છ દાયકા સુધી દેશની સેવા કરનાર MIG-21ની અંતિમ ઉડાન, સ્ક્વોડ્રન લીડર પ્રિયા ફાઈટર જેટની છેલ્લી પાઈલટ

છ દાયકા સુધી દેશની સેવા કરનાર પ્રતિષ્ઠિત રશિયન મૂળનું મિગ-૨૧ ફાઇટર એરક્રાફ્ટ શુક્રવારે તેમની અંતિમ ઉડાન માટે આકાશમાં ઉડશે. એર ચીફ માર્શલ એપી સિંહ છેલ્લી વખત MIG-21 બાઇસન વિમાન ઉડાડશે. પાઇલટ્સમાં સ્ક્વોડ્રન લીડર પ્રિયા શર્મા પણ હશે, જે MIG-21 ઉડાવનારી છેલ્લી મહિલા પાઇલટ બનીને ઇતિહાસ રચશે. આ વિમાનો ચંદીગઢમાં એક ભવ્ય સમારોહમાં આકાશને વિદાય આપશે. આ વિમાનો ૧૯૬૦ના દાયકાથી ભારતીય વાયુસેનાના ફાઇટર કાફલાનો ભાગ છે.   ૧૯૮૧માં ભારતીય વાયુસેનાના વડા બનેલા દિલબાગ સિંહે ૧૯૬૩માં પ્રથમ MIG-21સ્ક્વોડ્રનનું નેતૃત્વ કર્યું હતું. મિગ-૨૧ વિમાન એક ઔપચારિક ફ્લાયપાસ્ટ અને ડિકમિશન સમારોહ સાથે કામગીરીનું સમાપન કરશે, જે ભારતની વાયુ શક્તિમાં એક ઐતિહાસિક પ્રકરણનો અંત દર્શાવે છે. છેલ્લા મિગ-૨૧ જેટ, પેન્થર્સ, ને ચંદીગઢ એરફોર્સ સ્ટેશન ખાતે નિવૃત્તિ સમારોહમાં વિદાય આપવામાં આવશે, જેમાં સંરક્ષણ પ્રધાન રાજનાથ સિંહ મુખ્ય મહેમાન તરીકે હાજર રહેશે. ચીફ ઓફ ડિફેન્સ સ્ટાફ જનરલ અનિલ ચૌહાણ, ત્રણેય સેનાના વડાઓ અને છ ભૂતપૂર્વ વાયુસેનાના વડાઓ સમારોહમાં હાજર રહેશે.   ફ્લાયપાસ્ટમાં ભાગ લેનારા ૨૩ સ્ક્વોડ્રનના છ મિગ-૨૧ વિમાનોને ઉતરાણ પર વોટર કેનન સલામી આપવામાં આવશે. આ ઔપચારિક નિવૃત્તિ સમારોહ પહેલા ૧૮-૧૯ ઓગસ્ટના રોજ રાજસ્થાનના બિકાનેરમાં નાલ એરફોર્સ સ્ટેશન ખાતે મિગ-૨૧ ફાઇટર જેટ્સે તેમની છેલ્લી ઓપરેશનલ ઉડાન ભરી હતી.

આ યુદ્ધોમાં દુશ્મનનો ચટાવી હતી ધૂળ

આ સુપરસોનિક જેટ્સે ૧૯૬૫ અને ૧૯૭૧ના પાકિસ્તાન સાથેના યુદ્ધોમાં પ્રભુત્વ મેળવ્યું હતું. ૧૯૯૯ના કારગિલ યુદ્ધ અને ૨૦૧૯ના બાલાકોટ હવાઈ હુમલામાં પણ તેમણે મુખ્ય ભૂમિકા ભજવી હતી. જો કે, છેલ્લા છ દાયકામાં, ભારતીય વાયુસેનાના સૌથી મહત્વપૂર્ણ વિમાન, મિગ-૨૧, અસંખ્ય અકસ્માતોમાં સામેલ થયા છે, અને આ વૃદ્ધ સોવિયેત-નિર્મિત વિમાન કાફલાના સલામતી રેકોર્ડ પર ઘણીવાર પ્રશ્ન ઉઠાવવામાં આવ્યા છે.