Delhi Winter Action Plan: પહેલા જ દિવસે 68.4 લાખનો દંડ, 1,539 વાહનોને સરહદેથી પાછાં મોકલ્યાં
દિલ્હીમાં શિયાળાની ઋતુ દરમિયાન વધતા વાયુ પ્રદૂષણને નિયંત્રિત કરવા માટે શરૂ કરવામાં આવેલી વિન્ટર એક્શન પ્લાનની અમલવારીના પ્રથમ જ દિવસે તંત્રએ મોટી કાર્યવાહી કરી છે. રવિવારે વાહનો અને બાંધકામ સ્થળો સામે હાથ ધરાયેલા અભિયાનમાં કુલ 68.4 લાખ રૂપિયાનો દંડ અને પર્યાવરણીય વળતર વસૂલવામાં આવ્યું હતું. આ દરમિયાન લગભગ 15 હજાર વાહનોની તપાસ કરવામાં આવી હતી, જેમાં પ્રવેશના નિયમોનો ભંગ કરનારા 1,539 વાહનોને સરહદેથી જ પાછાં મોકલવામાં આવ્યા હતા.
સાંજે 5 વાગ્યા સુધીના સત્તાવાર આંકડા અનુસાર, પ્રદૂષણ નિયંત્રણ પ્રમાણપત્ર (PUCC)ના નિયમોનું ઉલ્લંઘન કરવા બદલ 566 ચલણ ઇશ્યૂ કરવામાં આવ્યાં હતાં, જેમાં 56.6 લાખ રૂપિયાનો દંડ ફટકારવામાં આવ્યો હતો. વાહનોના પ્રવેશ પ્રતિબંધના નિયમોનો ભંગ કરવા બદલ વધુ 2 લાખ રૂપિયાનો દંડ વસૂલવામાં આવ્યો હતો. જ્યારે બાંધકામ સ્થળોએ ધૂળ નિયંત્રણના નિયમોનું પાલન ન કરવા બદલ 9.8 લાખ રૂપિયાનું પર્યાવરણીય વળતર લાદવામાં આવ્યું હતું.
લગભગ 15 હજાર વાહનોની તપાસ, 1,539ને પાછાં મોકલ્યાં
દિલ્હી ટ્રાફિક પોલીસ અને પરિવહન વિભાગે દિલ્હીની બહાર નોંધાયેલાં BS-VI પહેલાંના વાહનો પર લાગુ પ્રતિબંધો અંતર્ગત કુલ 14,930 વાહનોની તપાસ કરી હતી. તેમાંથી આશરે 10.31 ટકા એટલે કે 1,539 વાહનોને પાછાં મોકલવામાં આવ્યાં હતાં. આ દરમિયાન 127 ચલણ ઇશ્યૂ કરાયાં હતાં અને 62 વાહનો જપ્ત કરવામાં આવ્યાં હતાં.
પાછાં મોકલવામાં આવેલાં વાહનોમાં 140 લાઇટ મોટર વ્હીકલ, 54 લાઇટ કોમર્શિયલ વ્હીકલ, 95 ભારે માલવાહક વાહનો અને 34 બસોનો સમાવેશ થાય છે. આ ઉપરાંત, 1,423 ટુ-વ્હીલર, થ્રી-વ્હીલર અને અન્ય વાહનોની તપાસ કરવામાં આવી હતી. તેમાંથી 789 વાહનોને પાછાં મોકલવામાં આવ્યાં હતાં અને 38 વાહનો જપ્ત કરાયાં હતાં.
અલગથી, દિલ્હીમાં પ્રવેશવાના હેતુ વગર પસાર થતાં 7,279 વાહનોની તપાસ કરવામાં આવી હતી, જેમાંથી 314 વાહનોને પાછાં મોકલવામાં આવ્યાં હતાં. જ્યારે CNG અને ઇલેક્ટ્રિક વાહનો તેમજ આવશ્યક સેવાઓ સાથે સંકળાયેલાં 740 વાહનોની ચકાસણી કરીને તેમને નિયમોમાંથી મુક્તિ હોવાથી પ્રવેશ આપવામાં આવ્યો હતો.
PUCC વગરનાં વાહનો સામે કાર્યવાહી
માન્ય PUCC વગર રસ્તા પર દોડતાં વાહનો સામેની કાર્યવાહીમાં ટ્રાફિક પોલીસે 493 ચલણ ઇશ્યૂ કરીને 49.3 લાખ રૂપિયાનો દંડ ફટકાર્યો હતો. જ્યારે પરિવહન વિભાગે 73 ચલણ ઇશ્યૂ કરીને 7.3 લાખ રૂપિયાનો દંડ વસૂલ્યો હતો.
300 બાંધકામ સ્થળોની તપાસ, 32માં નિયમોનું ઉલ્લંઘન
ધૂળના પ્રદૂષણને નિયંત્રિત કરવા માટે તંત્રએ 300 બાંધકામ સ્થળોનું નિરીક્ષણ કર્યું હતું. તેમાંથી 32 સ્થળોએ ધૂળ નિયંત્રણના નિયમોનું ઉલ્લંઘન થતું હોવાનું સામે આવ્યું હતું. આ કાર્યવાહી અંતર્ગત કુલ 9.8 લાખ રૂપિયાનું પર્યાવરણીય વળતર લાદવામાં આવ્યું હતું.
તપાસ કરાયેલાં 91 મોટાં બાંધકામ સ્થળોમાંથી 16 સ્થળોએ નિયમોનું પાલન ન થતું હોવાનું જણાયું હતું. આ સ્થળો સામે બે બંધ કરવાનો આદેશ અને ચાર કારણદર્શક નોટિસ આપવામાં આવી હતી. સાથે જ 4 લાખ રૂપિયાનું પર્યાવરણીય વળતર પણ લાદવામાં આવ્યું હતું.
બીજી તરફ, 209 નાનાં બાંધકામ સ્થળોમાંથી 17 સ્થળોએ નિયમોનું ઉલ્લંઘન થયું હતું. અહીં 15 બંધ કરવાનો આદેશ અને 15 કારણદર્શક નોટિસ આપવામાં આવી હતી. આ સ્થળો પર કુલ 5.8 લાખ રૂપિયાનું વળતર લાદવામાં આવ્યું હતું. જોકે, નિયમોમાંથી મુક્તિ આપવામાં આવેલા માળખાકીય સુવિધાના પ્રોજેક્ટ્સમાં કોઈ ઉલ્લંઘન નોંધાયું નહોતું.
પર્યાવરણ મંત્રીની લોકોને નિયમોનું પાલન કરવાની અપીલ
દિલ્હીના પર્યાવરણ મંત્રી મનજિન્દર સિંહ સિરસાએ જણાવ્યું હતું કે, અમલીકરણ ટીમો વાહનોના પ્રવેશ પ્રતિબંધ, PUCCની આવશ્યકતા અને બાંધકામ સ્થળોએ ધૂળ નિયંત્રણના નિયમોનું પાલન થાય છે કે નહીં તેના પર સતત નજર રાખી રહી છે.
સોશિયલ મીડિયા પ્લેટફોર્મ X પર પોસ્ટ કરતાં તેમણે જણાવ્યું હતું કે, “આજે 14,930 વાહનોની તપાસ કરવામાં આવી, PUCCના નિયમોના ભંગ બદલ 566 ચલણ ઇશ્યૂ કરાયાં અને 300 સ્થળોનું નિરીક્ષણ કરવામાં આવ્યું. તમારું PUC પ્રમાણપત્ર માન્ય રાખો, પ્રવેશના નિયમો અને ધૂળ નિયંત્રણના નિયમોનું પાલન કરો. સ્વચ્છ હવા માટે સૌના સહિયારા પ્રયાસો જરૂરી છે.”
1 નવેમ્બરથી 28 ફેબ્રુઆરી સુધી લાગુ રહેશે વિન્ટર એક્શન પ્લાન
વાયુ પ્રદૂષણને નિયંત્રિત કરવા માટે વિન્ટર એક્શન પ્લાન અંતર્ગત વિવિધ પ્રતિબંધો 1 નવેમ્બરથી 28 ફેબ્રુઆરી સુધી અલગ-અલગ સમયગાળા માટે અમલમાં રહેશે. આ નિયમો હેઠળ દિલ્હીની બહાર નોંધાયેલાં BS-VI પહેલાંનાં વાહનોને 31 જાન્યુઆરી સુધી રાજધાનીમાં પ્રવેશવા પર પ્રતિબંધ મૂકવામાં આવ્યો છે. ધૂળ ફેલાવતી તોડફોડની કામગીરી અને ખુલ્લામાં ચાલતી સિવિલ કન્સ્ટ્રક્શન પ્રવૃત્તિઓ પર પણ પ્રતિબંધ મૂકવામાં આવ્યો છે.
જોકે, જાહેર માળખાકીય સુવિધાના કેટલાક નિર્ધારિત આવશ્યક પ્રોજેક્ટ્સને મુક્તિ આપવામાં આવી છે. આ ઉપરાંત, કેટલીક છૂટછાટો સાથે 10 ડિસેમ્બરથી 20 જાન્યુઆરી સુધી બાંધકામ અને તોડફોડની તમામ પ્રવૃત્તિઓ પર સંપૂર્ણ પ્રતિબંધ લાગુ રહેશે.
આ સેવાઓને નિયમોમાંથી મુક્તિ અપાઈ
અધિકૃત પાર્કિંગ સ્થળોએ પાર્કિંગ ફીમાં 28 ફેબ્રુઆરી સુધી બમણો વધારો કરવામાં આવ્યો છે. સરકારી અને ખાનગી કચેરીઓને પણ 1 નવેમ્બરથી 31 જાન્યુઆરી સુધી કર્મચારીઓની ઓફિસમાં હાજરી 50 ટકા સુધી મર્યાદિત રાખવા સૂચના આપવામાં આવી છે. બાકીના કર્મચારીઓએ ઘરેથી કામ કરવાનું રહેશે. જોકે, આવશ્યક અને કટોકટીની સેવાઓને આ નિયમોમાંથી મુક્તિ આપવામાં આવી છે.
