કોંગ્રેસના મુખ્યમંત્રીએ જ ઉપરાષ્ટ્રપતિની ચૂંટણીમાં કરાવ્યું ક્રોસ વોટિંગ, BRS ધારાસભ્યના નિવેદનથી ખળભળાટ

કેસીઆરની પાર્ટી બીઆરએસના ધારાસભ્ય પાડી કૌશિક રેડ્ડીએ ઉપરાષ્ટ્રપતિ ચૂંટણીમાં ક્રોસ વોટિંગ અંગે સનસનાટીભર્યો દાવો કર્યો છે. કૌશિક રેડ્ડીએ આરોપ લગાવ્યો છે કે તેલંગાણાના આઠ કોંગ્રેસના સાંસદોએ તેલંગાણાના મુખ્યમંત્રી રેવંત રેડ્ડીના કહેવાથી એનડીએ ઉમેદવારની તરફેણમાં મતદાન કર્યું હતું. તેલંગાણા ભવન ખાતે એક પત્રકાર પરિષદને સંબોધતા બીઆરએસ ધારાસભ્યએ કહ્યું કે ઈન્ડિયા એલાયન્સમાંથી નીકળેલા કુલ 15 મતોમાંથી આઠ તેલંગાણા કોંગ્રેસના સાંસદોના છે. નોંધનીય છે કે એનડીએ ઉમેદવાર સીપી રાધાકૃષ્ણન ઉપરાષ્ટ્રપતિ ચૂંટણી જીતી ગયા હતા. તો  ઈન્ડિયા એલાયન્સના ઉમેદવાર બી સુદર્શન રેડ્ડીએ હારનો સામનો કરવો પડ્યો હતો.

ભારત રાષ્ટ્ર સમિતિ કેસીઆરનો પક્ષ છે. તેણે ઉપરાષ્ટ્રપતિ ચૂંટણીથી પોતાને દૂર રાખ્યા હતા. હવે બીઆરએસના ધારાસભ્ય કૌશિક રેડ્ડીએ આ દાવો કર્યો છે. પોતાની પ્રેસ કોન્ફરન્સમાં કૌશિક રેડ્ડીએ કહ્યું કે કોંગ્રેસના વરિષ્ઠ નેતા જયરામ રમેશે 315 મતો મળ્યા હોવાનો દાવો કર્યો હતો. પરંતુ ઈન્ડિયા એલાયન્સના ઉમેદવાર બી સુદર્શન રેડ્ડીને ઉપરાષ્ટ્રપતિ ચૂંટણીમાં માત્ર 300 મત મળ્યા હતા. તેમનું કહેવું છે કે 15 સાંસદોએ પક્ષ બદલ્યો હતો.

બીઆરએસ ધારાસભ્ય કૌશિક રેડ્ડીના જણાવ્યા મુજબ, કોંગ્રેસના સાંસદો કેન્દ્રીય મંત્રી નિર્મલા સીતારમણ, નીતિન ગડકરી અને લોકસભા સ્પીકર સાથે મળ્યા હતા. આ બધું રેવંત રેડ્ડી અને આંધ્રપ્રદેશના મુખ્યમંત્રી ચંદ્રબાબુ નાયડુ વચ્ચે ગુરુ-શિષ્ય સંબંધોને કારણે થયું હતું. તેમણે કહ્યું કે રેવંત રેડ્ડી 2016 સુધી તેલુગુ દેશમ પાર્ટી સાથે હતા.

કૌશિક રેડ્ડીએ એવો પણ દાવો કર્યો હતો કે રાજ્યના ત્રણ કોંગ્રેસના સાંસદોએ પણ તેમને આ જ વાત કહી છે. તેમણે કહ્યું કે એક તરફ, કોંગ્રેસ નેતા રાહુલ ગાંધી દિવસ-રાત મત ચોરીની વાત કરતા રહે છે. બીજી તરફ, રેવંત રેડ્ડીએ ઈન્ડિયા એલાયન્સના ઉપરાષ્ટ્રપતિ પદના ઉમેદવાર સાથે દગો કર્યો છે.