મહારાષ્ટ્ર:NCPના વડા અજિત પવારે કાકા શરદ પવારના કર્યા ભરપેટ વખાણ, શું આ કોઈ સંકેત?

રાષ્ટ્રવાદી કોંગ્રેસ પાર્ટી (NCP)ના વડા અને મહારાષ્ટ્રના નાયબ મુખ્ય પ્રધાન અજિત પવારે સોમવારે પાર્ટીના સ્થાપના દિવસના અવસરે તેમના કાકા શરદ પવારનો 1999માં તેની સ્થાપના પછીથી પક્ષને આગળ લઈ જવા માટે તેમના યોગદાન માટે આભાર માન્યો. અજિત પવારનું આ નિવેદન એવા સમયે આવ્યું છે, જ્યારે તાજેતરમાં પૂર્ણ થયેલી લોકસભા ચૂંટણીમાં NCPનું પ્રદર્શન સારું રહ્યું નથી.

મુંબઈમાં પાર્ટીના કાર્યક્રમમાં અજિત પવારે પુનરોચ્ચાર કર્યો કે તેઓ નરેન્દ્ર મોદી સરકારમાં કેબિનેટ મંત્રી પદથી ઓછા કંઈપણ માટે સમાધાન કરશે નહીં. જો કે, તેમણે એમ પણ કહ્યું, "અમે હજી પણ NDAનો ભાગ છીએ."

અજિત પવારે શરદ પવારનો આભાર માન્યો 

અજિત પવારે કહ્યું, "હું છેલ્લા 24 વર્ષથી પાર્ટીનું નેતૃત્વ કરવા બદલ શરદ પવારજીનો, તેમજ પાર્ટીની શરૂઆતથી જે લોકો સાથે રહ્યા છે તેમનો આભાર માનું છું.".શરદ પવાર રાષ્ટ્રવાદી કોંગ્રેસ પાર્ટીના સ્થાપક છે. જુલાઈ 2023 માં, અજિત પવાર અને કેટલાક અન્ય નેતાઓ પાર્ટી વિરુદ્ધ બળવો કરીને મહારાષ્ટ્રમાં શિવસેના-ભાજપ સરકારમાં જોડાયા હતા.