Video: "કોઈ ડેમ બનતા રોકી શકતું નથી" — PM મોદી સામે ડી.કે. શિવકુમારે આપેલા નિવેદનથી દક્ષિણના રાજકારણમાં ભૂકંપ
કાવેરી નદી પર મેકેદાતુ ડેમના વિવાદિત મુદ્દે કોંગ્રેસ વિરુદ્ધ કોંગ્રેસની સ્થિતિ સર્જાઈ છે. કર્ણાટક આ પ્રોજેક્ટ માટે જોર લગાવી રહ્યું છે, જ્યારે તમિલનાડુ તેનો વિરોધ કરી રહ્યું છે. કર્ણાટકમાં કોંગ્રેસની સરકાર છે, ત્યારે તમિલનાડુમાં પણ કોંગ્રેસ તે સરકારનો હિસ્સો છે, જેનું નેતૃત્વ વિજય કરી રહ્યા છે.
તમિલનાડુ કોંગ્રેસ અધ્યક્ષે ડી.કે. શિવકુમારની આકરી ટીકા કરી
તમિલનાડુ કોંગ્રેસ અધ્યક્ષ મણિક્કમ ટાગોરે શનિવારે 14 નવેમ્બરના રોજ કાવેરી જળ વિવાદ પર કર્ણાટકના મુખ્યમંત્રી ડી.કે. શિવકુમારના નિવેદનોની આકરી ટીકા કરી. તેમણે શિવકુમાર પર જિદ્દી વલણ અપનાવવાનો આરોપ લગાવ્યો, જે તમિલનાડુના ખેડૂતોના હિતોની વિરુદ્ધ છે અને બિલકુલ સ્વીકાર્ય નથી. આ પ્રતિક્રિયા મુખ્યમંત્રી શિવકુમારના તે આગ્રહના એક દિવસ બાદ આવી છે, જેમાં તેમણે વડાપ્રધાન નરેન્દ્ર મોદીની હાજરીમાં કેન્દ્ર સરકારને પ્રસ્તાવિત મેકેદાતુ પ્રોજેક્ટ માટે જરૂરી કાયદાકીય મંજૂરીઓમાં ઝડપ લાવવા કહ્યું હતું.
કર્ણાટકના મુખ્યમંત્રીએ શુક્રવારે મૈસૂરમાં વડાપ્રધાન નરેન્દ્ર મોદીની હાજરીમાં આયોજિત એક કાર્યક્રમ દરમિયાન કહ્યું હતું કે, 'તમે હમણાં કાવેરી પર બંધ જોયો. સુપ્રીમ કોર્ટે અમને સૌને સ્પષ્ટ ચુકાદો આપ્યો છે કે મેકેદાતુનું નિર્માણ કર્ણાટકમાં થવાનું છે અને કોઈ તેને રોકી શકતું નથી. અમે ઈચ્છીએ છીએ કે તમે કાયદાકીય રીતે અમારી મદદ કરો.'
મણિક્કમ ટાગોરે ટ્રિબ્યુનલના અંતિમ ચુકાદાની અવગણનાનો આરોપ લગાવ્યો
આ નિવેદન પર પ્રતિક્રિયા આપતા, તમિલનાડુ કોંગ્રેસ અધ્યક્ષ મણિક્કમે સોશિયલ મીડિયા પ્લેટફોર્મ પર લખ્યું કે શિવકુમાર એવા નિવેદનો આપી રહ્યા છે, જે સુપ્રીમ કોર્ટના ચુકાદા અને કાવેરી જળ વિવાદ ટ્રિબ્યુનલના અંતિમ ચુકાદાની અવગણના કરે છે. તે અત્યંત નિંદનીય છે કે મૈસૂરમાં વડાપ્રધાન નરેન્દ્ર મોદીની હાજરીમાં કર્ણાટકના મુખ્યમંત્રી ડી.કે. શિવકુમારે કહ્યું કે મેકેદાતુમાં બંધના નિર્માણને કોઈ રોકી શકતું નથી અને એમ પણ કહ્યું કે કેન્દ્ર સરકારે આ માટે અંતિમ મંજૂરી આપી દેવી જોઈએ.
તમિલનાડુના જળ અધિકારો પર અસર પડવાની ચિંતા વ્યક્ત કરી
ટાગોરે કહ્યું કે કર્ણાટકના મુખ્યમંત્રી સતત જિદ્દી વલણ અપનાવી રહ્યા છે, જે સુપ્રીમ કોર્ટના ચુકાદા અને કાવેરી જળ વિવાદ ટ્રિબ્યુનલના અંતિમ ચુકાદાનું ખુલ્લું ઉલ્લંઘન છે. આ નિવેદન સંઘીય માળખાના સિદ્ધાંતોની વિરુદ્ધ છે અને તમિલનાડુના ખેડૂતોની આજીવિકાને નષ્ટ કરનારું છે. આ બિલકુલ સ્વીકાર્ય નથી. તેમણે આગળ દલીલ કરી કે કર્ણાટક, જે કાવેરી નદી બેસિનમાં ઉપરના ભાગમાં આવેલું છે, તે એકલા હાથે એવો કોઈ પ્રોજેક્ટ શરૂ કરી શકે નહીં, જે તમિલનાડુના જળ અધિકારોને પ્રભાવિત કરે, કારણ કે તમિલનાડુ નદીના નીચેના ભાગમાં આવેલું છે. કર્ણાટકમાં કોંગ્રેસી CM ડીકે શિવકુમારના તાજેતરના નિવેદન બાદ તમિલનાડુ કોંગ્રેસે ફરી એકવાર આ પ્રોજેક્ટનો વિરોધ તેજ કરી દીધો છે.
