'ઘૂસણખોરોની સાથે કોંગ્રેસને પણ બાંગ્લાદેશ મોકલી દો', આ મુખ્યમંત્રી જાહેરમાં ગર્જ્યા

આસામના મુખ્યમંત્રી અને ઝારખંડ વિધાનસભા ચૂંટણી માટે ભાજપના સહ-પ્રભારી હિમંતા બિસ્વા સરમાએ કોંગ્રેસના નેતા ગુલામ અહેમદ મીરના નિવેદન સામે આકરી ઝાટકણી કાઢી છે. સરમાએ કહ્યું કે, મીરે ઘૂસણખોરોને એલપીજી સિલિન્ડર આપવાની વાત કરી છે. કોંગ્રેસ મત મેળવવા માટે આવું બધું કરી રહી છે. 

આ પણ વાંચોઃ'પોતાના માણસો ઉપર ડંડા ચલાવવા પડે', મોહન ભાગવતે કેમ આવું કહેવું પડ્યું 

ઝારખંડ મુક્તિ મોરચા (JMM)ની આગેવાની હેઠળની ગઠબંધન સરકાર પર બાંગ્લાદેશી ઘૂસણખોરોને 'સંરક્ષણ' આપવાનો આરોપ લગાવતા આસામના મુખ્ય પ્રધાન હિમંતા બિસ્વા શર્માએ મતદારોને રાજ્ય સરકારને હટાવવા માટે એક થવાની અપીલ કરી હતી.

હિમંતા બિસ્વા સરમા એ કહ્યું કે,  કોંગ્રેસના ગુલામ અહેમદ મીર કહી રહ્યા છે કે તેઓ ઘૂસણખોરોને એલપીજી સિલિન્ડર આપશે.ઘૂસણખોરોને જમીન અને પુત્રી બંને આપી રહ્યા છે. કારણ કે આ લોકો કોંગ્રેસની વોટબેંક છે. આ રાહુલ ગાંધીની ભાષા છે. રાહુલ ગાંધીની મંજૂરી વિના આવી વાતો ન કહી શકે. આપણે આ ઘૂસણખોરોની સાથે સાથે કોંગ્રેસને પણ બાંગ્લાદેશ મોકલી દેવી જોઈએ.

કયા મુદ્દે હોબાળો થયો?

કોંગ્રેસના મહાસચિવ અને ઝારખંડના પ્રભારી ગુલામ અહેમદ મીરે ગુરુવારે નિવેદન આપ્યું હતું કે, જો તેમની પાર્ટી સત્તામાં આવશે, તો રાજ્યના તમામ નાગરિકો, પછી ભલે તે ઘૂસણખોર હોય કે ન હોય, દરેકને 450 રૂપિયામાં ગેસ સિલિન્ડર આપવામાં આવશે. આ નિવેદન બાદ ભાજપે આકરી પ્રતિક્રિયા આપી છે.  
'ભારત' જોડાણ તરફથી સ્પષ્ટતા

ઝારખંડ પ્રદેશ કોંગ્રેસ સમિતિએ કહ્યું છે કે, ભાજપ ગુલામ અહેમદ મીરના નિવેદનોને તોડી મરોડીને રજૂ કરી રહી છે. ઝારખંડ મુક્તિ મોરચાના પ્રવક્તા મનોજ પાંડેએ આ નિવેદન બાદ સર્જાયેલા રાજકીય ખળભળાટ મુદ્દે કહ્યું કે, ભાજપની ઘૂસણખોરીની વ્યાખ્યામાં ઘૂસણખોરોનો અર્થ મુસ્લિમ છે. આ ભારતીય જનતા પાર્ટીની વિચારસરણી છે. આ વિચારસરણી મુદ્દે ગુલામ અહેમદ મીરે કહ્યું હતું. તેમનું કહેવું હતું કે, ભાજપની ઘૂસણખોરીની વ્યાખ્યામાં ઘૂસણખોરોનો અર્થ મુસ્લિમ છે. પરંતુ તેમના વાયદા મુજબ તમામ ધર્મના લોકોને સિલિન્ડર આપવામાં આવશે.  હિન્દુ મુસ્લિમ એવી રાજનીતિ નહીં કરે.