'દલાલો અને જમાઈઓને હરિયાણા સોંપી ભ્રષ્ટાચાર આચર્યો, કોંગ્રેસ આવી તો રાજ્યને બરબાદ કરશે'ः પીએમ મોદી

હરિયાણામાં ચૂંટણી રેલીને સંબોધતા પીએમ નરેન્દ્ર મોદીએ બુધવારે કહ્યું હતું કે, અહીં ભારતીય જનતા પાર્ટી માટે સમર્થન સતત વધી રહ્યું છે, પરંતુ હરિયાણામાં વિધાનસભાની ચૂંટણી નજીક આવતાં કોંગ્રેસ પોતાનું સામ્રાજ્ય ગુમાવતી જોઈ રહી છે. પીએમ મોદીએ સોનીપતમાં એક વિશાળ જનસભાને સંબોધતા કહ્યું, “જેમ જેમ મતદાનનો દિવસ નજીક આવી રહ્યો છે તેમ તેમ કોંગ્રેસ સત્તામાં આવવાની આશા ગુમાવી રહી છે. હરિયાણામાં ભાજપનું સમર્થન દિવસેને દિવસે વધી રહ્યું છે.  

પીએમ મોદીએ કોંગ્રેસ પર મોટા આરોપો લગાવ્યા

પીએમ મોદીએ કોંગ્રેસ પર મોટા આરોપો લગાવતા કહ્યું કે, આ લોકોએ હરિયાણાને "દલાલો" અને "જમાઈઓ" ને સોંપી દીધું. જોકે મોદીએ સ્પષ્ટપણે કોઈનું નામ લીધું ન હતું. કોંગ્રેસે જ્યાં પણ પોતાનો પગ રાખ્યો ત્યાં ભ્રષ્ટાચાર અને 'ભત્રીજાવાદ'ને પ્રોત્સાહન આપ્યું છે. કોંગ્રેસે સરકારી તંત્રમાં ભ્રષ્ટાચારને જન્મ આપ્યો છે. કોંગ્રેસ પાર્ટી આપણા દેશમાં ભ્રષ્ટાચારની માતા છે.

ભ્રષ્ટાચાર અંગે કહ્યું હતું કે, જે પક્ષનો હાઈકમાન્ડ ભ્રષ્ટાચારમાં સંડોવાયેલો હોય ત્યાં નીચેના કાર્યકરોને મફતમાં ભ્રષ્ટાચારનું લાયસન્સ મળે છે. 10 વર્ષ પહેલા જ્યારે હરિયાણામાં કોંગ્રેસની સરકાર હતી ત્યારે આ જ રીતે લૂંટફાટ કરવામાં આવી હતી.

પોતાના સંબોધન દરમિયાન પીએમ મોદીએ લોકો સમક્ષ સ્વીકાર્યું કે, તેમના રાજકીય જીવનમાં હરિયાણાનું મોટું યોગદાન છે. આજે તેઓ જે પણ સ્થાને પહોંચ્યા તેમાં હરિયાણાનો મોટો ફાળો રહ્યો છે. આજે બીજેપી સરકારના નેજા હેઠળ હરિયાણા કૃષિ અને ઉદ્યોગ બંનેની દૃષ્ટિએ દેશના ટોચના રાજ્યોમાં પોતાનું સ્થાન બનાવી રહ્યું છે. જ્યારે ઔદ્યોગિકીકરણ વધે છે ત્યારે ગરીબો, ખેડૂતો અને દલિતોને સૌથી વધુ ફાયદો થાય છે.

રેલી દરમિયાન એક હૃદયસ્પર્શી ક્ષણમાં મોદીએ ભીડમાંના એક યુવાન છોકરા તરફ ઈશારો કર્યો જેણે વડાપ્રધાનનું ચિત્ર દોર્યું હતું. મોદીએ છોકરાને અંગત પત્ર લખવાનું વચન આપ્યું હતું અને તેને તેની સુરક્ષા ટીમને ફોટોગ્રાફ સોંપવા કહ્યું હતું.