UPમાં ભાજપના 99 ધારાસભ્યોના વિસ્તારોમાં પાર્ટી પાછળ, યોગી સરકારની વધી ચિંતા

આગામી વર્ષની શરૂઆતમાં યોજાનારી ઉત્તર પ્રદેશ વિધાનસભા ચૂંટણીમાં ભાજપ સતત ત્રીજી વખત જીત મેળવી હેટ્રિક લગાવવાની આશા રાખી રહ્યું છે. જોકે, 2024ની લોકસભા ચૂંટણીના વિધાનસભા ક્ષેત્રવાર આંકડાઓનું તાજેતરનું વિશ્લેષણ મુખ્યમંત્રી યોગી આદિત્યનાથ અને તેમની ટીમની ચિંતા વધારી રહ્યું છે.
આંકડાઓ અનુસાર, 2024ની લોકસભા ચૂંટણીનાં પરિણામોનું વિશ્લેષણ કરતાં જાણવા મળ્યું છે કે, ઉત્તર પ્રદેશ વિધાનસભામાં હાલમાં ભાજપ પાસે રહેલી 256 બેઠકોમાંથી માત્ર 156 બેઠકો પર જ પાર્ટી સરસાઈ મેળવી શકી હતી, જ્યારે 99 બેઠકો પર પાછળ રહી ગઈ હતી. યોગી આદિત્યનાથ સરકારના કેટલાક મંત્રીઓ પણ પોતાના મતવિસ્તારોમાં ભાજપને સરસાઈ અપાવવામાં નિષ્ફળ રહ્યા હતા.
બીજી તરફ, વિપક્ષી સમાજવાદી પાર્ટી (SP)એ પોતાના ધારાસભ્યો ધરાવતા વિસ્તારોમાં વધુ સારું પ્રદર્શન કર્યું હતું. સમાજવાદી પાર્ટીએ પોતાના ધારાસભ્યો ધરાવતી 100 વિધાનસભા બેઠકો પર સરસાઈ મેળવી હતી, જ્યારે માત્ર 11 બેઠકો પર પાછળ રહી હતી. એકંદરે, છેલ્લી લોકસભા ચૂંટણી દરમિયાન SP-કોંગ્રેસ ગઠબંધને સમગ્ર રાજ્યમાં 220થી વધુ વિધાનસભા બેઠકો પર સરસાઈ મેળવીને પોતાની મજબૂત સ્થિતિ દર્શાવી હતી.
ભાજપના સાથી પક્ષો પણ પોતાની બેઠકો પર પાછળ રહ્યા
ભાજપની મુશ્કેલીઓ માત્ર પોતાની બેઠકો પૂરતી મર્યાદિત નથી. તેના સાથી પક્ષોનું પ્રદર્શન પણ નિરાશાજનક રહ્યું હતું. અપના દળ (એસ)ના છ ધારાસભ્યોના મતવિસ્તારોમાં પણ પાર્ટી પાછળ રહી હતી. સુહેલદેવ ભારતીય સમાજ પાર્ટી (SBSP) પણ પોતાની બેઠકો પર NDAને સરસાઈ કે જીત અપાવવામાં સફળ રહી નહોતી. નિષાદ પાર્ટીની ત્રણ બેઠકો પર પણ ગઠબંધનને ખાસ ફાયદો થયો નહોતો.
2024ની લોકસભા ચૂંટણીમાં ઉત્તર પ્રદેશની કુલ 80 બેઠકોમાંથી સમાજવાદી પાર્ટીએ 37 અને કોંગ્રેસે 6 બેઠકો જીતી હતી. આ રીતે ગઠબંધનના ખાતામાં કુલ 43 બેઠકો આવી હતી. બીજી તરફ, ભાજપ માત્ર 33 બેઠકો પર જ સમેટાઈ ગઈ હતી.
ભાજપના સાથી પક્ષોમાં રાષ્ટ્રીય લોકદળ (RLD)એ બે બેઠકો અને અપના દળ (સોનેલાલ)એ એક બેઠક જીતી હતી. આ ઉપરાંત, બિજનૌરની નગીના બેઠક પરથી આઝાદ સમાજ પાર્ટી (કાંશીરામ)ના ચંદ્રશેખર આઝાદે જીત મેળવી હતી. જ્યારે બહુજન સમાજ પાર્ટી (BSP) પોતાનું ખાતું પણ ખોલી શકી નહોતી. આ સ્થિતિ વચ્ચે ઉત્તર પ્રદેશમાં ભાજપના અનેક વર્તમાન ધારાસભ્યો આગામી વિધાનસભા ચૂંટણીમાં પોતાની બેઠકો ગુમાવી શકે તેવી અટકળો પણ ચાલી રહી છે.
40 ટકા વર્તમાન ધારાસભ્યોની ટિકિટ કપાશે? પ્રદેશ અધ્યક્ષે આપ્યો જવાબ
ભાજપના કેટલા વર્તમાન ધારાસભ્યોની આગામી ચૂંટણીમાં ટિકિટ કપાઈ શકે છે તે અંગે પણ ચર્ચા ચાલી રહી છે. પાર્ટી પોતાના 40 ટકા વર્તમાન ધારાસભ્યોને ટિકિટ નહીં આપે એવા સવાલ અંગે ઉત્તર પ્રદેશ ભાજપના પ્રદેશ અધ્યક્ષ પંકજ ચૌધરીએ જણાવ્યું હતું કે, ઉમેદવારો અંગેનો નિર્ણય સામૂહિક રીતે લેવામાં આવે છે. તેમણે કહ્યું હતું કે, "મારી પાર્ટી કોઈ એક પરિવાર, એક વ્યક્તિ કે એક દંપતીની પાર્ટી નથી. દરેક નિર્ણય સામૂહિક રીતે લેવામાં આવે છે. અમારા જિલ્લા પ્રમુખની ભૂમિકા મહત્ત્વપૂર્ણ હોય છે. સંગઠનના પ્રાદેશિક અધ્યક્ષ પણ એટલા જ મહત્ત્વપૂર્ણ છે. તમામ લોકો પાસેથી સૂચનો અને અભિપ્રાયો લેવામાં આવે છે."
ટિકિટ ફાળવણી અંગે વધુમાં તેમણે જણાવ્યું હતું કે, પાર્ટીનો મુખ્ય ઉદ્દેશ્ય ચૂંટણી જીતવાનો છે અને તે મુજબ જ નિર્ણયો લેવામાં આવે છે. તેથી 40 ટકા કે 20 ટકા ઉમેદવારોની ટિકિટ કપાશે એવું કહેવું યોગ્ય નથી. દરેક ઉમેદવારની કામગીરી અને જીતવાની સંભાવનાની સમીક્ષા કરવામાં આવશે. પાર્ટીમાં નિર્ણય લેવા માટે અનેક સ્તરો અને મંચો છે, જ્યાં આ અંગે ચર્ચા કરવામાં આવશે.








