શેખ હસીનાની વિરુદ્ધ દેશદ્રોહ મામલે આ દિવસે થશે સુનાવણી, બાંગ્લાદેશ કોર્ટનો મોટો નિર્ણય

બાંગ્લાદેશના ભૂતપૂર્વ વડા પ્રધાન શેખ હસીના પર ગંભીર રાજદ્રોહનો કેસ ચાલી રહ્યો છે, જેમાં તેમના પર વચગાળાની સરકારને અસ્થિર કરવાનું કાવતરું ઘડવાનો  આરોપ છે. ઢાકાની એક કોર્ટે આ કેસમાં આરોપો ઘડવા માટે 21 જાન્યુઆરી, 2026ના રોજ સુનાવણી નક્કી કરી છે. આ કેસ અવામી લીગ સાથે જોડાયેલા "જોય બાંગ્લા બ્રિગેડ" ની એક ઓનલાઈન મીટિંગ સાથે સંબંધિત છે. જેમાં હસીના સહિત અનેક લોકો હાજર હોવાનું કહેવાય છે. ઓગસ્ટ 2024માં મોટા વિદ્યાર્થી આંદોલન બાદ હસીના દેશ છોડીને ભારત ભાગી ગઈ હતી. એ પછી પ્રોફેસર મુહમ્મદ યુનુસના નેતૃત્વમાં વચગાળાની સરકાર આવી. આ કેસમાં કુલ 286 લોકો આરોપી છે, અને હસીના સહિત મોટાભાગના ફરાર છે.

ડિસેમ્બર 2024 માં હસીના અને સેંકડો અવામી લીગના સભ્યોએ "જોય બાંગ્લા બ્રિગેડ" નામના જૂથની ઓનલાઈન મીટિંગમાં ભાગ લીધો હતો. એવો આરોપ છે કે મીટિંગ દરમિયાન તેઓએ કથિત રીતે મુહમ્મદ યુનુસના નેતૃત્વ હેઠળની વચગાળાની સરકારને ઉથલાવી પાડવાનું કાવતરું ઘડ્યું હતું. આ જૂથ અવામી લીગ અને હસીનાના પિતા શેખ મુજીબુર રહેમાનના વારસાનું મજબૂત સમર્થક છે. સુનાવણી બાદ, ખાસ ન્યાયાધીશ અબ્દુસ સલામે હસીના અને અન્ય 285 લોકો સામે આરોપો ઘડવા માટે 21 જાન્યુઆરીનો દિવસ નક્કી કર્યો.

વિદ્યાર્થીઓના હિંસક વિરોધ પ્રદર્શન બાદ હસીના 5 ઓગસ્ટ, 2024 ના રોજ બાંગ્લાદેશ છોડીને ભારત આવી ગયા હતા. યુનુસે તે વર્ષની 8 ઓગસ્ટના રોજ વચગાળાની સરકારના વડા તરીકેનો કાર્યભાર સંભાળ્યો હતો. ગયા વર્ષે માર્ચ 2025માં CID દ્વારા કેસ નોંધવામાં આવ્યો હતો, જેણે 30 જુલાઈના રોજ 286 આરોપીઓના નામ સાથે ચાર્જશીટ દાખલ કરી હતી. અહેવાલ અનુસાર કોર્ટે 14 ઓગસ્ટના રોજ ચાર્જશીટ સ્વીકારી આરોપીઓ સામે ધરપકડ વોરંટ જારી કર્યું હતું. 11 સપ્ટેમ્બરના રોજ મુસાફરી પ્રતિબંધ લાદવામાં આવ્યો હતો, જ્યારે 14 ઓક્ટોબરે કોર્ટે અખબારોમાં નોટિસ પ્રકાશિત કરવાનો આદેશ આપ્યો હતો, જેમાં હસીના સહિત 261 ફરાર આરોપીઓને કોર્ટમાં હાજર રહેવાનું કહેવામાં આવ્યું હતું.

જણાવી દઈએ કે, ગત વર્ષે નવેમ્બરમાં આ કેસ ઢાકા મેટ્રોપોલિટન મેજિસ્ટ્રેટ કોર્ટથી ઢાકા મેટ્રોપોલિટન સેશન્સ કોર્ટમાં ટ્રાન્સફર કરવામાં આવ્યો હતો. ગયા વર્ષે વિદ્યાર્થીઓની આગેવાની હેઠળના વિરોધ પ્રદર્શનો પર સરકાર દ્વારા કરવામાં આવેલા કડક કાર્યવાહી બદલ માનવતા વિરુદ્ધના ગુનાઓ માટે ખાસ આંતરરાષ્ટ્રીય ગુના ટ્રિબ્યુનલ દ્વારા હસીનાને નવેમ્બરમાં મૃત્યુદંડની સજા ફટકારવામાં આવી હતી.