્રાઇમ ઑફિસર (SOCO)ની ટીમોએ સ્થળનું નિરીક્ષણ કર્યું છે. ઘટનાનું ચોક્કસ કારણ જાણવા માટે અમે ફોરેન્સિક સાયન્સ લેબોરેટરી (FSL)નો રિપોર્ટ, પોસ્ટમોર્ટમનાં તારણો અને અન્ય અહેવાલોની રાહ જોઈ રહ્યા છીએ."

મૃતકની પત્નીએ હોટેલ મેનેજમેન્ટ પર બેદરકારીનો આરોપ લગાવ્યો

હોરવાટની 47 વર્ષીય પત્ની સિલ્વિયા હોટુઆટોવાએ પોલીસમાં નોંધાવેલી ફરિયાદમાં હોટેલ મેનેજમેન્ટ પર બેદરકારીનો આરોપ લગાવ્યો છે. તેમણે જણાવ્યું હતું કે તેઓ અને તેમના પતિ 20 ઓક્ટોબરે રજાઓ ગાળવા માટે ભારત આવ્યા હતા અને કોનરાડ હોટેલમાં રોકાયા હતા.

ફરિયાદ અનુસાર, શુક્રવારે સાંજે લગભગ 5:15 વાગ્યે હોરવાટ હોટેલના સ્વિમિંગ પૂલમાં તરવા ગયા હતા. પૂલ પાસે ચીસો સંભળાતાં સિલ્વિયા ત્યાં દોડી ગયા હતા. ત્યાં તેમણે પોતાના પતિને પાણીમાં બેભાન અવસ્થામાં પડેલા જોયા હતા.

ફરિયાદમાં જણાવ્યા અનુસાર, હોરવાટને બચાવવા માટે પૂલમાં કૂદેલા હોટેલના એક કર્મચારીને પણ વીજ કરંટ લાગ્યો હતો.

ફરિયાદમાં વધુમાં આક્ષેપ કરવામાં આવ્યો છે કે ત્યાં હાજર અન્ય એક વ્યક્તિએ પૂલમાં વીજ કરંટ હોવાની આશંકા અંગે લોકોને ચેતવણી આપી હતી. ત્યારબાદ હોટેલના કર્મચારીઓએ વીજ પુરવઠો બંધ કર્યો હતો, પાણીમાંથી લોકોને બહાર કાઢ્યા હતા અને તેમને ફરી ભાનમાં લાવવાનો પ્રયાસ કર્યો હતો. સિલ્વિયાએ જણાવ્યું હતું કે તેમના પતિ સાથે તેમને પણ હોસ્પિટલ લઈ જવામાં આવ્યાં હતાં.

તેમની ફરિયાદના આધારે પોલીસે ભારતીય ન્યાય સંહિતા (BNS), 2023ની કલમ 106 (બેદરકારીને કારણે મૃત્યુ નિપજાવવું) હેઠળ હલસુરુ પોલીસ સ્ટેશનમાં કેસ નોંધ્યો છે.

શોર્ટ સર્કિટને કારણે દુર્ઘટના થઈ હોવાની આશંકા

હોટેલનાં સૂત્રોના જણાવ્યા અનુસાર, બંને વ્યક્તિઓ સ્વિમિંગ પૂલમાં પ્રવેશ્યા બાદ તરત જ વીજ કરંટનો ભોગ બન્યા હોવાની શક્યતા છે. પોલીસને આશંકા છે કે શોર્ટ સર્કિટને કારણે આ દુર્ઘટના બની હોઈ શકે છે.

એક પોલીસ અધિકારીએ જણાવ્યું હતું કે, "પાણીમાં બંનેને મુશ્કેલીનો સામનો કરતા જોઈને એક વ્યક્તિ તેમને બચાવવા માટે આગળ આવ્યો હતો. ત્યારબાદ બીજી વ્યક્તિ પણ બચાવ કામગીરીમાં જોડાઈ હતી, જેના કારણે બંને ઘાયલ થયા હતા."

પોલીસ અધિકારીએ વધુમાં જણાવ્યું હતું કે સાવચેતીના પગલા તરીકે સ્વિમિંગ પૂલ બંધ કરી દેવામાં આવ્યો છે.

કોનરાડ હોટેલે દુઃખ વ્યક્ત કર્યું

આ ઘટના અંગે પ્રતિક્રિયા આપતાં કોનરાડ બેંગલુરુના પ્રવક્તાએ જણાવ્યું હતું, "કોનરાડ બેંગલુરુમાં બનેલી આ દુઃખદ ઘટના અને ત્યારબાદ બે મહેમાનોના મૃત્યુથી અમને અત્યંત દુઃખ થયું છે. આ ઘટનાથી પ્રભાવિત થયેલા તમામ લોકો પ્રત્યે અમે અમારી ઊંડી સંવેદના વ્યક્ત કરીએ છીએ."

પ્રવક્તાએ વધુમાં જણાવ્યું હતું, "ઘટનાનું ચોક્કસ કારણ હજુ સુધી જાણી શકાયું નથી અને સ્થાનિક સત્તાવાળાઓ દ્વારા તેની વ્યાપક તપાસ કરવામાં આવી રહી છે. અમે તપાસમાં સંપૂર્ણ સહયોગ આપી રહ્યા છીએ. તપાસ આગળ વધે તે દરમિયાન સંબંધિત સત્તાવાળાઓને જરૂરી તમામ સહાય પૂરી પાડવા માટે અમારી ટીમ ઉપલબ્ધ છે."