Video: દિલ્હીના ૧૧ થી વધુ વિસ્તારોમાં પ્રદૂષણ ૪૦૦ ને પાર!
રાજધાની દિલ્હીમાં વાયુ પ્રદૂષણથી હાહાકાર!
દિલ્હીના ૧૧ થી વધુ વિસ્તારોમાં પ્રદૂષણ ૪૦૦ ને પાર!
દિવાળી નિમિત્તે રાજધાનીમાં શ્વાસ લેવો બન્યો મુશ્કેલ!
રાષ્ટ્રીય રાજધાની દિલ્હીમાં વાયુ પ્રદૂષણનું સ્તર દિનપ્રતિદિન ભયાનક અને જીવલેણ મોડ ધારણ કરી રહ્યું છે. રવિવારની સવારે દિલ્હીના અનેક વિસ્તારોમાં ઝેરી સ્મોગની ઘેરી ચાદર છવાયેલી જોવા મળી હતી, જેના કારણે હવાની ગુણવત્તા અત્યંત ખરાબ અને ગંભીર શ્રેણીમાં નોંધાઈ છે. સેન્ટ્રલ પોલ્યુશન કન્ટ્રોલ બોર્ડના આંકડા અનુસાર, દિલ્હીના પંજાબી બાગ વિસ્તારમાં હવા સૌથી વધુ ઝેરી બની છે, જ્યાં AQI ૪૫૨ ના ભયજનક સ્તરે પહોંચી ગયો છે. આ ઉપરાંત આર.કે. પુરમમાં ૪૪૯, આઈઆઈટી દિલ્હીમાં ૪૪૬ અને પશ્ચિમ દિલ્હીના દ્વારકામાં ૪૪૪ AQI નોંધાયો છે, જે દર્શાવે છે કે સ્થિતિ કેટલી ગંભીર છે. દિલ્હીના ૧૧ થી વધુ મુખ્ય વિસ્તારોમાં એર ક્વોલિટી ઇન્ડેક્સ ૪૦૦ ના આંકડાને પાર કરી ચૂક્યો છે. આઈઆઈટીસી મથુરા રોડમાં ૪૨૫, સિરીફોર્ટમાં ૪૨૩, નોર્થ કેમ્પસમાં ૪૨૩, ચાંદની ચોકમાં ૪૧૭, પૂસામાં ૪૧૫ અને બુરાડી ક્રોસિંગ પર ૪૧૧ AQI નોંધાતા સમગ્ર દિલ્હી રેડ ઝોનમાં મુકાઈ ગયું છે. આ સિવાય અક્ષરધામ મંદિર પરિસર, ઇન્ડિયા ગેટ, એઈમ્સ અને આઈટીઓ જેવા વિસ્તારોમાંથી સામે આવેલા દ્રશ્યોમાં ચારેય તરફ માત્ર ધુમ્મસના ગોટેગોટા જ નજરે પડે છે. સ્થાનિક નાગરિકોનું કહેવું છે કે સવારના સમયે મોર્નિંગ વોક પર નીકળવું કે વાહન ચલાવવું અત્યંત જોખમી બની ગયું છે.
અક્ષરધામ અને ઇન્ડિયા ગેટ ઝેરી સ્મોગના ગાઢ થરમાં ગરકાવ થતા નાગરિકો ત્રાહિમામ!
દિવાળીના પાવન પર્વ નિમિત્તે દિલ્હી-એનસીઆરમાં ફેલાયેલું આ ઝેરી પ્રદૂષણ લોકોના સ્વાસ્થ્ય માટે મોટો ખતરો બની ગયું છે. પ્રશાસન દ્વારા પ્રદૂષણ પર કાબૂ મેળવવા માટે ગ્રેડેડ રિસ્પોન્સ એક્શન પ્લાન એટલે કે ગ્રેપ-૩ની કડક પાબંદીઓ લાગુ કરવામાં આવી હોવા છતાં હવાઈ ગુણવત્તામાં કોઈ મોટો સુધારો જોવા મળી રહ્યો નથી. આઈટીઓ, નરેલા, મંદિર માર્ગ, ઉત્તમ નગર અને લોધી રોડ જેવા વિસ્તારોમાં પણ AQI ૩૩૩ થી ૩૯૯ ની વચ્ચે એટલે કે બેહદ ખરાબ શ્રેણીમાં બનેલો છે, જેના કારણે ગળામાં રૂંધામણ, આંખોમાં બળતરા અને શ્વાસ સંબંધિત સમસ્યાઓ ઝડપથી વધી રહી છે. નિષ્ણાતો અને ડોક્ટરોએ ખાસ કરીને બાળકો, વૃદ્ધો અને અસ્થમાના દર્દીઓને ઘરની બહાર ન નીકળવા તેમજ માસ્કનો ઉપયોગ કરવાની સલાહ આપી છે. જો આગામી દિવસોમાં હવામાનમાં સુધારો નહીં થાય અથવા તંત્ર દ્વારા વધુ કડક પગલાં ભરવામાં નહીં આવે, તો દિલ્હીમાં સ્વાસ્થ્ય કટોકટી વધુ ઘેરી બનવાની શક્યતા સેવાઈ રહી છે. પ્રદૂષણના આ કહેર વચ્ચે દિલ્હીવાસીઓ હવે માત્ર વરસાદ અથવા કુદરતી રાહતની આશા રાખીને બેઠા છે.
બ્યૂરો રિપોર્ટ જીએસટીવી
