બંગાળમાં મમતા સમર્થકો રસ્તા પર, ભાજપની મહિલા વિંગની રેલી; રાજકીય પક્ષો માટે બન્યું પ્રદર્શનનો અખાડો

કોલકાતાની આરજી કર મેડિકલ હોસ્પિટલના ટ્રેઇની ડૉક્ટરની બળાત્કાર અને હત્યાને લઈને બંગાળમાં બબાલ અટકવાનું નામ લઈ રહી નથી. વિપક્ષ અને શાસક પક્ષ બંને એકબીજા ઉપર આક્ષેપો કરી રહ્યા છે. પીડિતા માટે ન્યાયની માંગ સાથે શરૂ થયેલો વિરોધ હવે રાજકીય પક્ષો માટે પ્રદર્શનનો અખાડો બની ગયો છે. એક તરફ મમતા બેનર્જીના સમર્થકો રસ્તા પર ઉતરશે તો બીજી તરફ ભાજપની મહિલા પાંખ મહિલા આયોગનો ઘેરાવ કરશે.

કોલકાતા કેસમાં બંગાળ મહિલા આયોગની કથિત નિષ્ક્રિયતાને લઈને ભાજપની મહિલા વિંગ આયોગની ઓફિસ સુધી કૂચ કરશે. બંગાળ ભાજપના અધ્યક્ષ સુકાંત મજુમદારનું કહેવું છે કે મહિલા મોરચાના સભ્યો મહિલા આયોગની ઓફિસને બહારથી તાળા મારવા જઈ રહ્યા છે.

જ્યારે કોલકાતાના મુખ્યમંત્રી મમતા બેનર્જીએ જાહેરાત કરી છે કે, ટીએમસી સમર્થક વિદ્યાર્થીઓ 30 ઓગસ્ટે પ્રદર્શન કરશે. પાર્ટી 31મી ઓગસ્ટે દરેક બ્લોકમાં વિરોધ પ્રદર્શન કરશે. ટીએમસીનો મહિલા મોરચો પણ 1 સપ્ટેમ્બરે વિરોધ કરશે. મમતા બેનર્જીની માંગ છે કે દેશમાં બળાત્કાર વિરુદ્ધ કડક કાયદો બનાવવો જોઈએ. તેણીએ કહ્યું હતું કે તે વિધાનસભામાં એવો કાયદો લાવશે જે 10 દિવસમાં બળાત્કારના કેસમાં ન્યાય આપશે અને જો બિલ રાજભવનમાંથી પસાર નહીં થાય તો ત્યાં પણ ધરણા પ્રદર્શન કરશે.