પૂજા ખેડકર બાદ હવે આ 6 IAS અધિકારીઓ પર લટકી તલવાર, મેડિકલ સર્ટિફિકેટની થશે તપાસ

ડિપાર્ટમેન્ટ ઓફ પર્સોનલ એન્ડ ટ્રેનિંગ (DoPT) તાલીમાર્થીઓ અને સેવા આપતા અધિકારીઓના પ્રમાણપત્રો વિશે ખૂબ જ સભાન બન્યું છે. રિપોર્ટ અનુસાર, મહારાષ્ટ્ર કેડરની પૂર્વ ટ્રેઇની IAS પૂજા ખેડકરના વિવાદ બાદ ઘણા IAS અધિકારીઓના મેડિકલ સર્ટિફિકેટ સોશિયલ મીડિયા પર વાયરલ થઈ રહ્યા છે. હવે એમાં 6 અધિકારીઓના સર્ટિફિકેટ પણ ડિપાર્ટમેન્ટ ઓફ પર્સોનલ એન્ડ ટ્રેનિંગ દ્વારા ચકાસણી હેઠળ આવ્યા છે. રિપોર્ટ મુજબ પર્સોનલ ડિપાર્ટમેન્ટે પ્રોબેશનર્સ અને સર્વિસિંગ ઓફિસર્સ સહિત 6 અન્ય અધિકારીઓના મેડિકલ સર્ટિફિકેટની તપાસ શરૂ કરી દીધી છે.

હકીકતમાં, યુનિયન પબ્લિક સર્વિસ કમિશન (UPSC) એ ગયા બુધવારે તાલીમાર્થી IAS પૂજા ખેડકરની ઉમેદવારી રદ કરી હતી. ઉપરાંત, તેને ભવિષ્યમાં કોઈપણ પરીક્ષામાં બેસવા માટે પ્રતિબંધિત કરવામાં આવ્યો હતો. ખેડકરે પસંદગી માટે બનાવટી વિકલાંગતા અને અન્ય પછાત વર્ગ (ઓબીસી) પ્રમાણપત્રો રજૂ કર્યા હતા. આને ધ્યાનમાં રાખીને DoPT એ આરોગ્ય સેવાઓના મહાનિર્દેશકને ઉમેદવારોની વિકલાંગતા અંગેની સ્થિતિની ફરીથી તપાસ કરવા માટે પત્ર લખ્યો છે.

જણાવી દઈએ કે, દિલ્હીની એક કોર્ટે ગુરુવારે પૂજા ખેડકરને આગોતરા જામીન આપવાનો ઈન્કાર કરી દીધો હતો. એડિશનલ સેશન્સ જજ દેવેન્દ્ર કુમાર જાંગલાએ કહ્યું કે દિલ્હી પોલીસે એ પણ તપાસ કરવી જોઈએ કે UPSCમાં કોઈએ ખેડકરને મદદ કરી હતી કે કેમ. ન્યાયાધીશે આ કેસમાં તપાસનો વિસ્તાર પણ વધાર્યો છે.

ઉપરાંત, દિલ્હી પોલીસને અન્ય ઉમેદવારોએ પાત્રતા વિના OBC અને PWD ક્વોટા હેઠળ લાભો મેળવ્યા છે કે કેમ તેની તપાસ કરવાનો નિર્દેશ આપવામાં આવ્યો હતો. સુનાવણી દરમિયાન, વકીલો પ્રોસિક્યુશન તેમજ યુપીએસસી માટે હાજર હતા. ખેડકરે તંત્ર સાથે છેતરપિંડી કરી હોવાનો દાવો કરીને તેમણે અરજીનો વિરોધ કર્યો હતો.