Video: છાંગૂ ઝીલ અને નાથુલા સહિત સિક્કિમના પહાડી વિસ્તારોમાં કાતિલ ઠંડી

સિક્કિમમાં ઠંડીનો પ્રકોપ સતત વધી રહ્યો છે અને રાજ્યના ઊંચાઈવાળા વિસ્તારોમાં તાપમાન ઝડપથી નીચે જઈ રહ્યું છે. હવામાન વિભાગના પૂર્વાનુમાન મુજબ આગામી ૧૦ નવેમ્બર સુધી છાંગૂ ઝીલ અને નાથુલામાં કડકડતી ઠંડી પડવાની સંભાવના છે. આગામી દિવસોમાં છાંગૂ ઝીલ વિસ્તારમાં લઘુત્તમ તાપમાન શૂન્યથી બે ડિગ્રી નીચે, જ્યારે નાથુલામાં શૂન્યથી પાંચ ડિગ્રી નીચે સુધી જઈ શકે છે, જેના કારણે સવાર અને રાત્રે ઠંડા પવનો ફૂંકાશે. હાલમાં છાંગૂ ઝીલમાં મહત્તમ તાપમાન ૮ અને લઘુત્તમ તાપમાન શૂન્ય ડિગ્રી નોંધાઈ રહ્યું છે, જ્યારે નાથુલામાં તે મહત્તમ ૪ અને લઘુત્તમ માઈનસ ૪ ડિગ્રી સુધી પહોંચી ગયું છે. હવામાન વિભાગના જણાવ્યા મુજબ આ વિસ્તારોમાં આંશિક વાદળછાયું વાતાવરણ રહી શકે છે, પરંતુ હાલમાં વરસાદ કે બરફવર્ષાની કોઈ ચેતવણી આપવામાં આવી નથી. ભારત-તિબ્બત સરહદ પાસેના વિસ્તારોમાં પણ મોટા ફેરફારની સંભાવના નથી.