જમ્મુ-કાશ્મીરમાં ઓમર અબ્દુલ્લા સરકાર સામે પોતાની જ પાર્ટીમાં બળવો: 25 ધારાસભ્યોનું અલ્ટીમેટમ, તમામ 8 મંત્રીઓને હટાવવાની માગ

જમ્મુ-કાશ્મીરમાં મુખ્યમંત્રી ઓમર અબ્દુલ્લાની સરકાર સામે તેમની જ પાર્ટી નેશનલ કોન્ફરન્સ (National Conference – NC)માં આંતરિક અસંતોષ સામે આવ્યો છે. પાર્ટીના આશરે 25 ધારાસભ્યોએ સરકાર અને પક્ષના નેતૃત્વ સામે પોતાની નારાજગી વ્યક્ત કરતાં મંત્રીમંડળમાં મોટા ફેરફારની માગ કરી છે. ધારાસભ્યોએ ઉપમુખ્યમંત્રી સહિત તમામ 8 કેબિનેટ મંત્રીઓને આગામી 15 દિવસમાં હટાવીને મંત્રીમંડળનું સંપૂર્ણ પુનર્ગઠન (Cabinet Reshuffle) કરવાની માગણી કરી છે. આ ઉપરાંત મુખ્યમંત્રીના રાજકીય સલાહકાર નાસિર અસલમ વાનીને પણ પદ પરથી દૂર કરવા દબાણ વધાર્યું છે. 

ગુપ્ત બેઠકમાં 25 ધારાસભ્યો એકઠા થયા

શુક્રવારે સાંજે નેશનલ કોન્ફરન્સના ધારાસભ્ય કૈસર જમશેદ લોનના નિવાસસ્થાને એક બેઠક યોજાઈ હતી. આ બેઠકમાં 18 ધારાસભ્યો પ્રત્યક્ષ રીતે હાજર રહ્યા હતા, જ્યારે અન્ય 7 ધારાસભ્યો વીડિયો કોન્ફરન્સિંગ (Video Conferencing)ના માધ્યમથી જોડાયા હતા. બેઠકમાં હાજર ધારાસભ્યોએ સર્વાનુમતે એક પ્રસ્તાવ પસાર કર્યો હતો. તેમાં પક્ષના વ્યાપક હિત માટે સમગ્ર મંત્રીમંડળમાં ફેરફાર કરવાની અને મંત્રીઓને વિભાગોની ફાળવણી કરતાં પહેલાં પક્ષના ધારાસભ્યો સાથે ચર્ચા કરવાની માગ કરવામાં આવી હતી. ધારાસભ્યોના મતે પક્ષમાં આંતરિક લોકશાહી (Internal Democracy) અને જવાબદારીની વ્યવસ્થા મજબૂત થવી જોઈએ. 

સરકારની સ્થિરતા સામે સવાલ

જમ્મુ-કાશ્મીરની 90 સભ્યોની વિધાનસભામાં નેશનલ કોન્ફરન્સના 41 ધારાસભ્યો છે. ઓમર અબ્દુલ્લાની સરકારને કોંગ્રેસના 6, અપક્ષના 6 અને માર્ક્સવાદી કમ્યુનિસ્ટ પાર્ટી (CPI-M)ના 1 ધારાસભ્યનું સમર્થન મળેલું છે. પોતાની જ પાર્ટીના આશરે 25 ધારાસભ્યોની નારાજગીથી મુખ્યમંત્રી સામે રાજકીય પડકાર ઊભો થયો છે. જોકે, આ ધારાસભ્યોએ પક્ષ છોડવાની જાહેરાત કરી નથી. તેમનો દાવો છે કે તેઓ પાર્ટીને નબળી પાડવા નહીં, પરંતુ તેની અંદર સુધારા અને વધુ જવાબદારીની વ્યવસ્થા સ્થાપિત કરવા માગે છે. 

પાર્ટી નેતૃત્વની પ્રતિક્રિયા

નેશનલ કોન્ફરન્સના કાશ્મીર પ્રાંતના પ્રમુખ શૌકત મીરે બેઠકની પુષ્ટિ કરી હતી, પરંતુ તેને પક્ષવિરોધી બળવા તરીકે જોવાનો ઇનકાર કર્યો હતો. તેમના જણાવ્યા અનુસાર, કેટલાક વરિષ્ઠ ધારાસભ્યો પાર્ટી અધ્યક્ષ ફારૂક અબ્દુલ્લાને મળવા માગે છે. હવે ઓમર અબ્દુલ્લા અને પાર્ટીના વરિષ્ઠ નેતૃત્વ આ અસંતોષને કેવી રીતે ઉકેલે છે અને મંત્રીમંડળમાં ફરી ફેરફાર થાય છે કે નહીં તેના પર સૌની નજર છે.