Video: "1 નવેમ્બરે રેલી કરીને શીખોના જખમ પર મીઠું ભભરાવી રહ્યા છે રાહુલ ગાંધી": ભાજપ સાંસદ રવિશંકર પ્રસાદનો આકરો પ્રહાર
કોંગ્રેસ સાંસદ રાહુલ ગાંધી દ્વારા આગામી 1 નવેમ્બરે યોજાનારી રેલીને લઈને રાજકીય વિવાદ વકર્યો છે. ભારતીય જનતા પાર્ટીના વરિષ્ઠ નેતા અને સાંસદ રવિશંકર પ્રસાદે નવી દિલ્હી ખાતે પત્રકાર પરિષદ યોજીને રાહુલ ગાંધી અને કૉંગ્રેસ પક્ષ પર આકરા શાબ્દિક પ્રહારો કર્યા હતા. તેમણે આરોપ લગાવ્યો હતો કે રાહુલ ગાંધી એક સુનિયોજિત ષડયંત્ર હેઠળ શીખ સમુદાયની ભાવનાઓને ઠેસ પહોંચાડી રહ્યા છે.
"1 નવેમ્બરની જ જીદ શા માટે?"
1984ના શીખ વિરોધી રમખાણોની સંવેદનશીલ તારીખનો ઉલ્લેખ કરતાં રવિશંકર પ્રસાદે જણાવ્યું કે, "રાહુલ ગાંધી બહુ ગણતરીપૂર્વક રીતે 1 નવેમ્બરે જ પોતાની રેલી યોજવાની જીદ પકડીને શીખ સમુદાયના ઘાવ પર મીઠું ભભરાવવાનો પ્રયાસ કરી રહ્યા છે. તેઓ રેલીની તારીખ બદલવાનો સ્પષ્ટ ઇનકાર કરી રહ્યા છે. અમે આ હઠાગ્રહની કડક શબ્દોમાં નિંદા કરીએ છીએ."
તેમણે સીધો સવાલ કરતાં પૂછ્યું કે, "રાહુલ ગાંધી, 1 નવેમ્બર જ કેમ? આ ચોક્કસ દિવસે જ રેલી યોજવા પાછળ તમારો શો ઈરાદો છે? તમે આનાથી શો સંદેશ આપવા માંગો છો? આનો સ્પષ્ટ સંદેશ એ જ છે કે કૉંગ્રેસને શીખોની વેદનાની કોઈ પડી નથી."
સેમ પિત્રોડાના જૂના નિવેદન પર ઘેરી કૉંગ્રેસ
ભાજપ નેતાએ રાહુલ ગાંધીના નિકટવર્તી સેમ પિત્રોડાના અગાઉના વિવાદાસ્પદ નિવેદનને યાદ અપાવતાં કહ્યું કે, પિત્રોડાએ એક સમયે કહ્યું હતું કે "1984માં જે થયું તે થયું, હવે તેને વારંવાર કેમ ઉછાળવું?" પ્રસાદે દાવો કર્યો હતો કે કૉંગ્રેસ માનસિક રીતે આજે પણ શીખ સમુદાયની પીડા પ્રત્યે સંવેદનહીન વલણ ધરાવે છે.
મોદી સરકારે શીખ સમુદાયના સન્માનમાં લીધેલા પગલાં
આ પ્રસંગે રવિશંકર પ્રસાદે કેન્દ્રની નરેન્દ્ર મોદી સરકાર દ્વારા શીખ સમુદાયના ગૌરવ અને સન્માન માટે લેવાયેલા ઐતિહાસિક નિર્ણયોની યાદી આપી હતી. તેમણે કહ્યું કે મોદી સરકારે કરતારપુર સાહિબ કોરિડોરનું નિર્માણ કરાવીને શ્રદ્ધાળુઓ માટે માર્ગ મોકળો કર્યો છે. આ ઉપરાંત, દીવાલમાં જીવતા ચણી દેવાયેલા ગુરુ ગોવિંદ સિંહજીના સાહિબજાદાઓના બલિદાનને યોગ્ય સન્માન આપતાં સમગ્ર દેશમાં 'વીર બાળ દિવસ' ઉજવવાની પહેલ પણ આ સરકારે જ કરી છે.
