કોંગ્રેસે લોકસભા ચૂંટણીમાં આ ઉમેદવાર પર ખર્ચ્યા સૌથી વધુ રૂપિયા, જુઓ કોણ હાર્યું અને જીત્યું

કોંગ્રેસે લોકસભામાં તેના ટોચના નેતા રાહુલ ગાંધીને વાયનાડ અને રાયબરેલીથી 2024ની લોકસભા ચૂંટણી લડવા માટે 70-70 લાખ રૂપિયા આપ્યા હતા. પાર્ટીએ આ માહિતી ચૂંટણી પંચને આપી છે. ચૂંટણી પ્રચારમાં ઉમેદવાર જે ખર્ચ કરી શકે તેની મર્યાદા છે, પરંતુ રાજકીય પક્ષો માટે આવી કોઈ મર્યાદા નથી.

આનાથી વધુ રૂપિયા મેળવનાર એકમાત્ર કોંગ્રેસના ઉમેદવાર વિક્રમાદિત્ય સિંહ હતા, જેમને પાર્ટી ફંડમાંથી રૂ.87 લાખ આપવામાં આવ્યા હતા, જોકે તેઓ હિમાચલ પ્રદેશની મંડી બેઠક પરથી ભાજપની અભિનેત્રી કંગના રનૌત સામે ચૂંટણી હારી ગયા હતા.

કિશોરી લાલ શર્મા કોંગ્રેસના ઉમેદવારોમાં સામેલ હતા જેમને આ લોકસભા ચૂંટણીમાં 70 લાખ રૂપિયા આપવામાં આવ્યા હતા. શર્માએ અમેઠીથી ભારતીય જનતા પાર્ટી (BJP)ના ઉમેદવાર સ્મૃતિ ઈરાનીને હરાવ્યા હતા.

કોંગ્રેસના નેતાઓ કેસી વેણુગોપાલ (કેરળમાં અલાપ્પુઝા) અને મણિકમ ટાગોર (તમિલનાડુમાં વિરુધુનગર)ને પણ 70-70 લાખ રૂપિયા આપવામાં આવ્યા હતા. કર્ણાટકના ગુલબર્ગાના કોંગ્રેસના ઉમેદવારો રાધાકૃષ્ણ અને વિજય ઈન્દર સિંગલાને (પંજાબમાં આનંદપુર સાહિબ) પણ ચૂંટણી લડવા માટે પાર્ટી તરફથી 70-70 લાખ રૂપિયા મળ્યા હતા.

કોંગ્રેસના વરિષ્ઠ નેતા આનંદ શર્મા અને દિગ્વિજય સિંહને અનુક્રમે 46 લાખ અને 50 લાખ રૂપિયા આપવામાં આવ્યા હતા. આ બંને નેતાઓ ચૂંટણી હારી ગયા હતા. રાહુલ ગાંધી રાયબરેલી તેમજ વાયનાડથી જીત્યા હતા, પરંતુ તેમણે વાયનાડ બેઠક છોડી દીધી હતી. તેઓ હવે લોકસભામાં વિપક્ષના નેતા છે.

પાર્ટીએ સંસદીય ચૂંટણીમાં 99 બેઠકો જીતી હતી અને રાહુલ ગાંધી બે બેઠકો પર વિજયી થયા હતા.  જાન્યુઆરી 2022માં, ચૂંટણી પંચની ભલામણના આધારે સરકારે લોકસભા ચૂંટણીમાં ઉમેદવારો માટે ચૂંટણી ખર્ચની મર્યાદા 70 લાખ રૂપિયાથી વધારીને 95 લાખ રૂપિયા અને વિધાનસભાની ચૂંટણી માટે 28 લાખ રૂપિયાથી વધારીને 40 લાખ રૂપિયા કરી દીધી હતી. લોકસભા ચૂંટણી માટે સંશોધિત ખર્ચ મર્યાદા હવે મોટા રાજ્યો માટે રૂ. 90 લાખ અને નાના રાજ્યો માટે રૂ. 75 લાખ છે. 2024ની લોકસભા ચૂંટણી સાત તબક્કામાં યોજાઈ હતી અને 4 જૂને પરિણામ જાહેર કરવામાં આવ્યા હતા.