મુંબઈમાં હિટ એન્ડ રનનો વધુ એક બનાવ, ફોર્ચ્યુનરની ટક્કરથી મહિલા પ્રોફેસરે ગુમાવ્યો જીવ 

મુંબઈને અડીને આવેલા વિરારમાં હિંટ એન્ડ રનનો મામલો સામે આવ્યો છે. અહીં ફોર્ચ્યુનર કારની ટક્કરમાં 45 વર્ષની પ્રોફેસરનું મૃત્યુ થયું છે. ફોર્ચ્યુનર ચલાવતો 25 વર્ષનો યુવક નશામાં હતો. પ્રારંભિક માહિતી અનુસાર, ગયા ગુરુવારે વિરારમાં એક નશામાં ધૂત યુવક ખૂબ જ તેજ ગતિએ ફોર્ચ્યુનર એસયુવી ચલાવી રહ્યો હતો. આ દરમિયાન તેણે 45 વર્ષની પ્રોફેસરને ટક્કર મારી હતી. આ અકસ્માતમાં પ્રોફેસરનું મોત થયું હતું. પોલીસે ફોર્ચ્યુનર ચલાવનાર વ્યક્તિની ધરપકડ કરી છે. ધરપકડ કરાયેલ વ્યક્તિની ઓળખ 25 વર્ષીય શુભમ પાટીલ તરીકે થઈ છે.

અંગ્રેજી પ્રોફેસર આત્મજા કસાટનું અવસાન

પોલીસના જણાવ્યા અનુસાર ફોર્ચ્યુનરની સ્પીડનો અંદાજ એ વાત પરથી લગાવી શકાય છે કે ટક્કર થયા બાદ પ્રોફેસર રસ્તા પર પડતા પહેલા હવામાં કેટલાય ફૂટ ઊંચે ઉછળ્યા હતા. પ્રોફેસરની ઓળખ આત્મજા કસાટ તરીકે થઈ છે, જે અંગ્રેજીના પ્રોફેસર છે.

સ્પીડિંગ ફોર્ચ્યુનરે પાછળથી ટક્કર મારી

જણાવવામાં આવી રહ્યું છે કે આત્મજા કસાટ  કોલેજ કેમ્પસથી ગોકુલ ટાઉનશીપ સ્થિત પોતાના ઘર તરફ જઈ રહી હતી. ત્યારે પાછળથી પુરપાટ ઝડપે આવતી ફોર્ચ્યુનરે તેને ટક્કર મારી હતી. એક પોલીસ અધિકારીએ જણાવ્યું કે આરોપી શુભમ પાટીલે પ્રોફેસરને ઘટનાસ્થળે લોહીથી લથપથ છોડીને ફરાર થવાનો પ્રયાસ કર્યો. અકસ્માત બાદ શુભમ પાટીલે પોતાની કાર સ્થળથી થોડે દૂર રોકીને ભાગવાનો પ્રયાસ કર્યો હતો પરંતુ સ્થાનિક લોકોએ તેને અટકાવ્યો હતો.

પોલીસે આરોપીની ધરપકડ કરી હતી

આ અકસ્માત બાદ અર્નાલા સાગરી પોલીસ સ્ટેશનમાં કેસ નોંધવામાં આવ્યો હતો અને આરોપી શુભમ પાટીલની ધરપકડ કરવામાં આવી હતી. આરોપી વિરુદ્ધ ભારતીય ન્યાય સંહિતા (BNS 2023)ની કલમ 105 અને 281 અને મોટર વાહન અધિનિયમ, 1988ની કલમ 184 અને 185 હેઠળ કેસ નોંધવામાં આવ્યો છે.