'અકવાન' વાવાઝોડું શક્તિશાળી બન્યું; આંધ્ર-ઓડિશામાં 100 કિમીની ઝડપે પવન ફૂંકાવાની શક્યતા, અતિભારે વરસાદની આગાહી

'અકવાન' વાવાઝોડું શક્તિશાળી બન્યું; આંધ્ર-ઓડિશામાં 100 કિમીની ઝડપે પવન ફૂંકાવાની શક્યતા, અતિભારે વરસાદની આગાહી
તસવીર: Google
આ સમાચાર સાંભળો

બંગાળની ખાડીમાંથી ઉદ્ભવેલું ભીષણ ચક્રવાતી વાવાઝોડું 'અકવાન' (Cyclone Akvan) હવે વધુ શક્તિશાળી બની રહ્યું છે. ભારતીય હવામાન વિભાગના જણાવ્યા અનુસાર, ચક્રવાત અકવાન 20 નવેમ્બર 2026ના રોજ બપોર સુધીમાં ઉત્તર આંધ્રપ્રદેશ, યાનમ અને દક્ષિણ ઓડિશાના દરિયાકાંઠે ટકરાઈ શકે છે. આ દરમિયાન પવનની ઝડપ 90 થી 100 કિલોમીટર પ્રતિ કલાક અને વરસાદી ઝાપટા 110 કિલોમીટર પ્રતિ કલાક સુધી પહોંચવાની આશંકા છે. 19 નવેમ્બરથી આંધ્રપ્રદેશ અને ઓડિશામાં અતિભારે વરસાદની ચેતવણી હોવાથી લોકોને ઘરની બહાર ન નીકળવા અને લોકડાઉન જેવી સાવચેતી રાખવા અપીલ કરાઈ છે.

દરિયાકાંઠાના રાજ્યોમાં અતિભારે વરસાદ અને ઊંચા મોજાનું એલર્ટ

જાહેરાત

આંધ્રપ્રદેશ અને ઓડિશામાં ખતરો: 18 નવેમ્બરની સવારે આ વાવાઝોડું ઓડિશાના ગોપાલપુરથી 710 કિલોમીટર અને પુરીથી 770 કિલોમીટર દૂર હતું. 19 અને 20 નવેમ્બરે તટીય આંધ્રપ્રદેશ, યાનમ અને ઓડિશામાં અત્યંત ભારે વરસાદ પડશે. પશ્ચિમ ગોદાવરી, કોનાસીમા, કાકીનાડા, વિશાખાપટ્ટનમ, ગંજમ, ખુર્દા અને પુરી જિલ્લાના નીચાણવાળા વિસ્તારોમાં 0.5 થી 1.2 મીટર ઊંચા તોફાની મોજા ઉછળવાને કારણે પાણી ભરાવાની આશંકા છે. માછીમારોને દરિયો ન ખેડવા કડક સૂચના અપાઈ છે.

ઝારખંડ અને પૂર્વોત્તર રાજ્યોમાં અસર: 20 અને 21 નવેમ્બરે ઝારખંડ, નાગાલેન્ડ, મણિપુર, મિઝોરમ અને ત્રિપુરામાં ભારે વરસાદ અને 40 થી 50 કિલોમીટર પ્રતિ કલાકની ઝડપે પવન ફૂંકાવાની શક્યતા છે.

દિલ્હી-NCRમાં ધુમ્મસ અને UP-બિહારમાં વરસાદની આગાહી

ઉત્તર ભારતમાં ગાઢ ધુમ્મસ: IMD એ 19 થી 22 નવેમ્બર દરમિયાન દિલ્હી-NCR, પંજાબ, હરિયાણા અને ચંદીગઢમાં ગાઢ ધુમ્મસ છવાયેલું રહેવાની ચેતવણી આપી છે, જેના કારણે સવારના સમયે વિઝિબિલિટી ઓછી રહેશે.

UP અને બિહારમાં બદલાશે હવામાન: પૂર્વી ઉત્તર પ્રદેશ અને બિહારમાં 21 અને 22 નવેમ્બરે હળવાથી છૂટાછવાયા વરસાદ અને વીજળી પડવાની સંભાવના વ્યક્ત કરવામાં આવી છે.

આ સમાચાર શેર કરો

જાહેરાત