ટ્રાન્સ ભારત એવિએશનના તમામ હેલિકોપ્ટરની ઉડાન પર પ્રતિબંધ, 6 લોકોના મોત બાદ UCADAનું મોટું અને કડક એક્શન
ઉત્તરાખંડના ચમોલી જિલ્લામાં બદરીનાથ ધામથી પરત ફરી રહેલું એક હેલિકોપ્ટર જોશીમઠ નજીક દુર્ઘટનાગ્રસ્ત થયું છે. આ દર્દનાક અકસ્માતમાં હેલિકોપ્ટરમાં સવાર પાયલટ સહિત તમામ 6 લોકોના ઘટનાસ્થળે જ મોત નીપજ્યાં છે. ચમોલી પોલીસે તમામ 6 લોકોના મોતના સમાચારની સત્તાવાર પુષ્ટિ કરી છે. આ ભયાનક દુર્ઘટના બાદ ઉત્તરાખંડ સિવિલ એવિએશન ડેવલપમેન્ટ ઓથોરિટી (UCADA) દ્વારા તાત્કાલિક મોટી કાર્યવાહી કરીને ટ્રાન્સ ભારત એવિએશન કંપનીના તમામ હેલિકોપ્ટરની ઉડાન પર સંપૂર્ણ પ્રતિબંધ મૂકી દેવામાં આવ્યો છે અને સમગ્ર ફ્લીટને ગ્રાઉન્ડ કરવાનો આદેશ જારી કરાયો છે.
જોશીમઠની ખીણમાં સંપર્ક તૂટ્યો અને દુર્ઘટના સર્જાઈ
યુકાડા (UCADA)ના ચીફ એક્ઝિક્યુટિવ ઓફિસર (CEO) પ્રતીક જૈને આપેલી વિગતો અનુસાર, ટ્રાન્સ ભારત એવિએશન પ્રાઇવેટ લિમિટેડનું હેલિકોપ્ટર (VT-HCX) બપોરે આશરે 1:14 વાગ્યે બદરીનાથથી દહેરાદૂનના સહસ્ત્રધારા જવા માટે રવાના થયું હતું. ઉડાન ભર્યા બાદ હેલિકોપ્ટર જ્યારે જોશીમઠ ખીણ પરથી પસાર થઈ રહ્યું હતું, ત્યારે અચાનક એર ટ્રાફિક કંટ્રોલ સાથેનો તેનો સંપર્ક કપાઈ ગયો હતો અને ટ્રેકિંગ સિસ્ટમ પરથી પણ તેનું લોકેશન ગાયબ થઈ ગયું હતું. ત્યારબાદ જોશીમઠ નજીક હાથી પહાડ પાછળ આવેલા ચાયી ગામ વિસ્તારમાં હેલિકોપ્ટર ક્રેશ થયું હોવાનું સામે આવ્યું હતું.
પાયલટ સહિત 6 લોકોના કરુણ મોત
દુર્ઘટનાગ્રસ્ત હેલિકોપ્ટરમાં પાયલટ કેપ્ટન હિમાંશુ સહિત કુલ 6 લોકો સવાર હતા. પેસેન્જર મેનિફેસ્ટ મુજબ અન્ય 5 મુસાફરોમાં પ્રતાપ, અરુણ, શંકર ગૌડા, સુધીર કે અને એચએસ નટરાજ સામેલ હતા. ચમોલી પોલીસ અને વહીવટી તંત્ર દ્વારા હાથ ધરવામાં આવેલી તપાસમાં પાયલટ સહિત તમામ મુસાફરોના કરુણ મોત થયા હોવાની પૂર્તિ કરવામાં આવી છે.
સેના અને SDRF દ્વારા રેસ્ક્યૂ ઓપરેશન
ઘટનાની જાણ થતાં જ ચમોલી જિલ્લા વહીવટી તંત્ર, પોલીસ, એસડીઆરએફ (SDRF), સ્વાસ્થ્ય વિભાગ અને ભારતીય સેનાની ટુકડી તાત્કાલિક ઘટનાસ્થળે બચાવ કામગીરી માટે પહોંચી ગઈ હતી. વિસ્તારમાં સતત વરસાદ અને ગાઢ વાદળો છવાયેલા હોવાથી વિઝિબિલિટી ઘણી ઓછી હતી, જેના કારણે રેસ્ક્યૂ ટીમોને ઘટનાસ્થળ શોધવામાં ભારે મુશ્કેલીઓનો સામનો કરવો પડ્યો હતો.
ટ્રાન્સ ભારત એવિએશનના સમગ્ર ફ્લીટ પર તાત્કાલિક રોક
આ ગંભીર દુર્ઘટનાને પગલે ઉત્તરાખંડ નાગરિક ઉડ્ડયન વિકાસ પ્રાધિકરણ (UCADA) દ્વારા તાત્કાલિક અસરથી કડક પગલું લેવામાં આવ્યું છે. તંત્ર દ્વારા સાવચેતી અને સલામતીના ભાગરૂપે ટ્રાન્સ ભારત એવિએશનના તમામ હેલિકોપ્ટરોની ઉડાન પર તાત્કાલિક પ્રતિબંધ મૂકીને સમગ્ર બેડાને ગ્રાઉન્ડ કરી દેવાયો છે. વહીવટી તંત્ર દ્વારા આ મામલે વિસ્તૃત તપાસના આદેશ પણ આપી દેવામાં આવ્યા છે.
