આધાર કાર્ડ ધારકોને મોટી રાહત... હવે આ તારીખ સુધી ફ્રીમાં કરી શકશો અપડેટ, ખૂબ જ સરળ છે પ્રક્રિયા

આધાર કાર્ડ ધારકો માટે શનિવારે મોટા સમાચાર આવ્યા છે, આધાર કાર્ડ યુનિક આઇડેન્ટિફિકેશન ઓથોરિટી અથવા UIDAIએ ફ્રીમાં આધાર કાર્ડ અપડેટ કરવાની સમયમર્યાદા વધારી દીધી છે અને હવે આ કામ 14 ડિસેમ્બર 2024 સુધી ફ્રીમાં કરી શકાશે. આ સમયમર્યાદા આજે પૂરી થઈ રહી હતી, પરંતુ ઓથોરિટીએ તેને ત્રણ મહિના માટે લંબાવવાનો નિર્ણય કર્યો છે.

આ સમયમર્યાદા આજે પૂરી થવાની હતી

UIDAIએ 10 વર્ષથી વધુ સમય પહેલા બનાવેલા આધાર કાર્ડને ફ્રીમાં અપડેટ કરવાની સુવિધા પૂરી પાડી છે અને તેની સમયમર્યાદા આજે પૂરી થઈ રહી હતી, જે હવે લંબાવવામાં આવી છે. આ પહેલા પણ આધાર કાર્ડને ફ્રીમાં અપડેટ કરવાની સમયમર્યાદા લંબાવવામાં આવી છે. પહેલા તેને 14 માર્ચથી 14 જૂન 2024 સુધી લંબાવવામાં આવી હતી અને પછી છેલ્લી તારીખ ફરી એકવાર વધારીને 14 સપ્ટેમ્બર કરવામાં આવી હતી. શનિવારે તેમાં ફરી વધારો કરવામાં આવ્યો છે અને હવે આધાર કાર્ડ ધારકો આ કામ ત્રણ મહિના સુધી એટલે કે 14મી ડિસેમ્બર સુધી બિલકુલ ફ્રીમાં કરાવી શકશે UIDAIએ આ માહિતી સોશિયલ મીડિયા પર શેર કરી છે અને X હેન્ડલ પર પોસ્ટ કરી છે.

સમયમર્યાદા પૂરી થયા બાદ ચાર્જ લાગશે

આધાર કાર્ડને ફ્રીમાં અપડેટ કરવાની આ નિશ્ચિત સમયમર્યાદા પછી, તમારે આ મહત્ત્વપૂર્ણ કાર્ય કરવા માટે UIDAI દ્વારા નક્કી કરાયેલ ચાર્જ ચૂકવવો પડશે, જે 50 રૂપિયા છે. ખાસ વાત એ છે કે UIDAI દ્વારા આપવામાં આવતી આધાર કાર્ડ અપડેટ કરવાની આ ફ્રી સર્વિસ માત્ર myAadhaar પોર્ટલ પર ઉપલબ્ધ છે.

આ રીતે ઓનલાઈન અપડેટ કરો

• UIDAIની સત્તાવાર વેબસાઈટ https://uidai.gov.in/ પર લોગ ઈન કરો.
• હોમપેજ પર myAadhaar Portal પર જાઓ અને રજિસ્ટર્ડ મોબાઇલ નંબર પર આવેલા OTPનો ઉપયોગ કરીને લોગ ઈન કરો.
• આ પછી, તમારી વિગતો તપાસો અને જો વિગતો સાચી હોય, તો બોક્સ પર ટિક કરો.
• જો ડેમોગ્રાફિક માહિતી ખોટી જણાય, તો ડ્રોપ-ડાઉન મેનૂમાંથી ઓળખ દસ્તાવેજ પસંદ કરો અને દસ્તાવેજ અપલોડ કરો.
• આ દસ્તાવેજ JPEG, PNG અને PDF સ્વરૂપે અપલોડ કરી શકાય છે.

આ અપડેટ્સ માટે કેન્દ્રમાં જવું પડશે

જણાવ્યા મુજબ, ફ્રીમાં આધાર અપડેટ કરવાની સુવિધા માત્ર ઓનલાઈન ઉપલબ્ધ છે. આધાર કાર્ડમાં કોઈપણ પ્રકારના અપડેટ માટે, તમારે આધાર કેન્દ્ર પર જઈને નિર્ધારિત ફી ચૂકવવી પડશે. કેટલાક અપડેટ્સ એવા છે જે ઓનલાઈન નહીં પણ કેન્દ્રની મુલાકાત લઈને કરવાના રહેશે. જો તમે આઈરિસ અથવા બાયોમેટ્રિક ડેટા અપડેટ કરવા માંગો છો. તો તમારે આધાર કેન્દ્ર પર જવું પડશે.