'કોઈની માફી નહીં માંગુ' મમતાના મંત્રી અખિલ ગિરીએ રાજીનામું આપવાની જાહેરાત કરી

પશ્ચિમ બંગાળના જેલ મંત્રી અખિલ ગિરીનો એક વીડિયો સોશિયલ મીડિયા પર વાયરલ થયો છે. આ પછી તેની પરેશાનીઓ સતત વધી રહી છે. સીએમ મમતા બેનર્જીના આદેશ બાદ અખિલ ગિરીએ મંત્રી પદ પરથી રાજીનામું આપવાની જાહેરાત કરી હતી. ભારતીય જનતા પાર્ટી (BJP)એ જેલ મંત્રીની ટીકા કરી હતી. આ પછી TMCએ ડેમેજ કંટ્રોલ કરવા માટે જેલ મંત્રીને રાજીનામું આપવા કહ્યું.

સીએમ મમતા બેનર્જીએ મહિલા અધિકારી સાથે ગેરવર્તણૂકના મામલામાં જેલ મંત્રી અખિલ ગિરીને તેમના પદ પરથી રાજીનામું આપવાનો આદેશ આપ્યો હતો. જેના પર મંત્રીએ રાજીનામું આપવાની જાહેરાત કરી હતી. અખિલ ગિરીએ કહ્યું કે તેઓ સોમવારે રાજીનામું આપી દેશે. તેમણે કહ્યું કે જો પાર્ટી સૂચન કરશે તો પણ તેઓ કોઈની માફી નહીં માંગે.

જાણો શું છે સમગ્ર મામલો

જેલ મંત્રી અખિલ ગિરીનો એક વીડિયો સામે આવ્યો હતો, જેમાં તેમણે મહિલા વન અધિકારી સાથે ગેરવર્તન કર્યું હતું. તેમણે મહિલા અધિકારીને કહ્યું હતું કે તમે સરકારી કર્મચારી છો, બોલતી વખતે માથું નમાવવું જોઈએ. તમે જોશો કે એક અઠવાડિયામાં તમારી સ્થિતિ શું થશે. આ ગુંડાઓ… તમે ઘરે જઈ શકશો નહિ. જો તું તારું વર્તન નહિ સુધારે તો હું તને લાકડી વડે માર મારીશ.

ભાજપે સીએમ મમતા પર નિશાન સાધ્યું હતું

આ મામલે ભાજપે સીએમ મમતા બેનર્જી પર નિશાન સાધ્યું હતું. તેમણે કહ્યું કે મંત્રી અખિલ ગિરીએ મહિલા અધિકારીને ધમકી આપી કારણ કે તે ગેરકાયદેસર અતિક્રમણ દૂર કરવાની ફરજ બજાવી રહી હતી. શું મમતા બેનર્જી આ મંત્રીને જેલમાં નાખશે? શું તે મંત્રી સામે કેસ કરશે? આ મામલે ડેમેજ કંટ્રોલ કરવા માટે સીએમ મમતાએ જેલ મંત્રી અખિલ ગિરીનું રાજીનામું માંગ્યું હતું.