'બંધારણના દુશ્મનોનો હવે પર્દાફાશ થઈ ગયો', ચૂંટણી પંચમાં વિખવાદ વચ્ચે રાહુલ ગાંધીના સરકાર-CEC પર પ્રહાર
છેલ્લું અપડેટ : 24 Sept 2026
લોકસભામાં વિરોધ પક્ષના નેતા રાહુલ ગાંધીએ ચૂંટણી પંચ, એસઆઈઆર (SIR) અને મતદાર યાદી સાથે જોડાયેલા વિવાદ મુદ્દે નવી દિલ્હીમાં મહત્વની પ્રેસ કોન્ફરન્સ સંબોધી હતી. પ્રેસ કોન્ફરન્સ પૂર્વે તેમણે સોશિયલ મીડિયા પ્લેટફોર્મ X પર પોસ્ટ કરતાં જણાવ્યું હતું કે, બંધારણના દુશ્મનોનો પર્દાફાશ થઈ ગયો છે અને હવે જનતાને ન્યાય મળશે. આ પ્રેસ કોન્ફરન્સ મીડિયા રિપોર્ટ સામે આવ્યાના બરાબર એક દિવસ બાદ યોજાઈ હતી, જેમાં ચૂંટણી પંચની આંતરિક કામગીરી અને મતદાર યાદી સુધારણા પર ગંભીર સવાલો ઊભા કરવામાં આવ્યા છે.
રાહુલ ગાંધીના ચૂંટણી પંચ પર પ્રહાર
રાહુલ ગાંધીએ પોતાના સત્તાવાર સોશિયલ મીડિયા હેન્ડલ પર પોસ્ટ કરીને સીધો પ્રહાર કર્યો હતો કે, ચૂંટણી પંચના વિવાદોએ સાબિત કરી દીધું છે કે લોકશાહી સામે મોટું સંકટ છે. તેમણે સ્પષ્ટ શબ્દોમાં લખ્યું હતું કે દેશના બંધારણના દુશ્મનો હવે ખુલ્લા પડી ગયા છે અને જનતાને ચોક્કસપણે ન્યાય મળશે.
ભાજપની જીતનું રહસ્ય અને મત ચોરીના આક્ષેપો
પ્રેસ કોન્ફરન્સમાં રાહુલ ગાંધીએ આક્રમક વલણ અપનાવતા કહ્યું કે ભાજપની સતત જીત પાછળનું રહસ્ય હવે સ્પષ્ટ સમજાઈ ગયું છે કારણ કે મત ચોરીના પુરાવા ખુલ્લેઆમ સામે આવી રહ્યા છે. તેમણે ગંભીર આરોપ મૂક્યો કે વર્ષ 2024ની લોકસભા ચૂંટણી અને વિવિધ રાજ્યોની વિધાનસભા ચૂંટણીઓમાં મોટાપાયે વોટની હેરાફેરી થઈ છે. આ ચૂંટણી પ્રક્રિયા સાથે કરવામાં આવેલી છેડછાડ દરેક ભારતીય નાગરિકના મતાધિકારનું હનન છે.
CEC જ્ઞાનેશ કુમાર પર ગંભીર આરોપ અને વિપક્ષની તપાસની માંગ
મુખ્ય ચૂંટણી કમિશનર (CEC) જ્ઞાનેશ કુમારને સીધા નિશાના પર લેતા રાહુલ ગાંધીએ જણાવ્યું કે તેમની પસંદગી વડાપ્રધાન નરેન્દ્ર મોદી અને ગૃહમંત્રી અમિત શાહ દ્વારા કરવામાં આવી છે. ચૂંટણી વ્યવસ્થાના વિનાશ માટે જ્ઞાનેશ કુમાર સીધા જવાબદાર છે અને તેમણે ચૂંટણીઓમાં ગરબડ કરી છે. ચૂંટણી પંચના બે સાથી કમિશનરોએ જ તેમના નિર્ણયો સામે સવાલ ઉઠાવ્યા છે. આ દરમિયાન કોંગ્રેસ નેતા કેસી વેણુગોપાલ સહિત સમગ્ર વિપક્ષે જ્ઞાનેશ કુમારને પદ પરથી હટાવવા, SIR પ્રક્રિયા પર તાત્કાલિક રોક લગાવવા અને સુપ્રીમ કોર્ટની દેખરેખ હેઠળ સમગ્ર મામલાની નિષ્પક્ષ તપાસ કરાવવાની માંગ કરી છે.
સત્તા વિરોધી લહેર અને લોકશાહી સામે મોટો ખતરો
રાહુલ ગાંધીએ કહ્યું કે ભારતીય રાજકારણમાં સત્તા વિરોધી લહેર એક કુદરતી અને કાયમી સત્ય છે, જેમાંથી કોઈ બચી શકતું નથી. ઈન્દિરા ગાંધીએ 1971માં બાંગ્લાદેશ મુક્ત કરાવ્યા બાદ અત્યંત લોકપ્રિય હોવા છતાં બે-ત્રણ વર્ષમાં જ તેમને સત્તા વિરોધી લહેરનો સામનો કરવો પડ્યો હતો. પરંતુ આજે હરિયાણા, મહારાષ્ટ્ર કે ગુજરાત જેવા રાજ્યોમાં ભાજપ સામે આ લહેર અચાનક ગાયબ થઈ જાય છે. તેમણે કટાક્ષ કર્યો કે આવી સ્થિતિ માત્ર ઉત્તર કોરિયા કે ઈરાક જેવા દેશોમાં જોવા મળે છે જ્યાં લોકશાહી જ નથી હોતી. જો મત જ સુરક્ષિત ન રહે તો બંધારણ, તેના દ્વારા બનતા કાયદાઓ અને દેશની તમામ સંસ્થાઓ ગેરકાયદેસર અને બરબાદ બની જાય છે.
મહારાષ્ટ્ર, હરિયાણા અને એમપીની ચૂંટણી પ્રભાવિત થયાનો દાવો
ચૂંટણી પંચના આંતરિક વિવાદો અને અનિયમિતતાઓ તરફ ઈશારો કરતા તેમણે ભારપૂર્વક કહ્યું કે મહારાષ્ટ્ર, હરિયાણા અને મધ્યપ્રદેશ સહિતના રાજ્યોની ચૂંટણીઓ આ ગોટાળાથી પ્રભાવિત થઈ હતી. મતદાર યાદીમાં ગરબડ કરીને ચૂંટણી પરિણામો પલટાવવામાં આવ્યા હતા. જો ચોરી થયેલા મતોથી સાંસદો સંસદમાં પહોંચીને કાયદા બનાવતા હોય તો તે સમગ્ર વ્યવસ્થા જ ગેરકાયદેસર ઠરે છે.
10 મહિનામાં 14 વખત લેખિત વાંધો નોંધાયો
મીડિયા અહેવાલમાં દાવો કરવામાં આવ્યો છે કે ચૂંટણી પંચના બે ચૂંટણી કમિશનરોએ એસઆઈઆરને લઈને છેલ્લા 10 મહિનામાં ઓછામાં ઓછી 14 વખત લેખિત વાંધો નોંધાવ્યો હતો. આશ્ચર્યજનક બાબત એ છે કે તેમાંથી 4 વાંધા તો એક જ દિવસમાં નોંધાયા હતા, છતાં તેના પર કોઈ ચોક્કસ પગલાં લેવાયા નહોતા.
ચૂંટણી પંચની સ્પષ્ટતા અને સર્વસંમતિનો દાવો
બીજી તરફ આ સમગ્ર આંતરિક વિરોધ મુદ્દે ચૂંટણી પંચે ખુલાસો કર્યો છે કે પંચની બેઠકો દરમિયાન જુદા જુદા મંતવ્યો અને ટિપ્પણીઓ આવવી એ સામાન્ય વિચાર-વિમર્શ પ્રક્રિયાનો જ એક હિસ્સો છે. ચૂંટણી પંચના જણાવ્યા અનુસાર SIR સહિતના તમામ આખરી નિર્ણયો ત્રણેય ચૂંટણી કમિશનરોની પરસ્પર મંજૂરી અને પૂર્ણ સર્વસંમતિથી જ લેવામાં આવ્યા છે.
મુખ્ય ચૂંટણી કમિશનરને મોકલાઈ હતી આપત્તિઓની નકલો
અહેવાલ અનુસાર, ચૂંટણી કમિશનર સુખબીર સિંહ સંધૂ અને વિવેક જોશીએ 28 ઓક્ટોબર 2025થી 14 ઓગસ્ટ 2026 વચ્ચે પંચના વિવિધ નિર્ણયો પર 14 વખત લેખિત વાંધો વ્યક્ત કર્યો હતો. આ વાંધાઓ મતદાર યાદી, Form-6, નવા મતદારોની નોંધણી અને મતદાર ડેટાબેઝ સાથે જોડાયેલા હતા. આ તમામ આપત્તિઓની નકલો ચીફ ઇલેક્શન કમિશનર (CEC) જ્ઞાનેશ કુમારને પણ મોકલવામાં આવી હતી. આ આખો વિવાદ જૂન 2025માં બિહારથી શરૂ થયેલા એસઆઈઆર પ્રોજેક્ટ દરમિયાન સામે આવ્યો હતો.
ચૂંટણી પંચ સામે રાહુલ ગાંધીના અગાઉના પ્રહારો
રાહુલ ગાંધીએ આ પહેલાં પણ વર્ષ 2025 દરમિયાન મત ચોરીના મુદ્દે ચૂંટણી પંચ સામે 3 વખત પ્રેસ કોન્ફરન્સ કરીને આકરા પ્રહારો કર્યા હતા. તેમણે ચૂંટણી પંચની નિષ્પક્ષતા પર સવાલ ઉઠાવતાં તેને સરકારની ‘B ટીમ’ ગણાવી હતી અને ભાજપ સાથે મળીને ચૂંટણી પ્રક્રિયામાં ગરબડ કરવાનો સીધો આક્ષેપ કર્યો હતો. હવે તાજા રિપોર્ટના ખુલાસા બાદ આ મામલે રાજકીય ગરમાવો ચરમસીમાએ પહોંચી ગયો છે.
