શા માટે કોઈને બચાવો છો? સંદેશખાલી કેસમાં મમતા સરકારને SC તરફથી મોટો ફટકો 

સુપ્રીમ કોર્ટે સોમવારે (8 જુલાઈ 2024) પશ્ચિમ બંગાળની મમતા સરકારને મોટો ઝટકો આપ્યો છે. સુપ્રીમ કોર્ટે બંગાળ સરકારની અરજીને ફગાવી દીધી હતી, જેમાં કોલકાતા  હાઈકોર્ટના નિર્ણયને પડકારવામાં આવ્યો હતો. હાઈકોર્ટે પોતાના નિર્ણયમાં સંદેશખાલીમાં મહિલાઓના યૌન શોષણ, જમીન પચાવી પાડવા અને રાશન કૌભાંડ સાથે જોડાયેલા તમામ મામલામાં સીબીઆઈ તપાસનો આદેશ આપ્યો હતો.

કોલકાતા હાઈકોર્ટના નિર્ણયને પડકારતી અરજીને ફગાવી દેતા SCએ મમતા સરકારના વલણ પર પણ સવાલો ઉઠાવ્યા હતા. સુપ્રીમ કોર્ટે કહ્યું કે શા માટે સરકાર વ્યક્તિને બચાવવાનો પ્રયાસ કરી રહી છે?

પશ્ચિમ બંગાળ સરકારના વકીલ અભિષેક મનુ સિંઘવીએ કહ્યું કે રાશન કૌભાંડમાં 43 FIR દાખલ કરવામાં આવી છે. રાજકીય કારણોસર આને અતિશયોક્તિ કરવામાં આવી રહી છે. આ સાથે જ સુપ્રીમ કોર્ટે મમતા સરકારને પૂછ્યું કે રાજ્ય સરકાર શા માટે કોઈને બચાવવાનો પ્રયાસ કરી રહી છે.

સુપ્રીમ કોર્ટે કહ્યું કે કોલકાતા  હાઈકોર્ટની ટિપ્પણીથી તપાસ પ્રભાવિત થવી જોઈએ નહીં. હકીકતમાં, આ કેસની સુનાવણી કરતી વખતે, કોલકાતા  હાઈકોર્ટે મમતા સરકારને આંચકો આપ્યો હતો અને આ સંદેશખાલી કેસની સીબીઆઈ દ્વારા તપાસ કરવાનો નિર્ણય આપ્યો હતો અને કહ્યું હતું કે તપાસની દેખરેખ કોલકાતા  હાઈકોર્ટ પોતે કરશે. આ નિર્ણય સામે મમતા સરકાર સુપ્રીમ કોર્ટ પહોંચી હતી.

સંદેશખાલી કેસ શું છે

સીબીઆઈ 5 જાન્યુઆરીએ સંદેશખાલીમાં ED અધિકારીઓ પર થયેલા હુમલાની પણ તપાસ કરી રહી છે. રાશન કૌભાંડ કેસમાં TMC નેતા શેખ શાહજહાંના ઘરે દરોડો પાડવા આવેલા EDના અધિકારીઓ પર ટોળાએ હુમલો કર્યો હતો. આરોપ છે કે શાહજહાં શેખના નિર્દેશ પર તપાસ એજન્સીના અધિકારીઓ પર હુમલો કરવામાં આવ્યો હતો. શાહજહાં અને તેના સહયોગીઓ પર મહિલાઓની જાતીય સતામણી અને જમીન પચાવી પાડવાનો પણ આરોપ છે. વિવાદ વધતાં ટીએમસીએ શાહજહાંને પાર્ટીમાંથી સસ્પેન્ડ કરી દીધા હતા.