સોનમ વાંગચુકના ઉશ્કેરણીજનક નિવેદનોને કારણે લેહમાં હિંસા થઈ, કેન્દ્ર સરકારે પર્યાવરણવિદ્ પર સાધ્યું નિશાન

કેન્દ્રશાસિત પ્રદેશ લદ્દાખમાં થયેલા હિંસક વિરોધ પ્રદર્શનો ચાલી રહ્યા છે.  લેહમાં પ્રદર્શનકારીઓ અને સુરક્ષા કર્મચારીઓ વચ્ચે થયેલી અથડામણમાં અત્યાર સુધીમાં ચાર લોકોના મોત થયા છે, જ્યારે 30 થી વધુ લોકો ઘાયલ થયા છે. લેફ્ટનન્ટ ગવર્નર કવિન્દર ગુપ્તાએ અસરગ્રસ્ત વિસ્તારમાં કર્ફ્યુ લાદ્યો છે. હિંસા અંગેના એક સરકારી નિવેદનમાં પ્રદર્શનકારીઓના નેતા સોનમ વાંગચુકને નિશાન બનાવવામાં આવ્યા છે.

સરકારે જણાવ્યું છે કે વાંગચુકના ઉશ્કેરણીજનક નિવેદનોને કારણે લેહમાં હિંસા થઈ હતી. દરમિયાન, લદ્દાખને પૂર્ણ રાજ્યનો દરજ્જો અને છઠ્ઠી અનુસૂચિના વિસ્તરણ માટે વિરોધ કરી રહેલા પર્યાવરણ કાર્યકર્તા સોનમ વાંગચુકે હિંસાને ધ્યાનમાં રાખીને તેમની 15 દિવસની ભૂખ હડતાળ પાછી ખેંચી લીધી છે. 

બુધવારની હિંસા પર નિવેદન જારી કરીને સરકારે જણાવ્યું હતું કે ટોળા સતત પોલીસ અને સુરક્ષા કર્મચારીઓ પર હુમલો કરી રહ્યા હતા, જેના કારણે તેમને ગોળીબાર કરવા માટે મજબૂર કરવામાં આવ્યા હતા. કેટલાક લોકોના મોત થયા હોવાના અહેવાલ છે. આ ઘટનામાં 30 થી 40 પોલીસ કર્મચારીઓ પણ ઘાયલ થયા હતા. પૂર્ણ રાજ્યનો દરજ્જો મેળવવાની માંગણી સાથે ચાલી રહેલા ભૂખ હડતાળ અંગે કેન્દ્ર સરકારના પ્રતિભાવ અંગે, સરકારે જણાવ્યું હતું કે તે વાતચીત માટે સંપૂર્ણપણે તૈયાર છે, પરંતુ પ્રદર્શનકારીઓ તરફથી કોઈ સકારાત્મક પ્રતિભાવ મળ્યો નથી.

ભાજપે કોંગ્રેસ પર હુમલો કર્યો

ભાજપ નેતા સંબિત પાત્રાએ લદ્દાખ હિંસા માટે કોંગ્રેસને દોષી ઠેરવતા કહ્યું કે તે કોંગ્રેસનું આંદોલન હતું. તેમણે કહ્યું કે આ વિરોધ પ્રદર્શનમાં થયેલી હિંસાના ફૂટેજમાં અપર લેહ વોર્ડના કોંગ્રેસ કાઉન્સિલર સ્ટેનઝિંગ ત્સેપાંગ હિંસાનું નેતૃત્વ કરી રહ્યા છે. તે આ હિંસક વિરોધના મુખ્ય ચહેરા છે, જે તેમના કાર્યકરો દ્વારા હિંસા ભડકાવે છે.

લેફ્ટનન્ટ ગવર્નરે કર્ફ્યુ લાદ્યો

બુધવારે લદ્દાખમાં થયેલી હિંસા બાદ, લેફ્ટનન્ટ ગવર્નર કવિંદર ગુપ્તાએ હિંસા રોકવા માટે લેહ જિલ્લામાં કર્ફ્યુ લાદ્યો છે. તેમણે કહ્યું કે હિંસા માટે જવાબદાર લોકોની ઓળખ કરવામાં આવશે અને દેશના કાયદા અનુસાર તેમની સામે કડક કાર્યવાહી કરવામાં આવશે. લદ્દાખના લોકોને સંબોધતા ગુપ્તાએ કહ્યું, "સાવચેતીના પગલા તરીકે કર્ફ્યુ લાદવામાં આવ્યો છે. અહીં લોકોએ પોતાનો જીવ ગુમાવ્યો છે, અને હું તેમના પરિવારો પ્રત્યે સંવેદના વ્યક્ત કરું છું. 

લેફ્ટનન્ટ ગવર્નરે જણાવ્યું હતું કે કોઈપણ સ્વરૂપમાં હિંસા સહન કરવામાં આવશે નહીં. તેમણે પોલીસ અને જિલ્લા વહીવટીતંત્રને શાંતિ ભંગ કરવા અને સંપત્તિને નુકસાન પહોંચાડવા માટે જવાબદાર તમામ તત્વોને ઓળખવા અને તેમની સામે કડક કાર્યવાહી કરવાનો નિર્દેશ આપ્યો હતો.