હવે દુશ્મનોની ખેર નહીં! INS બેતવાની શક્તિ વધારવા સરકારે કર્યો ₹500 કરોડનો કરાર

ભારતીય નૌકાદળના યુદ્ધ જહાજ INS બેતવાને વધુ આધુનિક અને શક્તિશાળી બનાવવા માટે સંરક્ષણ મંત્રાલયે એક મોટું પગલું ભર્યું છે. 11 નવેમ્બર 2026ના રોજ નવી દિલ્હી ખાતે રક્ષા સચિવ રાજેશ કુમાર સિંહની ઉપસ્થિતિમાં સંરક્ષણ મંત્રાલય અને કોચીન શિપયાર્ડ લિમિટેડ વચ્ચે 498.58 કરોડ રૂપિયાનો કરાર કરવામાં આવ્યો છે. આ ડીલ હેઠળ ભારતીય નૌકાદળના બ્રહ્મપુત્ર ક્લાસ ફ્રિગેટ INS બેતવાનું સામાન્ય રિફિટિંગ અને રી-પાવરિંગ કરવામાં આવશે, જેનાથી આ યુદ્ધ જહાજનો સંપૂર્ણ કાયાકલ્પ થશે.

સ્ટીમ એન્જિન હટાવી અદ્યતન ડીઝલ સિસ્ટમ અને નવા હથિયારો જોડાશે

આ આધુનિકીકરણ પ્રોજેક્ટ હેઠળ જહાજમાં રહેલી જૂની સ્ટીમ આધારિત પ્રોપલ્શન સિસ્ટમને સંપૂર્ણપણે હટાવીને તેની જગ્યાએ આધુનિક ડીઝલ એન્જિન સિસ્ટમ લગાવવામાં આવશે. આ સાથે જ તેની લડાયક ક્ષમતાઓને નવી ઊંચાઈએ લઈ જવા માટે અત્યાધુનિક હથિયાર સ્યુટ પણ ફીટ કરવામાં આવશે. આ ફેરફારોથી જહાજની ઓપરેશનલ કાર્યક્ષમતા અને ક્ષમતામાં મોટો સુધારો જોવા મળશે.

50થી વધુ MSME જોડાશે અને રોજગારીની નવી તકો સર્જાશે

આ પ્રોજેક્ટથી દેશમાં જહાજ રિપેરિંગ અને જાળવણી ક્ષેત્રે સ્વદેશી ટેકનોલોજીને ભારે પ્રોત્સાહન મળશે. ખાસ કરીને જટિલ પ્રોપલ્શન સિસ્ટમ બદલવા અને નૌકાદળના પ્લેટફોર્મને આધુનિક બનાવવાના કામમાં ભારતીય ક્ષમતા વધુ મજબૂત થશે. આ સમગ્ર પ્રોજેક્ટમાં 50થી વધુ સૂક્ષ્મ, લઘુ અને મધ્યમ ઉદ્યોગો (MSME) ભાગીદાર બનશે, જેના કારણે જહાજ નિર્માણ અને તેની સાથે સંકળાયેલા સહાયક ઉદ્યોગોમાં મોટા પાયે નવી રોજગારી ઊભી થશે.

આત્મનિર્ભર ભારત અભિયાન અને નેવીની સજ્જતાને મળશે વેગ

આ મહત્વપૂર્ણ કરાર વડાપ્રધાનના આત્મનિર્ભર ભારત વિઝનને સાકાર કરવાની દિશામાં મોટું પગલું છે. INS બેતવા જેવા અનુભવી પ્લેટફોર્મને નવી પેઢીની ટેકનોલોજીથી સજ્જ કરવાથી ભારતીય નૌકાદળ લાંબા સમય સુધી પોતાની ઓપરેશનલ તૈયારીઓ મજબૂત રાખી શકશે. આ સોદો ભારતીય નૌકાદળના કાફલાને આધુનિક બનાવવા ઉપરાંત સ્થાનિક સંરક્ષણ ઉદ્યોગને આત્મનિર્ભર બનાવવામાં મહત્વની ભૂમિકા ભજવશે.