Video: "2017 પહેલાં ચહેરો જોઈને વીજળી મળતી હતી..." – યોગી આદિત્યનાથે જૂની સરકારની પોલ ખોલી, કર્યો સનસનીખેજ દાવો!
ઉત્તર પ્રદેશના મુખ્યમંત્રી યોગી આદિત્યનાથે લખનૌ ખાતે આયોજિત 'ટેક સંગમ ઇન્ટરનેશનલ કોન્ફરન્સ'ના ઉદ્ઘાટન સમારોહમાં અગાઉની સરકારોની કાર્યશૈલી પર આકરા પ્રહારો કર્યા હતા. તેમણે 2017 પહેલાંના ઉત્તર પ્રદેશ અને આજના બદલાયેલા યુપી વચ્ચેનો તફાવત દર્શાવતાં વીજળી, સુરક્ષા અને રોકાણના મુદ્દે મોટા દાવા કર્યા હતા.
"પહેલાં ચહેરો જોઈને વીજળી અપાતી હતી"
રાજ્યમાં અગાઉ થયેલા પક્ષપાતનો ઉલ્લેખ કરતાં મુખ્યમંત્રીએ જણાવ્યું કે, "2017 પહેલાં તો એવું લાગતું હતું કે વીજળી પણ લોકોના ચહેરા જોઈને આપવામાં આવતી હતી. દરેક નાગરિકને સમાન રીતે વીજળી મળતી નહોતી. આજે એ સ્થિતિ બદલાઈ ચૂકી છે; રાજ્યમાં દરેક વ્યક્તિને ભેદભાવ વિના સમાન રીતે વીજળી મળી રહી છે." તેમણે ઉમેર્યું કે વર્તમાન સરકાર રાજ્યમાં નાગરિકોને સુરક્ષાની સંપૂર્ણ ગેરંટી આપી રહી છે અને તે જ પ્રતિબદ્ધતા સાથે યુવાનો માટે રોજગારીની તકોનું સર્જન પણ કરી રહી છે.
દિલ્હીમાં કેમ કરવી પડી હતી સમિટ?
અગાઉની અખિલેશ યાદવ સરકાર પર નિશાન સાધતાં યોગી આદિત્યનાથે 2015-16ના રોકાણ સંમેલનની યાદ અપાવી હતી. તેમણે કહ્યું કે તે સમયે રાજ્ય સરકારે ઉત્તર પ્રદેશમાં ઇન્વેસ્ટમેન્ટ સમિટ યોજવાનો પ્રયાસ કર્યો હતો, પરંતુ દેશભરના મોટા ઉદ્યોગપતિઓએ લખનૌ આવવાનો સ્પષ્ટ ઇનકાર કરી દીધો હતો. પરિણામે, તે સમિટ લખનૌને બદલે દિલ્હીમાં યોજવાની ફરજ પડી હતી.
આજે વૈશ્વિક સ્તરે લખનૌની ઓળખ
યોગી આદિત્યનાથે ગર્વપૂર્વક જણાવ્યું કે 2017 પહેલાં જો કોઈ લખનૌમાં આંતરરાષ્ટ્રીય પરિષદની વાત કરતું, તો અમેરિકા, બ્રિટન, યુરોપ કે ખુદ ભારતના અન્ય ભાગોમાંથી કોઈ નિષ્ણાત અહીં આવવા તૈયાર થતા નહોતા. આજે કાયદો અને વ્યવસ્થા તથા સુધરેલી માળખાકીય સુવિધાઓને કારણે વિશ્વભરના નિષ્ણાતો અને રોકાણકારો લખનૌ આવી રહ્યા છે, જે ઉત્તર પ્રદેશના બદલાયેલા માહોલનું જીવંત પ્રમાણ છે.
