Delhi Blast: હુમલા માટે 32 વાહનો તૈયાર કરવાનો પ્લાન, મોટી સંખ્યામાં ખરીદ્યા હતા વિસ્ફોટકો 

ગુપ્તચર એજન્સીઓએ ગુરુવારે દિલ્હીના લાલ કિલ્લા પાસે કાર બોમ્બ વિસ્ફોટ સાથે જોડાયેલા એક મોટા આતંકવાદી કાવતરાનો પર્દાફાશ કર્યો છે. સૂત્રોના જણાવ્યા અનુસાર શંકાસ્પદોએ અનેક સ્થળોએ હુમલા કરવા માટે લગભગ 32 જેટલા જૂના વાહનોને વિસ્ફોટકોથી સજ્જ કરવાની યોજના બનાવી હતી. આ ખુલાસો રાષ્ટ્રીય સુરક્ષા માટે ગંભીર ખતરો દર્શાવે છે.

ગુપ્તચર સૂત્રોએ ખુલાસો કર્યો છે કે, હાલ આ બાબતે ગંભીરતાથી તપાસનો વ્યાપ ચાલુ છે. પ્રારંભિક તપાસમાં જાણવા મળ્યું છે કે આરોપીઓએ હુમલામાં ઉપયોગ માટે i20 અને ઇકો સ્પોર્ટ વાહનોમાં ફેરફાર કરવાનું શરૂ કર્યું હતું. તપાસ ટીમ હવે તપાસ કરી રહી છે કે, શ્રેણીબદ્ધ વિસ્ફોટો કરવા માટે આ વિસ્તૃત યોજનાના ભાગ રૂપે વધારાના વાહનો ખરીદવામાં આવ્યા હતા કે કેમ. 

એક ગુપ્તચર સૂત્રોના જણાવ્યા મુજબ i20 અને ઇકોસ્પોર્ટ પછી એવું જાણવા મળ્યું હતું કે, વિસ્ફોટકોથી સજ્જ થઈ શકે તેવા 32 અન્ય જૂના વાહનો તૈયાર કરવાની તૈયારી ચાલી રહી હતી. આ સૂચવે છે કે આતંકવાદી જૂથ મોટા પાયે વિનાશ કરવાની યોજના બનાવી રહ્યું હતું.

સંકલિત વિસ્ફોટોની યોજના

તપાસ એજન્સીઓએ એ પણ અહેવાલ આપ્યો છે કે આશરે આઠ શંકાસ્પદો કથિત રીતે ચાર અલગ અલગ સ્થળોએ વિસ્ફોટ કરવાની તૈયારી કરી રહ્યા હતા. આ દરેક શંકાસ્પદ લોકોને એક પસંદ કરેલા શહેરમાં સોંપવામાં આવ્યા હતા. પ્રારંભિક તપાસમાં એ પણ સંકેત મળ્યો છે કે આરોપી જૂથ એક સાથે હુમલાઓ માટે  IED (ઇમ્પ્રુવાઇઝ્ડ વિસ્ફોટક) લઈ જવાની યોજના બનાવી રહ્યું હતું.
 
દિલ્હીમાં લાલ કિલ્લા નજીક થયેલા કાર બોમ્બ વિસ્ફોટ કેસની તપાસમાં સતત મોટા ઘટસ્ફોટ થઈ રહ્યા છે. અહેવાલોમાં દાવો કરવામાં આવી રહ્યો છે કે, તપાસ એજન્સીઓએ મહત્ત્વપૂર્ણ માહિતીનો પર્દાફાશ કર્યો છે. આતંકીઓની યોજના માત્ર દિલ્હી જ નહીં પરંતુ અન્ય ચાર શહેરોમાં આતંક મચાવવાની હતી. લગભગ આઠ શંકાસ્પદ આતંકીઓએ ચાર શહેરોમાં સિરિયલ બ્લાસ્ટ કરવાનો પ્લાન હતો.

શંકાસ્પદ આતંકીઓના નેટવર્કની તપાસ

અહેવાલો અનુસાર, આ આઠ શંકાસ્પદોએ ચાર અલગ અલગ શહેરોમાં હુમલો કરવાની યોજના બનાવી હતી. આ હેતુ માટે ચાર ગ્રુપ બનાવવામાં આવ્યા હતા, જેમાં દરેકમાં બે સભ્યો હતા. દરેક ગ્રુપ પાસે અનેક ઈમ્પ્રુવાઇઝ્ડ એક્સપ્લોઝિવ ડિવાઇસ (IED) વહન કરવાના હતા. બધી ટીમો ચાર શહેરોમાં એક સાથે બોમ્બ વિસ્ફોટ કરવાના હતા. સુરક્ષા એજન્સીઓ હવે આ શંકાસ્પદોની પ્રવૃત્તિઓ અને નેટવર્કની તપાસ કરી રહી છે.

આતંકવાદી ઉમરે જ કર્યો હતો ધડાકો, DNA ટેસ્ટથી પુષ્ટિ

10મી નવેમ્બરે દિલ્હીના લાલ કિલ્લા નજીક થયેલા કાર બ્લાસ્ટ મામલે પોલીસ અને ફોરેન્સિક ટીમે પુષ્ટિ કરી છે કે હ્યુન્ડાઈ i20 કારમાં વિસ્ફોટક હતો અને તે કારમાં આતંકી ડૉક્ટર ઉમર નબી ઉર્ફે ઉમર મોહમ્મદ જ સવાર હતો. કારના કાટમાળ પર મળેલા DNAના આધારે આતંકી ઉમર નબીની પુષ્ટિ થઈ છે, તેના સેમ્પલ તેના પરિવાર સાથે 100 ટકા મેચ થયા છે. જે બાદ હવે સ્પષ્ટ થઈ ગયું છે કે આ બ્લાસ્ટ ઉમર નબીએ જ કર્યો હતો જેના કારણે 12 નિર્દોષ લોકોએ જીવ ગુમાવ્યો જ્યારે 20 ઈજાગ્રસ્ત થયા. 

સરકારે માન્યું- દિલ્હીમાં આતંકવાદી હુમલો થયો 

ઉલ્લેખનીય છે કે, બુધવારે (12મી નવેમ્બર) દિલ્હીમાં વડાપ્રધાન નરેન્દ્ર મોદીની અધ્યક્ષતામાં કેબિનેટ કમિટી ઑન સિક્યુરિટીની બેઠક યોજાઇ હતી. આ બેઠક બાદ સરકારે દિલ્હી કાર બ્લાસ્ટની ઘટનાને આતંકવાદી હુમલો માન્યો છે. NIA દ્વારા સમગ્ર કેસની તપાસ ચાલી રહી છે.